27歲嘅安德魯加菲，憑《社交網絡》為人熟知，新《蜘蛛俠》上映後，應該更加炙手可熱。所以電影公司未有死錯人，一早mark實佢開拍續集，費事佢開天索價。
來路貨 《心戰》宣傳片啱啱上，恒指已經開始跌。丁蟹效應沒完沒了，另一效應正蠢蠢欲動。講緊嘅係《蜘蛛俠：驚世現新》。電影最近發布新劇照，奸角「蜥蜴人」正式現身。各位唔鍾意重口味怪物亦無妨，大大個靚仔「蜘蛛俠」喺隔籬，笠面具亦得，唔笠亦得，得咗。

 
《蜘蛛俠》已經拍過3集，仲驚咩世咩現咩新呀？留意，大相位仁兄係唔同咗樣㗎，前任「蜘蛛俠」叫杜比麥奎爾（Tobey Maguire），今次呢位，記住，叫安德魯加菲（Andrew Garfield），往後幾年大家一定會再見到佢。

 

蜘蛛父有秘密
今次《蜘蛛俠：驚世現新》（香港7月3日上映 ）除咗主角唔同咗，故事亦reset去番「蜘蛛俠」啱啱擁有神力嘅高中年代。猶記得舊版本之中，「蜘蛛俠」蠢蠢鈍鈍，硬膠到暈。今次蠢仔突變醒仔，「蜘蛛俠」嘅噴絲裝置不但由佢親自發明，佢仲無有識死，主動追校花㖭。雖然詳細劇情有待公布，不過焦點將會追溯「蜘蛛俠」嘅父母，由亡父遺留嘅公事包揭開「蜘蛛俠」嘅驚天秘密。

蜥蜴人變錯身
另一焦點，當然就係大奸角「蜥蜴人」。「蜥蜴人」係科學家，本身有殘疾，為修補殘肢，一直進行另類研究。點知中途實驗出錯，變成核突「蜥蜴人」，戰鬥力甚至速度均媲美「蜘蛛俠」，既識飛簷走壁，亦有再生能力唔怕受傷。最重要昂藏9呎夠大隻嘛。須知道市場對肌男幾大需求㗎啦，唔打得都影得，劉公子應該會好buy。 ####  


「蜘蛛俠」自細父母雙亡，俾叔嬸湊大，叔嬸分別由老戲骨馬田辛、莎莉菲飾演。


安德魯為表現蜘蛛俠嘅靈活性，進行4個月特訓，並學習瑜伽鬆筋。踢腿動作，easy job。


舊版《蜘蛛俠》由杜比麥奎爾飾演。電影公司本打算原班人馬開拍第4集，不過因意見分歧開唔成。後來電影公司決定重新開拍新版本《蜘蛛俠》，杜比正式退休。


新版「蜘蛛俠」嘅戰衣設計得比以往修長，咁又難怪，新「蜘蛛俠」6呎高，比舊版高成3吋咁多，絕對有權利去修長。


以往《蜘蛛俠》都係以電腦特技幫手，尤其舊「蜘蛛俠」杜比麥奎爾傷過條腰，粗重嘢唔做得。不過新版安德魯膽正命平，大部分動作親自上陣。


「蜥蜴人」嘅本質同「變形俠醫」有小小相似。只要發嬲或受壓就會變身，不受控制攻擊人。


英國二線演員Rhys Ifans飾演奸角「蜥蜴人」。「蜥蜴人」原本係醫生，於戰地救人時喪失右手，後來轉做科學家，致力研究再生功能修補右手。


由於「蜥蜴人」高9呎，演員先要着上特製衫，戴上假頭假爪後，再以電腦特技修飾。


新「蜘蛛俠」女友叫Gwen Stacy，喺舊版第三集出現過。如今角色由當紮小花愛瑪史東飾演，佢更同安德魯戲假情真撻着咗。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄