陳法拉“我只想做葉德嫻”

 

訪問中段，明明心平氣和的陳法拉，突然扯火，「出面話我戲屎寫衰我，係咪要有一日，一個奧斯卡獎座放喺度，大家（記者）至肯收聲？」成都出生美國留學，拎過華裔小姐亞軍，兩度拿TVB最佳女配角，卻屢被傳媒狠批，法拉深信，可以「技術」擊倒流言，是故，夢想攀上奧斯卡，也可理解吧！話口未完，又轉口吻。女人善變，我又再次領教到。「但人生唔係為獎座；「我只想做葉德嫻，遇到好作品。」我只想講，65歲的柏林影后回港當日，傳媒一樣冇留手，奉上「怪異生活」四字封面贈興，桃姐依然不慍不火。這世界沒有懷才不遇，被傳媒逼得太緊的法拉，放鬆啲啦！

Profile 　
陳法拉 Fala Chen 出生日期：1982年2月24日（雙魚座）出生城市：四川成都身高：5呎7吋體重：103磅三圍：34-24-34 語言：普通話、四川話、廣東話、英語及日語。學歷：美國Emory University商學院工商管理學士簡歷：97年，移民美國。02年，參選全美亞裔小姐，獲得冠軍。05年，參選國際華裔小姐，獲得亞軍。07年，憑《舞動全城》獲得最佳女配角。11年，再憑《巾幗梟雄之義海豪情》奪獎。代表作品：電視劇《溏心風暴》（07），《蒲松齡》（10），《潛行狙擊》（11），《東西宮略》（12）。電影《Laughing Gor之變節》（09），《72家租客》（10），《我愛HK開心萬歲》（11）。微博：http://www.weibo.com/chenfala

“我唔係偶像” 　
訪問出街之日，法拉剛好30歲，女人三十…… 「唔好提歲數！「我唔再係青春偶像，踏入人生第二階段，事業要更上一層樓。」溫柔外表，原來好大志氣。選美出身，年齡是公開秘密，慨嘆自己23歲入行，起步太遲，「好彩呢幾年追番好多！」追番的定義，包括一而再獲獎最佳女配角，得到自己公司肯定，去年，更「升呢」擔正。終於，不再局限做一個宅男女神了。「做新人，冇壓力，乜都可以發生，拋個身出去做，唔夠好，咪下一套囉！「識反應，唔怯場，做到ABCDE 5種喊，大家已覺得呢個新人勁呀！「拍《蒲松齡》開始，明白到原來喊戲都有好深學問。」最近，跟郭晉安合作，一場感情戲，他倆拍足一個晏晝，安仔耐心跟她試戲兼評分，由70分到90分，試到好為止。「我唔相信一套戲會進步過一套，經驗要當下累積，唔可能等下一部戲，由頭再試過再練過。」心急上位，正是她所謂「遲入行」的條件反射。刻下，心態調整適時，就連語言，也有十足把握，「唔使再每個字問人。」所欠的，大抵就只有演技的磨練了。

“讀書唔使錢” 　
移民美國前，成都生活，男仔頭性格，愛玩也愛刺激，「細個鍾意唔著鞋周街跑。「小學時，好鬼曳，我係女版柯震東，成日都唔知自己做緊乜？屋企話，女仔讀書要叻…… 「嗰陣時，我唔明，點解考親試都要限時寫上答案？我唔想咁做，連名都唔寫就交白卷，結果，被老豆打爆。」舉家移民亞特蘭大之後，突然生性，「美國教育system好，主張你自己學，揀major計學分，達到某個成績就有獎學金，全部自己plan。「入間好大學，讀書氣氛濃，順便幫教授打工，幾蚊美金一粒鐘，加埋學校及州際區獎學金，基本上，我讀書唔使錢，學期完，仲有剩錢去買衫。」一年暑假，她到日本做交換生，被當地雜誌邀做模特兒，回美後，趁周末空檔飛往東京，半工讀，咁辛苦，純為興趣與貪玩。好一副唔憂唔志在口吻，「屋企冇經濟壓力，係我自己enjoy。」當事人口中的前半生，順利得有點平淡，莫講話惹同性妒忌，連我堂堂大男人，也恨得牙癢癢！

“要風光出嫁” 　
本以為，精打細算的法拉，對投資梗有一手，怎知，香港樓價過去幾年升到澎澎聲， 她卻說沒撈過「高地價」快錢。「香港樓真係買唔起，同一個價錢，美國可以買成幢。」法拉坦言，從小到大，甚麼都不缺，唯一缺失，就是生於內地，一孩政策之下，少了手足情。「不嬲都想有個阿哥。「我喺屋企，擔任長子角色，乜都有我份，搵我商量，搬屋、揀車買車，全部我做，如果有個阿哥分擔吓，照顧吓就好。」快啲嫁俾男友，咪可以有倚靠囉？ 「婚姻係一世人commitment。「我父母係一見鍾情，初戀情人到老公老婆都係同一個人……結婚係我生命中最重要事情，我都向緊呢一日進發，希望大家快啲見到我幸幸福福、風風光光出嫁。」為保事業，婚事三緘其口，恕我膚淺，傳聞法拉已有四萬呎大屋在手，「大少奶」身份只待當事人親口say yes而已；四萬呎喎！咁風光，又點會唔幸福呢？

Fala's tips
　
Q：護膚之道？
A：防曬最重要，一曬親，天生麗質都死，每日塗防曬foundation，落妝後，即敷美白mask。

Q：邊一類衫，一定唔著？
A：好誇張或只興一季嘅衫，我都唔會買，classic永遠最穩陣。

後記　
關於出唱片，樓梯響足幾年，法拉說，早已錄了三首歌，那麼，何不效法Eason和祖兒，出住EP先？「都唔知仲有冇機會出碟！」學琴十年的她，諗住試吓寫譜作曲，點知又換來冷水一盆，「公司話：『你識寫譜都冇人識睇！』叫我拎住個電話lalala幾句就得，原來係咁，我都唔知……」你可以話佢寸，但我覺得悲哀的，是最正宗的方法反而不合時宜；終於明白，點解Canto Pop咁難發圍了。

Shop List 　
Dior 中環置地廣場G41-43號鋪 2524 8266 Lanvin 中環國際金融中心2043號鋪 2234 7323 Louis Vuitton 中環置地廣場地下 8100 1182 Maria Luisa 銅鑼灣利園 I期211號鋪 2907 2028 Moschino 中環置地廣場201-202號鋪 2525 4706 Rupert Sanderson 中環安蘭街8號地下 2530 3391 ####


Fala Chen 米黃色絲質併喱士連身長裙（未定價）Moschino 銀色啷啷手鈪 $9,650 白色樹脂纖維綴窩釘手鈪 $22,000 both Louis Vuitton


83年法拉坦言父親對其影響最大，好多決定都要問準阿爸。


86年阿爸陳鳳聲係音樂家，耳濡目染下，自細已識彈鋼琴。


05年參選華姐前，法拉（右）去過日本做《JJ》雜誌model，三點式法拉，應該冇機會再見到。


05年當年華姐輸了給李亞男，但發展卻標青很多。《蘋果日報》圖片


11年再次獲得「最佳女配角」，法拉話，對自己要求愈來愈高。《蘋果日報》圖片


11年跟男友薛世恆感情穩定，旁人睇，未嫁都等如嫁咗！


11年新劇鍾無艷上身，紅色胎記原來是由法拉度橋，「想特別啲，不如用齊國地圖！」


Fala Chen 粉綠色併喱士雪紡長裙 $100,000 銀色手鈪 $6,100 both Dior


Fala Chen 紅色see-through百摺連身裙（連腰帶）$74,000 金色手鈪 $6,100 both Dior


Fala Chen 粉藍色水晶紗併laser cut底裙（未定價）水晶頭箍 $8,400 both Louis Vuitton 裸色露趾高踭鞋 $7,580 Rupert Sanderson

arrow
arrow
    文章標籤
    法拉 fala chen both 置地 配角 vuitton louis dior rupert
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stinglife 發表在 痞客邦 留言(0) 人氣()

    E-mail轉寄