何超儀 “我成世發歌星夢” Me! 週刊 267期－娛樂八掛大放送★

何超儀被傳媒封為躁底烈女，事出必有因，身處「群雌割據」大家庭晚晚萬凰之王上演，家姐（何超瓊）又對呢個么妹愛之深責之切，不時動口再動手，難怪，Rock 'n' Roll在她心中never die！
事實上，Josie無心家族事業，「我成世人都發歌星夢……
「當年，李宗盛叫我去滾石，即刻飯應呀！」
家族光環箍得她唞不過氣來，「美國節目《Keeping Up with the Kardashians》（名媛望族真人騷）都冇動作場面，我屋企勁好多！將古仔賣俾佢哋，叫《Mad Ho's》，仲精采。」字字入心入肺。
曾經羨慕子聰山聰的我，終於明白，人生在世，做個普通人，才最好。

　
Profile
　
Josie Ho
出生日期：1974年12月26日（山羊座）
出生地：香港
身高：5呎3吋
體重：98磅
語言：廣東話、普通話及英語。
簡歷：94年，在台灣出唱片，再回流香港。03年，憑電影《豪情》奪香港電影金像獎最佳女配角，同年11月，與模特兒陳子聰在澳洲結婚。11年，成立電影公司+852。
主要作品：電影《青春火花》（94），《豪情》（03），《蝴蝶》（04），《維多利亞壹號》（10）。唱片《造反》（94），《地獄廚房》（06），《天眼》（11）。舞台劇《戀戀瓊瑤》（98），《情話紫釵》（11）。
微博：http://weibo.com/josieho

　尊嚴鎖入櫃啦！　
兩年前，跟老公陳子聰成立電影公司，兩夫妻終得爸爸首肯揼本，全靠何超瓊幫口，姊妹情深，不是一朝一夕，豪門版本更加得來不易，而這位大家姐，深信「棒下出孝女」的家法，打者愛也，Josie直到依家咁大個人，仍忘不了呀！「家姐從來都冇面俾。「我只係做咗啲蠢事，講咗幾句冇乜睇頭說話，宴會上，當住70幾人面前，佢一樣捉住我勁鬧…… 「自細就知，尊嚴係要放低，否則，做人好唔開心！「最勁一次，18歲某個星期日，一家人去半島飲完茶，爸爸興致勃勃想去樓下珠寶店買件『小禮物』俾我哋幾姐妹，當年，我迷緊Madonna梅艷芳，根本唔鍾意lady打扮，入到鋪頭，乜都睇唔上眼，仲講：『慳番啲錢好過啦！』阿爸聽到有啲唔高興，最衰成件事由大家姐安排，佢勁嬲，鬧我『戇居！』再啪一聲一巴車埋嚟…… 「（你有冇喊？）我4歲後就冇再喊過，你俾錢我咪喊囉！「一早諗通，尊嚴，鎖入櫃啦！「（冇嬲家姐？）又唔係所有細路都好似我咁唔聽話嘅！你鬧得啱，我會聽兼反省。「何況，太重尊嚴令人有約束，做人好食古不化。」

　爸爸叫我選澳姐　
既然家中有一個「明事理」細妹，身為大家姐，點都要無條件支持對方事業打拼，Josie能夠圓歌星夢，何超瓊居功不少。但，某些事情，始終要靠自己去面對，正如娛樂圈發展多年，成績強差人意，佢又睇得開嗎？「爸爸叫過我參加澳門小姐，嗰陣我5呎3吋成130磅喎！咁醜點參加？！但佢老人家成世人冇要求過我做啲乜，又點可以托手踭？家姐知道，反sell我唱歌，原本維珍唱片想搵我，簽約前，賣咗俾EMI，不了了之。「好彩，遇上李宗盛，去到台灣，佢嫌我個名棘手，當時覺得，梅艷芳都用真名啦！『何超儀』唔係好娘啫！依家至諗通，係喎！我族譜究竟有幾多個何超乜？佢出錢捧新人，梗係唔可能容許成十個人都係一個名，仲得了？「最後，出咗一隻碟，返香港簽華星，再出兩三隻，踏入事業低潮期。「好唔開心，覺得玩完啦！自己一啲才華都冇，唔會再有人請你，個心好灰！有種唞唔到氣感覺，直至識咗一班朋友帶我學滑浪，日日晨早六點租艇出海，望住海闊天空，慢慢捱過呢關，佢哋就係LMF同我老公。」

　蘭桂坊步驚雲　
當年，陳子聰這一個被外界笑為「嫁入」豪門的大男孩，跟一個在娛樂圈打滾唔使憂的有錢女，均經常被人拿作茶餘飯後的話題，某程度上，屬於同一個situation…… 「係囉！大家淨係掛住睇佢娶個有錢女，完全忽略佢其實係一個好有智慧嘅男人。「佢識好多嘢，電影、音樂、歷史、宗教，上至天文下至地理，無所不通，連古典音樂都識，我好鬼祟拜佢。「（冇向你呻過傳媒咁睇佢？）大家夾band，唔會諗無謂嘢！「第一次見佢，幫梅艷芳拍MV，覺得佢好乸！之後，幾乎每晚都喺蘭桂坊撞到佢，醉到擘大個髀，成個蘭桂坊步驚雲咁款！「（咁你又接受佢？）我追佢㗎！搵阿徐做媒人，事緣有一次大家坐低飲嘢傾過偈，對佢改晒觀啦！「陳子聰feel到，之後拖咗我好耐（夠膽拖你？）你估我真係大晒咩？我身份會令佢驚嘛！「依家，老夫老妻，明白兩個人相處，事事要忍讓，我唔忍、佢忍，互相遷就，要將對方缺點當優點去愛，佢已經接受晒我啲缺點，仲話自己最怕女仔太過feminine。」

　 Josie's tips 　
Q：護膚大忌？ A：我對蝦蟹貝殼類食物敏感，盡量戒口，另外，要揀啱自己護膚品，一敏感就轉牌子。 Q：最唔得邊一類衣衫？ A：雞翼袖。我手臂好有肉，穿冇袖衫好似Popeye㗎！

　後記　
我們都有偏見，認為有錢人，無憂。「入行以來，何超儀每次接工作，例必收取酬勞，好均真；我想知外面offer自己幾多？自己值幾多？」這不是錢的問題，是個人價值的問題。撫心自問，我們都是凡人，都想得到別人肯定，哪管你身家多與少？所以話，自信心和出身，有時候未必成正比！

　 Shop List : 　
Emilio Pucci 金鐘太古廣場363號鋪 2918 4698 Holly Lai holly_8d@hotmail.com Lane Crawford 中環國際金融中心3樓 2118 3376 Magenta 銅鑼灣名店坊F10號鋪 2972 2029 Roberto Cavalli 中環國際金融中心2038號鋪 2234 7621 The Swank 中環置地廣場312-314號鋪 2868 6990 ####

Josie Ho
銀白色絲質流蘇背心裙 $5,300 Alexander Wang
黑色併灰色針織冷衫 $10,900 Lemoine Tricote
both from Lane Crawford