你同我醒定啲！（設計對白）
無綫重頭劇《金枝慾孽貳》大軍上周殺上橫店取景，身價暴升的蔡少芬，還山長水遠帶埋囡囡楚兒同行。據知湊女大過天的蔡少芬，在港時已經與對手葉翠翠有牙齒印，當時因葉甩髻NG而令蔡大發老脾，當場向導演戚其義投訴，事後葉翠翠就被cut戲份。
如今蔡少芬和葉翠翠又要在橫店碰頭，到埗第一日仍精神奕奕的翠翠，拍到與蔡少芬同場戲份時，忽然話病冧廠四日。
《金枝貳》女角鏡頭下勾心鬥角、波譎雲詭，好睇過做戲。
躁芬現形
《金枝慾孽貳》有蔡少芬助陣，本來生色不少，不過佢為湊女成日嗌收工，監製戚其義都買佢怕。早前更因葉翠翠遲到而大動肝火，估唔到去到橫店拍外景兩人繼續出陰招。
翠翠迴避
上周六（9日）《金枝貳》大隊在橫店拍外景第二日，當日早上要拍兩個散鏡的葉翠翠仍精神奕奕。點知翌日與蔡少芬拍同場戲份即請病假，更在微博呻病倒，認真耐人尋味。
向監製告狀
其實蔡少芬早年信教後，火爆性格已經盡量收斂。不過自從女兒出世後，其急躁個性又逐漸浮現。據知上月中，飾演奶媽阿頭的蔡少芬和飾演其頭馬的葉翠翠，在電視城拍攝一場宮廷戲。原定上午九時化妝，十時入廠，葉卻遲到半個鐘，髻未梳穩便匆匆趕入廠。誰知拍到中途，葉的頭上假髻忽然跌落地，惟有死死地氣返化妝間重新set頭，全廠人呆等一粒鐘。當她再入廠時，㷫到頭頂出煙的蔡少芬，當眾指着葉翠翠鬧。當日有份在場的人透露：「其實嗰日有好多人喺現場，Ada（蔡少芬）鬧完翠翠之後，仲即時call阿戚（監製戚其義）落嚟，一輪嘴講番成件事。阿戚就拉翠翠埋一邊細細聲講咗幾句。之後，葉翠翠埋位再拍，導演竟然全部一take過搞掂，仲早過平日收工。相信係驚遲收工再令Ada發難。」
橫店遭cut戲
兩女在港交過手，上周五（8日）齊齊上橫店，繼續暗地過招。據知，葉翠翠原定在橫店有十四場戲，並會在橫店拍三個禮拜。十四場戲中，幾乎全部都與蔡少芬有對手戲，不過直至上到橫店第一日，葉始知自己cut剩六場戲。慘遭cut戲份，葉翠翠索性向劇組連攞四日病假，匿埋在自己房中，就連陳豪萬歲請食飯當晚都冇現身。知情人士說：「翠翠點會唔知有人打佢毒針，但係阿戚錫邊個大家有眼睇，佢就算出聲都冇用。」翠翠冧廠，反益了蔡少芬，事關原定10號下晝二人有場對手戲，翠翠卻送了半日假大禮給仇家，令蔡少芬有時間帶囡囡楚兒行街街。周一（11日），記者就蔡葉兩人不和嘗試問蔡少芬，但她抿抿嘴說：「你哋作得啦，唔好阻住我陪個女呀！」蔡少芬心目中，女兒明顯重要過一切，與翠翠不和傳聞，似乎懶得去理。至於葉翠翠，由於一直留在房內，記者未能聯絡得上。
陳豪呻酒店冇冷氣
上橫店足足一個月，冇女友陳茵媺在身邊的陳豪，惟有搵生命中第二最愛陪自己。帶了足足20kg咖啡豆上橫店的他，講到明會包辦晒《金枝貳》幕前幕後的咖啡。還到五金舖買了一紮鐵線，返酒店自製通風設施（下圖）。陳豪飲咖啡講品味，但無綫所安排入住的酒店卻超求其。《金枝》劇組和演員今次入住橫店一間叫做「影星」的三星級酒店，雖則話三星，不過記者問過酒店職員，walk-in價300蚊人仔有找；至於TVB今次攞房，就只需140蚊人民幣。平唔緊要，最弊間房殘殘舊舊，牀單有「」味，連暖水壺都欠奉。陳豪大呻：「我間房個冷氣壞咗，想轉房但酒店話爆晒，我都喺樓下買咗把風扇。」橫店熱起上嚟三十度以上，日頭已經曬到成身汗，夜晚又冇冷氣，點瞓呀，靠害咩！
韋家雄私家菜全天候服侍
葉翠翠在《金枝貳》戲份大縮水，點知屋漏兼逢夜雨，去年曾狂追翠翠的韋家雄，今次竟然帶埋私家正菜上橫店，跟出跟入跟埋上酒店。雙重打擊，難怪翠翠病緊都要上微博喊苦。
獨生子今年19歲
唔少人都知韋家雄胞兄是著名導演韋家輝，對於韋家雄，卻少有提及。原來韋家雄早年結婚後離婚，兒子今年已19歲，睇外形，怕且新女年齡比兒子只大幾歲。除了拍劇，原來韋家雄亦有做LED燈生意，07年向旅發局成功投標幻彩詠香江。可惜其後與日本人合作投資高科技，選址福島，結果大地震後生意全軍覆沒。半世人生和感情同樣傳奇。
酒店齊出入
上周六（9日），韋家雄帶埋新女到片場拍戲。現場所見，新女整日粒聲唔出坐在韋家雄身邊玩電話，男去邊女就跟去邊。當韋家雄準備埋位時，她即細心地為他撥好頭髮。至於同場的葉翠翠，每當二人經過時，都刻意擰歪面或耷低頭，盡量避開眼神接觸。據知，韋家雄和女友是早前在網上結識的，認識不久便打得火熱。今次拍劇，女友更從香港飛到橫店陪足男友成個月。知情人透露：「韋家雄鍾意寫微博， 其實同追翠翠一樣，寫咗好多歌詞俾呢個女仔，翠翠唔受，不過呢個女仔冧到暈。」除了在片場做連體嬰，周日（10日）早上，本刊更發現韋家雄和女友雙雙步出酒店，實行寓工作於拍拖。周二（12日），記者就帶女開工一事訪問韋家雄，他即煞有介事說：「吓，唔好話我帶女開工啦，佢好女仔嚟㗎，（你女友好靚女喎？）好朋友嚟咋。（佢專登喺香港過嚟陪你？）唔好咁講啦，我哋好朋友嚟！……你哋依家唔寫我同翠翠啦咩？不過佢都拒絕咗我啦！」大有示威味道，難怪翠翠鬱到病囉！
孖住出酒店
韋家雄與氣質港女出雙入對，本刊發現兩人下榻同一酒店，不過當知道有記者在場探班，韋即收埋女友，冇再帶出片場。
到達橫店第一日，眾演員外出用膳，葉翠翠開遮諗住遮埋韋家雄，但遭男方拒絕好意。原來家雄已另結新歡。同日翠翠在微博大呻有人對自己的愛今非昔比。 ####
推女行街周日（10日）蔡少芬本來全日要開工，但對手葉翠翠請病假。難得多了半日假，佢唔想屈喺酒店，便與保母及囡囡楚兒外出食午飯兼逛街。
三五成群打波葉翠翠上周六早上拍完兩場戲，下午即相約曹永廉、龔嘉欣等人去體育館打羽毛球。現場所見，翠翠打到身水身汗好落力，又病得幾精神喎。
搵阿戚密斟蔡少芬與監製戚其義係老死，有乜唔滿意會即時拉住阿戚密斟。上次投訴完葉翠翠，對方即被cut戲。難怪其他演員都怕佢三分啦！
話晒事蔡少芬聲大大仲惡過監製阿戚，這天與龔嘉欣拍場喊戲，NG三次。當阿戚睇playback時，想再拍多take，卻遭身後蔡少芬拒絕：「唔使啦！ok啦！」全世界都知佢趕住收工囉！
殘舊三星級酒店陳豪和劇組所住的酒店，連雪櫃、暖水壺都冇，演員要在此住足一個月，辛苦過拍劇。
早前被指狂追葉翠翠的韋家雄，今次上橫店竟然有美相伴。該名氣質港女在外景場地服侍周到，見韋家雄頭髮亂了即出手整理，完全係美女與野獸的組合。
韋家雄和新女在片場卿卿我我，見到眼寃的葉翠翠，每當韋家雄女友經過時，都刻意耷低頭。
留言列表
{{ article.title }}
