你憑咩收貴過我？（設計對白）我不嬲食住你！（設計對白）葉、陳二人上月初首度碰頭會見傳媒，大會一早安排姚珏夾在中間，不過記者提到「不和」二字時，陳便立即連環發炮說：「好吖！係好好嘅宣傳！」搞到身旁的葉麗儀和姚珏面有難色，十分尷尬。
葉麗儀與陳潔靈將聯同國寶級小提琴家姚珏，月中會展開騷。三人早前更上電視表演，熱身兼宣傳。表面老友，但葉麗儀和陳潔靈兩位巨肺，除了唱功了得外，爭鬥功力同樣深厚。近年憑巨聲幫評判而鹹魚翻生的陳潔靈，今次俾面主辦商，收友情價25萬歌酬。但歌酬落袋後，她才發現主辦商竟然以48萬利誘葉麗儀再開金口。歌酬差近一倍， 陳潔靈條氣當然唔順，故講明有佢冇我，甚至海報都分開拍，唔妥到出面。

 
今次演唱會涉及慈善性質， 部分門券收益將會全數捐給香港防癌會，一向爽快的陳潔靈跟主辦商冇講價便扑槌。知情人士說：「Miss Chan Chan（陳潔靈）做咗《超級巨聲》評判後個勢好咗，加上佢嘅資歷，收40萬一場好合理。呢次收25萬都算賣大包。」

 

海報各有各拍
陳潔靈簽約後不久， 發現自己的歌酬竟比葉麗儀的48萬相差近一倍，立即向主辦商詐型。「開一場演唱會又要綵排，又要宣傳，真係好辛苦。Frances（葉之洋名）今年都64歲，加上佢之前病過（曾患乳癌），主辦商落咗好多嘴頭先叫得郁Frances由澳洲特登返港。不過兩人歌酬差一大截，Miss Chan Chan咪發晦氣話有佢冇我囉。Frances都知佢為歌酬而不滿， 但錢都收咗，唔通拎番出嚟咩！」知情人士說。據知早前主辦商叫三人度期拍演唱會海報，陳潔靈和葉麗儀始終唔肯互相遷就檔期，搞到最終各有各拍，再用電腦合成。

各自出動歌衫
「有你冇我」這招始終未能平息陳潔靈心頭怒火，於是她繼續發功，除孤立葉麗儀，和姚珏孖住為報章雜誌訪問做宣傳，讓焦點集中於她身上外，更要求製作單位改動演唱會流程，令她的出場次數較多，縮減葉麗儀的演出時間。而歌衫方面，陳潔靈亦決定睇實葉麗儀來砌。知情人士說：「原本佢哋要開會傾吓啲衫嘅tone，但Miss Chan Chan話冇時間，仲叫Frances拎啲衫出嚟睇吓先。Miss Chan Chan咁做，梗係想睇吓Frances今次有咩衫， 自己再設計一批搶鏡過佢嘅歌衫啦！」二人暗戰多月，上月初在主辦商再三要求下，終於肯一齊出現，為演唱會做宣傳。記者向兩位當事人求證有否為歌酬不和時，陳潔靈便先發制人說：「吓！話我哋不和？好吖！係好好嘅宣傳。」旁邊的葉麗儀則充耳不聞，此時陳再搶說：「都係唔好喇！咁負面！」葉聽罷即打圓場：「冇呀！我哋合作得好開心吖！」提到海報分開拍，陳直認不諱：「哦！張海報嘅相……係用我哋各自嘅相去整。」之後又補充說：「但係用同一化妝師、攝影師同髮型師㗎！」至於主辦商豐收製作公司主席李先生則說：「係時間未配合到啫！遲啲我哋可能拍過張新嘅。」兩女為錢割席，看來要再夾時間影相，真的只怕不再遇上。

Diva之華麗背後
葉麗儀和陳潔靈兩位曾是七、八十年代的天后級人馬，不過華麗背後，二人也經歷過不少波折。

乳癌加上抑鬱
感情 　葉麗儀70年曾結婚並育有一子， 77年離婚。之後她與曾在國泰航空任職宣傳部的英國人David再婚。
健康 　葉96年患上乳癌，同時亦因更年期而患上抑鬱症，足足花了十年才能戰勝癌魔。
歌酬 　靠《上海灘》一曲撈足多年的葉，歌酬有升冇跌，去年「造紙大王」李運強之子李文恩就以8萬請到葉麗儀為其婚宴唱一首歌。
物業　現時和丈夫居住的擎天半島，是03年沙士時以六百萬買入，現市值已升近千七萬。閒時更和老公返澳洲度假享受人生。

丈夫肺癌離世
感情　95年陳潔靈和與「演唱會之父」同名同姓的張耀榮結婚，並未育有子女。
健康　吸煙多年的陳潔靈身體十分健康， 相反其丈夫09年因肺癌病逝，陳傷心欲絕。
歌酬　她亦開始轉型教唱歌，容祖兒、謝安琪等也是她的徒弟，平時亦會演出商業活動， 一場歌酬近30萬。
物業　現時她居於沙田花園的千呎單位，市值六百萬。 ####

 


拒坐隔籬其實陳潔靈起初不肯坐近葉麗儀，最後要勞煩主辦商高層（紅衣者）出力拉攏，陳才應承坐在姚珏隔籬，一同接受訪問。


上台面左上月中， 葉麗儀、陳潔靈和姚珏為無綫的《萬眾同心公益金》擔任表演嘉賓，記者發現葉、陳二人上台準備時，幾乎冇乜兩句，二人更經常用背脊「得」住對方。


行快一步演唱完畢，二人即還原真面目，互不瞅睬地返回化妝間。陳潔靈更急急腳，希望撇甩緊隨其後的葉麗儀，二人直至發現記者才笑笑口扮冇嘢。


分體海報兩位阿姐不咬弦，令演唱會海報無法齊人拍攝， 難怪姚珏和陳潔靈的形象比較有現代感，而葉麗儀的髮型姿勢就顯得老土，完全唔match。


葉麗儀、陳潔靈和肥媽09年曾在紅館開騷，當時葉、陳未有不和，經常在台上拖手。記者亦有致電給肥媽了解，但截稿前仍未回覆。


葉麗儀和陳潔靈二人在七十年代節目《聲寶之夜》認識，不過後來因葉到英國發展，所以和陳並冇聯絡。二人直至03年的《麗花皇宮》舞台劇，才有較多時間接觸。


《蘋果日報》圖片

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄