施緊箍咒
未叫roll機，JJ已率先箍實羅仲謙，但男方顯得相當避忌，唔敢正視她。
劉公子的裸照風波暫時落畫，大隻仔羅仲謙叫做鬆一口氣。雖然是非多多，但情場得意的他早前遭踢爆與楊怡在將軍澳領峯秘密同居半年，姊弟戀逐漸浮面。
異性緣一直暢旺的羅仲謙，即使肯為楊怡姐姐修心養性，不過身邊飛來蜢依然唔少。
上周二（5日）晚，羅與賈曉晨（JJ）在尖沙嘴拍攝婚妙廣告。本刊發現JJ全程做主動，不避嫌把玩男方眼鏡，拍接吻鏡頭時更要求導演試多take，JJ watt數十足，明剃楊怡眼眉。
猴擒錫嘴
雖然羅仲謙為楊怡轉性做專一男友，不過身邊仍有不少異性黐埋身。上周二（5日）晚，他與JJ在尖沙嘴為法國婚紗拍廣告，二人等埋位時，JJ忽然嘟住嘴定神望着羅仲謙說：「咦！乜你有戴眼鏡嘅咩？點解我唔知嘅？」未等對方回答，便二話不說拎對方眼鏡戴上自己頭上，然後嬌嗲地說：「哎吔！原來唔係近視眼鏡嚟㗎，咁可唔可以借俾我做頭箍呀，哈哈！」到正式埋位，導演原本要求二人鼻貼鼻，培養情緒，但記者卻見JJ忽然將嘴「哄」到羅面前，與對方嘴對嘴錫了一下。由於事出突然，現場所有人包括羅仲謙都呆了一下，導演即說：「未使錫嘴住呀！」雖然現場有人笑指JJ猴擒，但她卻以笑遮說：「咩呀，咁我聽唔到吖嘛！」當二人正式埋牙咀嘴時，本來三take，導演便收貨，但JJ卻以有頭髮遮面為由，主動叫導演「嚟多個」。
當JJ係阿嫂
JJ主動黐埋身，不過記者見羅仲謙每次拍完一個shot，都會擰轉身搵助手或者跳上保母車，鮮有與JJ交談。原來羅仲謙避忌事出有因，「好多人都知JJ同Sammy（沈震軒）拍拖，而謙仔又同Sammy係老死，所以同阿嫂拍嘢，佢都特別小心。不過唔知點解JJ特別鍾意黐謙仔，好似之前拍《飛虎》同《缺宅男女》，佢哋明明冇同場，JJ都試過幾次主動探謙仔班。我哋私底下問過謙仔，點知俾佢鬧，佢仲話『咪玩啦，阿嫂嚟㗎！』」身邊好友續說。對於JJ主動姣黐羅仲謙，記者嘗試致電楊怡，但至截稿前仍未回覆。至於羅仲謙，周二（12日）在電視城，卻認真地向記者表示：「我唔覺佢（JJ）好主動……唔好講到個個都鍾意我，總之我同佢只係好朋友。」謙謙咁緊張，楊怡姐姐應該好放心。
劉定成消瘦頭耷耷
羅仲謙甩難，不過因恐嚇男藝人而等候判刑的富商劉定成，上個月被法庭判入荔枝角收押所兩星期，原定周二（12日）判刑，但法官認為需時間考慮，決定將案件押後至周六上午判刑，劉定成要繼續還柙。辯方律師在周二求情，指62歲被告與92歲母親相依為命，此時劉定成聽到其母求情信內容，即時用手抹眼淚。記者當日到場聽審時，發現劉定成比前明顯消瘦，全程頭耷耷，比起入收押所前的意氣風發，天壤之別！ ####
咀上癮
原本三 take搞掂的kiss鏡頭，但JJ卻向導演主動要求加多take。
眼鏡調情
轉拍攝地點時，JJ邊行邊撩羅仲謙傾偈，更對男方戴眼鏡顯得十分感興趣。
當眾整Bra
等埋位時，JJ公然伸手入胸部整理胸墊，羅仲謙為避嫌，與其他工作人員即時擰歪面。
楊怡跟羅仲謙去年7月因合作《On Call 36小時》而撻着，近日二人被拍得在將軍澳楊怡香閨同居，姊弟戀正式浮面。《FACE》圖片
08年，羅仲謙和JJ首次合作《盛裝舞步愛作戰》，據知當時JJ已對剛冒起的謙仔十分嗒糖。《蘋果日報》圖片
JJ的男友沈震軒有「山寨版古天樂」之稱，兩人因拍旅遊特輯《上海闖蕩》而發展地下情兩年。早前沈捲入劉定成裸照風波，他亦是羅仲謙與劉公子之間的介紹人，與謙仔是多年老死。《壹週刊》圖片
留言列表
{{ article.title }}
