45°
媽咪姐一向都話，團結就是力量！咁呢期娛樂圈中最啱key嘅，又係邊幾個呢？梗係愈變愈靚，包面都可以變尖面嘅「V煞兵團」啦！係呀，佢哋平時好似無乜兩句，但一講起點解忽然變靚，靚完仲可以「更靚」時！就會異口同聲咁話：化妝勁咗！減肥瘦咗！擺pose叻咗…… 哎吔！是但啦。學最新V煞黃婉曼話齋：「以前我接受唔到整容，依家就覺得OK。」係咯，你覺得OK咪OK囉！咁係靚咗定驚嚇咗呢？睇相先講啦！
電視台易容女臥底徐子珊
參選港姐時，子珊塊面圓又圓！喺TVB打個轉啫，即刻鼻樑「升呢」，下巴長成吋。都係嗰句，TVB真係地靈人傑啊！又或者，徐小姐有特別任務？難怪久唔久就要易容！
陳敏之
曾幾何時，闊面長腿係陳敏之嘅標誌。依家？只可以講句，長腿依舊，而人面全非。好欷歔？唔怕，睇多啲（V煞）就慣㗎嘞！
楊秀惠
楊小姐初嚟香港選華姐，方面下巴短。留港發展三幾年啫！面長下巴尖。都話香港係福地咯！已經瓜子口面嘅，真係唔好嚟長住呀。
郭可盈
猶記得郭可盈同陶大宇拍《刑事偵緝檔案》時，面有肉地，幾鬼cute！但好明顯，郭小姐並唔係咁諗，只見佢顎骨愈嚟愈窄，終於變成V煞！嘩，只要有恆心，顎骨磨成粉。
認到就奇組黃婉曼
呢一group，可謂變臉高手雲集！帶頭嘅係最新V煞黃婉曼。佢話啪骨同搣鼻好work㗎，咦？咁其實「兜巴星」都應該納入瘦面療程喎。
許穎（Phoebe）
好多人講過，依家嘅Phoebe應該係中咗「還原靚靚拳」，媽咪姐話唔係！中拳點可以有呢個效果呀，要中降先掂。
陳靜儀（Mia）
模媽Mia講咗好多次，佢無整容！媽咪姐半信半疑啦，事關佢個樣已經超乎人體生理極限。靚女，係咪俾外星人捉過去做實驗呀？要搵MIB喎！
失散姊妹組周汶錡
周汶錡同杜德偉拍拖嗰時，鼻扁面闊。依家換咗法籍男友，面尖鼻又高。咦，勁喎！唔通法國菜除咗好味，仲可以瘦面！
李彩華
初出道嘅李彩華已經係個靚女！只不過佢塊面同個鼻隨住年齡增長，而變得更尖。最奇嘅係相比周麗淇，佢仲似周汶錡個妹喎！
音樂瘦面組吳雨霏
唔係望真啲，會以為佢係CoCo Lee（李玟）！睇番Cookies時代嘅舊相，OMG！我知我知，Kary話佢無整容吖嘛。嗯……咁音樂嘅力量真係好神奇呀！
謝安琪
女人真係十八變！嫁咗人做咗人阿媽嗰啲，可以變得仲勁㖭！係呀，媽咪姐知阿Kay箍咗牙。吖，個牙箍梗係箍埋落下巴嘞。
喂喂喂，下期咪走雞！
啱啱收到消息，下期《忽周》隨書附送有成百頁嘅旅遊書《台北向左走向右走》呀。咩話？你去過N次台北？媽咪姐都係！但今次《忽周》記者帶大家向左走又向右走，去勻苗栗、桃園、新竹、宜蘭同花蓮縣，親親大自然之餘，又玩晒啲益智主題樂園。行到攰咩？仲可以浸吓溫泉食好嘢，再衝落太平洋，涼一涼呀。噢！真係未出發先身痕，好想玩呀食呀shopping呀！仲有倫敦、韓國同東京嘅新遊點推介呢。神啊可以賜給媽咪姐多啲時間多啲錢嗎？ ####
留言列表
{{ article.title }}
