雖然聲帶有事，但 Eason依然日日照開工，上週二（ 26/4）他由司機接送，到觀塘駿業街一工業大廈開工。
唱到生繭
拒停工收聲半年　陳奕迅唔肯做手術
2011年05月05日
紅人陳奕迅，過去兩年密做密搵，一年累積唱騷幾十場，終於捱到聲帶勞損。據知 Eason的聲帶生了兩個繭，情況更日趨嚴重，雖然醫生建議做手術，不過擔起成頭家的 Eason，一來擔心手術有後遺症及不願停工休息半年，始終不肯開刀，只接受藥物治療，孭住計時炸彈， Eason三思！
病情惡化
上月在成都開演唱會的陳奕迅，自稱帶病上陣，要食住感冒藥唱騷，十分辛苦。事實上， Eason的病情遠比其口中的感冒嚴重，近一年來，他的聲帶持續出現問題。
「其實由舊年演唱會開始， Eason已經出現演出失準，好多時都力不從心，佢都好，睇過幾個專科醫生，都話佢係聲帶勞損，仲起咗兩個繭，單靠食藥，病情時好時壞，最近情況仲差咗，醫生建議佢做手術，如果唔係，隨時有失聲可能！」 Eason身邊好友說。
長時間無充足休息，亦是 Eason聲帶惡化的主因。
「做完香港演唱會之後， Eason跟住不停做海外巡迴，加埋好多唔同性質嘅演出，根本無機會俾把聲休息，有幾次嘅演出，佢唱到高音位都有唔順嘅情況出現，搞到佢好唔開心。」


08年售出嘉崙台後， Eason便以 20萬租住大鵬閣，近日再度加碼，以 30萬月租搬往李嘉欣許晉亨都住的曉廬。
 
一家之主的 Eason除了照顧妻女，更是幾頭家的支柱。

轉睇中醫
今年一月， Eason到台灣小巨蛋開了兩場演唱會，跟住再到高雄開騷，據了解，當時 Eason亦因為自己不在最佳狀態，顯得相當緊張，身邊好友亦不停向他介紹醫生。
「睇過幾個醫生，大家同一口徑話要做手術先可以完全康復，但佢唔想開刀，呢排佢仲轉睇中醫，食咗中藥之後，情況確係有啲幫助。」知情者說。
聲帶手術本不屬於大手術，不過，由於聲帶控制聲線同發音，手術後，頭一個月完全不能說話，之後亦要重新練習咬字發音，對無停口的 Eason，要他收聲確有難度。
「又難怪 Eason有咁多顧慮，除咗手術之後要休息半年，更重要係做完呢種聲帶手術把聲會有啲轉變，基本上會比以前更清晰，但無嘢係百分百有保證。」


Eason四月到成都開演唱會，還自爆要食住藥演出。
 
張學友亦曾試過聲帶出問題，近月學友舉行演唱會，亦要每唱五場休息三日養聲。

未必續約
將於今年九月約滿環球的 Eason，近期亦以聲帶有事為由，婉拒跟公司續約。
「雖然環球講明可以俾時間佢休息，但 Eason嗰邊就覺得應該先控制好個病情，唔想諗續約住，依家兩方面都拉緊鋸！」知情者說。


環球總經理黃劍濤努力游說九月約滿的 Eason留低，但 Eason卻以聲帶有事要休息為由，未必續約。
 
王菲、 Eason都是陳家瑛手上王牌，一個密做，一個重槌出擊，但兩人都是印銀紙機。
 
E神嫂除了搞個人時裝品牌，亦不時出席賺錢活動，唔再齋使老公錢。
 
Eason阿徐都是潮人，每月的衣著開支費用驚人。

唱勻全球
Eason去年 3月做完香港演唱會後，開始密密做巡迴演唱搏命銀，一年之內共做了 35場，唱勻世界各地，進賬過三千萬。

演唱日/場地/收入
10年 3月：香港 18場/$1,440萬
10年 4月：北京站/$120萬
10年 5月：歐洲站× 3場/$240萬
10年 9月：廣州、新加坡/$200萬
10年 10月：悉尼、墨爾本/$160萬
10年 12月：澳門、溫哥華、多倫多、拉斯維加斯、舊金山/$510萬
11年 2月：台北× 2場、高雄/$450萬
11年 4月：成都/$100萬
家庭重擔
Eason雖然賺錢能力驚人，但作為一家之主，擔起成頭家，除了養老婆、女兒外，仲要支付患肝癌老豆的醫藥費，一闊三大，每月使費閒閒地 80萬。

租金： 30萬
女兒學費、興趣班費： 5萬
父親開支： 10萬
外家家用： 5萬
水電雜費： 1萬
老婆時裝店開支： 5萬
一家三口買衫消費： 20萬
生活費： 6萬
每月合共： 82萬

陳奕迅聲帶勞損長繭 拒做手術停工休息半年
紅人陳奕迅，過去兩年拼命賺錢，一年累積開十幾場演唱會，終于挨到聲帶勞損。

據知陳奕迅的聲帶生了兩個繭，情況更日趨嚴重，雖然醫生提議做手術，不過賺錢養全家的陳奕迅，一來擔心手術有後遺症及不願停工休息半年，始終不肯開刀，只接受藥物治療，背著個定時炸彈，陳奕迅請三思！

arrow
arrow
    全站熱搜

    stinglife 發表在 痞客邦 留言(0) 人氣()

    E-mail轉寄