小特搜 咁多期手袋、電話都俾媽咪姐「搜」過，仲有乜嘢係藝人隨身帶備呢？鎖匙都好貼身喇啩！
媽咪姐行勻成個將軍澳電視城，發現男藝人最愛方便，鎖匙一條起兩條止，而女藝人就比較花巧，鎖匙連公仔匙扣一大揪。
楊思琦繼續以慳字行頭，隨身嘅bling bling金魚鎖匙扣係朋友送嘅！依家囡囡大過天，佢寧願儲多啲錢做囡囡教育基金，好過嘥錢買無聊嘢喎！

 

思琦金魚一條
做咗人阿媽嘅楊思琦仲係大細路，身上帶住一條屋企鎖匙加埋好可愛嘅大眼金魚匙扣，佢話：「匙扣係朋友送㗎，我好鍾意金魚對眼，又大又有神，好似我個baby咁， 係咪好得意呢？」

鄧紫棋最大揪
阿G.E.M.細細粒，但出街孭好大個背囊，最嚇人都係揪鎖匙，「哈哈，我特登㗎！因為我好大頭蝦，成日唔見嘢，擺多幾條鎖匙落去，就算俾賊佬偷咗，佢都唔知邊條鎖匙至啱啦！」唔係嘛， 咁做似搞着自己多啲！

諸葛紫岐多匙少奶奶
Neway二少奶諸葛紫岐換咗新形象，不過喜好無變，心愛嘅麵包超人與家中鎖匙緊扣。「我揪鎖匙有麵包超人八達通外，仲有我個名嘅鎖匙扣。屋企門要用兩條鎖匙，其餘嘅係房門或者保險箱鎖匙。總之身家、性命、財產都喺晒度啦！」

溫家偉鎖匙攝銀包
大隻仔溫家偉呢排拍住蘇民峰做飲食節目《食得峰騷》，都幾hit㗎！問佢有冇鎖匙喺身，佢話：「我就咁將條鎖匙攝喺銀包咋！(咁你唔見銀包咪返唔到屋企？）係喎！咁我小心啲先！」

黃百鳴簡便匙扣
電影大老闆黃百鳴話自己好怕煩，所以鎖匙有咁輕便得咁輕便。「因為鎖匙放喺褲袋，太大嚿會凸起嘛，所以就咁一個圈咪得囉，幾方便！」

黃柏高玩電筒
每次見Paco都係笑笑口，今次媽咪姐叫佢拎揪鎖匙嚟睇吓，佢竟然面有難色。多番游說下終於肯俾我哋睇。原來佢係用一個雷射電筒仔做鎖匙扣，即係平日喺演唱會上面見到fans玩嗰款。都幾得意吖，做乜咁尷尬喎！ ####


 



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄