當一眾o靚模正為水着寫真瞓身出擊,力爭宅男市場之際,去年憑E cup殺出血路的Lavina竟然收埋巨咪唔玩,頻頻扭計推job,因而被經理人掟入雪藏。
據知Lavina忽然錫身封胸唔憂做,全因近期泊得富貴碼頭。不過估唔到向來屬宅男殺手的她,今次竟然同性相吸,o氹掂開設貿易製作公司的富家女陳曉麗(Annie)照起她。
有富貴後台撐腰,Lavina不單有司機車出車入,還得富家女豪擲50萬,幫她斟洽贖身換自由。難怪Lavina今鋪可以繑埋雙手,懶理班o靚模打餐飽!


去年Lavina為賺錢養家,照顧跟她相依為命的傷殘母親,甫出道就博到盡,毫不錫身拋出事業線狂"R"銀。直至數月前,她在夜店認識年約三十的富家女陳曉麗(Annie)後,工作態度即時180度改變,有工唔願開之餘,早前接下的攝影師會活動更學人遲到早退,與昔日為錢拚搏的態度截然不同。

忽然富貴戴鑽戒
據知Annie家境富裕,家住市值四百多萬的深井浪翠園,故年紀輕輕已有本錢創業,在荃灣開設明園(製作)貿易公司。她自認識Lavina後,即儼如小fans般,懶理對方有騎警男友Alex,仍落力照顧。據知擁有多部名車的Annie,除用自己的七人車和司機接送Lavina外,今年4月, Annie又豪花五萬多元在銅鑼灣樓上餐廳「bonfire」為 23歲的Lavina搞生日派對。
知情人士說:「自從Lavina識咗Annie之後,成個人富貴晒,仲對住我哋晒命話依家有七人車坐、有司機使。佢早排搞生日party,騎警男友竟然冇到,反而Annie就陪足全晚。不過Lavina未飛Alex,難得男友同Annie都冇詐型,Lavina咪兩邊吊住囉。生日嗰晚,Lavina戴住隻一卡鑽石戒指同鑽石手鈪,我識佢咁耐都未見過佢咁身光頸靚,最後生日party埋單幾萬蚊,都係個女人幫佢俾。」
富貴女幫Lavina升呢還未夠,還打算為她贖身,知情者再說:「Lavina同我哋講,佢雖然同經理人仲剩4年合約,但佢一啲都唔擔心,因為嚟緊個女人用50萬幫佢贖身,同佢經理人Admond傾解約。」
十分愛錫Lavina的Annie,還悉心為她鋪定後路,於個多月前成立明園(製作)貿易公司,等Lavina解約過檔後力捧。有富貴女睇起,有恃無恐的Lavina便於上月初在facebook撰寫一篇文章講尊嚴,她說:「我知道自己想要甚麼,即使要放棄名與利,我也要捍衛自己的尊嚴到底,名利雙收又怎樣,做人最緊要有尊嚴。」完全有違她過往俯身拋胸,出位至上的拚搏精神。
本周日(30日),Lavina中午外出後,便乘坐密友Annie的七人車返回土瓜灣寓所,而近日唔使撈的她,亦被記者發現唔係閒置在家,就係到友人家中耍樂,生活非常悠閒。

富家女:唔排除幫佢贖身
本周三(2日),記者到Annie位於荃灣的公司找她,她對照起Lavina及幫她贖身等問題沒有否認:「我同Lavina係好朋友,雖然到呢刻Lavina無提出要贖身,但若佢需要嘅話,我唔排除有幫佢贖身嘅可能。(你對佢好好,仲俾架車佢用!)我只係每一次順便載佢返屋企啫,唔係俾車佢用。(有傳有你照住,佢頻頻推job!)我知佢有好多嘢傾咗,但就唔係好想做。」
至於Lavina經理人Admond,在回應Annie欲幫Lavina贖身時說:「我就唔想同Lavina解約,但若果有人要幫佢解約我都唔介意傾下。(Annie有無搵你傾?)唔想講。(你知唔知Lavina個生日會係咪Annie俾錢?)唔知,總之唔係公司幫佢出。」
而Lavina則向本刊直認近日頻頻推job,但說到被照起則例牌否認,「我係有推job,因為唔想成日原地踏步。(聽講Annie幫你贖身!)吓,我無諗過喎!(但Annie話唔排除咁做!)佢咁講咩!(Annie對你好好,又出錢幫你開生日會,又俾架車你用!)唔係,生日party係有人贊助我(邊個呀?)朋友囉!至於架車,只係同佢食完飯, 佢送我返屋企啫!」

開貿易公司
Annie只開了約2個月的明園(製作)貿易有限公司,辦公室設在荃灣的商業大廈內。本周三(2日),記者上門採訪,Annie態度非常友善,有問必答,還說不排除替Lavina贖身,最後更親送記者離開。

出位歷程
去年仍是理工大學廣告設計系副學士學生的Lavina,被模特兒公司發掘,以34E逼爆身材上位,與周秀娜等o靚模鬥得火熱。

上《美女廚房》
Lavina去年參加無綫「美少女廚神」節目,憑住勁爆身材,令主持鄭中基對她「另眼相看」。

博盡拍寫真
去年她與Rainbow等o靚模瞓身拍攝寫真,Lavina更懶理反o靚模聲音,不時拋胸落力宣傳。

拍電影
上位後,Lavina除獲不少工作機會,更有機會登上大銀幕與古天樂和劉青雲合作電影《撲克王》。

出攬枕
繼夏天的寫真集後,Lavina在去年尾學周秀娜推出噴血半裸年曆和攬枕等產品,但反應一般。

賤價激咀
今年3月中,Lavina以一萬元賤價為前E-kids成員阮民安(Tommy)拍攝新歌MV,其間又攬又錫,而這亦是Lavina富貴前的最後一個job。

上周日(5月30日),Lavina外出回家,乘坐的正是Annie的新款7人保母車,非常富貴。

5月30日
七人車接送

4月10日出錢幫搞生日會
4月10日是Lavina23歲生日,身為密友的Annie(右)自掏5萬多元,為她舉行了一個名為「我的第一次」生日會,並邀請了20多個fans出席。

近日Lavina在facebook暗示要「封胸」擺脫o靚模生涯,原來是因為有富貴人家照住!

Lavina有富貴密友照起後,揀job和推job情況不時發生。上周六(29日)下午,一身便服打扮、不用工作的Lavina,約了一男一女朋友先到自己土瓜灣住所附近買麵包,之後再到朋友家耍樂。

至晚上十時,Lavina返回土瓜灣住所。雖然她仍住月租四、五千元的唐樓,但唔使做,生活又悠閒,都算係咁喇!

自幼喪父,家境清貧的Lavina,與因骨腫病而行動不便的母親同住柴灣漁灣邨,由於收入有限,Lavina平日非常慳家。
《FACE》圖片

Lavina與警察男友Alex感情穩定,更被拍到當街咀嘴。但自今年開始,Lavina已甚少提起男友,活動更不見其影蹤。
《FACE》圖片

arrow
arrow
    全站熱搜

    stinglife 發表在 痞客邦 留言(0) 人氣()