娛樂八掛大放送★

05年港姐季軍林莉，去年被指有內地金融富豪W君大水喉射住，即時由住屋邨進駐大埔比華利山豪宅，出入有200萬馬莎拉蒂接送，一粒鐘豪掃60萬名牌，富商男友仲揼本開咗間「VIP經理人公司」捧佢，錫佢錫到燶。
只可惜林莉嘅富貴生活過咗唔夠一年就打回原形。據知兩個月前她與富商男友感情轉淡分手，豪宅靚車冇得再享用，闊太生活幻滅。林莉現時租住8千蚊深井5百呎單位，出入都係搭的士。林莉唔想人財兩空，即時翻撻前男友兼經理人Bolie（黃偉雄），不過Bolie冇米又爛蒲，難怪林莉要節衣縮食，捱麵包醫肚。

林莉08年為 I-Sky Beauty（天行醫學美容中心）做代言人，認識了開設廣告公司（只佔股份一成）的Bolie（黃偉雄），兩人一拍即合，未幾便打得火熱。拍拖一年後，林莉見Bolie廣告公司生意不景，加上男友生性花弗，經常夜蒲，於是忍痛分手。之後林莉認識了內地的金融富豪W君，W君又承諾出錢開公司力捧她。林莉眼見前男友Bolie經濟有困難，即推薦他做自己經理人。09年Bolie成立「VIP經理人公司」，旗下只有林莉一位藝人。

藕斷絲連
據知情人士透露：「W君叫林莉搵人出面做經理人公司老闆，林莉即時諗起前男友，因為佢仲好鍾意Bolie，於是益佢！W君一直唔知佢哋拍過拖，兩個月前先發現林莉同Bolie嘅關係唔簡單，再加上W君同林莉相隔兩地聚少離多，玩厭咗咪分手囉！不過W君都算有情有義，最後都注資50萬俾林莉出寫真集，當係分手禮物。以後W君唔會再注資，間經理人公司點樣運作都唔會再理o架喇！」
被富商男友狠飛，林莉即翻撻經理人Bolie。知情人士透露：「林莉最近同番Bolie一齊，Bolie仲搬埋去林莉度住，不過男嘅仲係死性不改，成日去Volar溝女蒲天光。而Bolie知道幕後老闆唔再揼錢，惟有幫林莉狂接job，內衣比堅尼騷全部來者不拒。Bolie仲同林莉講，咁樣先可以上位，林莉只好逆來順受。」

例牌否認
去年非常風光的林莉打回原形，惟有馬死落地行。本周一（5日），林莉出席完蘭桂坊啤酒節記者會後，先與女經理人到天后「美華氏」掃幾百蚊二手服飾，再搭的士返回月租8千蚊的深井海雲軒。返家前只買5蚊麵包醫肚，同半年前去置地掃名牌入酒店High Tea嘅生活相比，真係天堂與地獄。
本周二（6日）記者致電身在廣州的林莉，她例牌否認：「我呢幾年都冇拍拖，同Bolie冇拍拖亦冇翻撻。我亦冇聽過大老闆唔再注資呢個傳聞。」而Bolie一聽提問即表現驚青：「我從來冇同林莉拍拖喎，我遲啲再覆你啦！」即匆匆收線。

半年前富貴生活

7月5日性感出騷
本周一（5日）下午2點，林莉以性感打扮出席蘭桂坊啤酒節記者會，冇富商男友照住嘅佢，當日叉腰擺pose，非常賣力。

男友離遠[目及]實
每次林莉出席公開活動，男友兼經理人Bolie都會現身監場，呢日佢就印印腳坐埋一邊[目及]實女友。

孖住走
下午3點半活動完畢，林莉與男友Bolie孖住離開，途中遇上蘭桂坊之父盛智文（左）。Bolie比林莉矮半個頭，兩人在外形上非常唔合襯。

經理人男友Bolie

掃平衫
林莉由中環搭的士去天后，原來係去專賣二手衫的「美華氏」shopping，記者見佢掃咗一頂牛仔帽同三條皮帶，埋單800蚊。之後林莉再搭的士返回深井。

5蚊麵包醫肚
的士去到深井附近突然停低，林莉飛撲落車買咗個5蚊麵包，再上番的士。

返深井新居
的士直駛位於深井的海雲軒，林莉當日返家後一直沒有外出，非常深閨。

7月2日陪男友睇世界盃
林莉呢晚陪男友Bolie去尖沙嘴河內道一間樓上酒吧睇世界盃，當晚係巴西大戰荷蘭。凌晨3點幾林莉在Bolie及一名男友人陪同下落樓。

送走女友繼續蒲
Bolie送林莉上的士後，隨即與男友人折返酒吧繼續蒲。

住豪宅
今年1月，林莉被影到返回大埔比華利山別墅，能夠自由出入別墅的她，事後表示因為屋企太細，借朋友地方擺嘢，答案相當牽強！《壹週刊》圖片

坐靚車
出身屋邨的林莉，以往出入都是乘公共交通工具，今年1月她竟然有200萬馬莎拉蒂同專用司機負責接送，派頭十足。《壹週刊》圖片

掃名牌
自從結識內地富商男友後，林莉周身名牌，更被影到在中環置地廣場行街，在多間名店血拼，唔使半個鐘已掃近十萬貨，面不改容。