荃加福祿壽添食阿姐遭網友圍插被飛忽然1周 775期 @ 娛樂八掛大放送★

無綫的綜藝節目《荃加福祿壽》，收視成為無綫近年周六節目之冠，每週達150萬觀眾收看。王祖藍、李思捷、阮兆祥扮嘢扮到出晒名，成個節目全靠「福祿壽」孭飛，反觀老臣子汪明荃就被觀眾彈到飛起。
收視創新高，《福祿壽》已落實添食拍第二輯，但卻飛起被彈到七彩的阿姐。不過，據知負責人為免開罪德高望眾的阿姐，惟有將拍攝檔期，刻意安排在阿姐開拍新劇那段時間。本刊求證阿姐時，初時她一頭霧水猛話唔知，後來「get」到被飛，即不耐煩謂︰「你去問監製啦！」。

王祖藍、李思捷、阮兆祥憑《荃加福祿壽》扮嘢出位，無綫食住個勢，幫王祖藍七月搞個人扮嘢騷，阮兆祥亦鹹魚翻生出碟，惟獨阿姐被狂插，尤以唱歌環節被抨擊得最激烈。最近無綫扑鎚添食拍攝第二輯，將於九月出街，但由於反阿姐聲音有增無減，所以第二輯決定飛起阿姐，並有意找搞笑出名的江欣燕取代，連劇集名稱亦會有所改動。

撞正阿姐拍劇
不過，阿姐在無綫地位超然，由上至下都沒有人敢開罪她。為保存阿姐面子，製作組刻意安排拍攝期撞正阿姐拍劇的時間。工作人員爆料︰「阿姐六月尾接咗個時裝喜劇《居家兵團》，對手有呂良偉、夏雨同張可頤。拍攝時間大約兩個月，之後阿姐就要忙九月八至十二日嘅粵劇演出。佢個期排到九月，所以第二輯《福祿壽》開會、度橋，完全參與唔到，時間夾得啱啱好。個個都知阿姐唔會同時接兩個工作，咁嘅安排，係等阿姐主動話唔做，咁就唔怕得失佢。所以依家個個隻字不提，但祥仔、祖藍同思捷都度晒期同通知咗o架嘞！」
記者問阿姐知唔知《福祿壽》拍攝第二輯，她一頭霧水話：「唔清楚！（落實咗會拍喎！福祿壽都知！）唔知道！（冇通知你？）我真係唔清楚！（咁製作組同你度咗期未？）我嚟緊要開劇，兩樣工作唔可以重疊，好難度期！」記者欲再追問時，阿姐不耐煩話：「你去問監製啦！」

祥仔祖藍賣口乖
至於阮兆祥，他表示已收到添食通知：「唔係接住即刻拍第二輯，抖吓先啦！（會唔會有其他人加入？）未知，總之係我哋做膽，（據聞會搵江欣燕加入？）我哋大家都好期待佢扮嘅梅豔芳回歸樂壇，但乜嘢形式就未定﹗」問到江欣燕係咪頂替阿姐時，祥仔避重就輕答：「阿姐無人能取替嘅！（但阿姐要拍劇做唔到喎﹗）所以要度吓囉！」記者求證江欣燕，她則表示：「依家仲未收到通知。」
至於王祖藍一聽到飛阿姐出局，即一輪嘴扯開話題：「我哋依家仲度緊最後嗰兩集特別版。萬眾期待嘅《Sat in the City》都會返嚟，千嬅話加入一齊講吓女人經喎……」問到阿姐被抨擊是否被飛主因，祖藍即賣口乖：「睇我嗰啲係小朋友，祥仔同思捷就係OL fans，阿姐就有另一大批追隨多年嘅擁躉，搶唔走o架﹗（阿姐唱歌劣評如潮喎﹗）阿姐未出撒手鐧啫，最後兩集有o架喇，你哋睇到就知勁！」
至於監製何小慧則透過TVB表示因工作太忙未有時間做訪問。

阿姐被插到㷫
《荃加福祿壽》播映以來，阿姐一直被插「五音不荃」，網民更在facebook設立「強烈要求荃加福祿壽阿姐唔好再唱歌」群組，有三萬人加入，抨擊愈鬧愈大，阿姐由最初的接受意見：「我已經盡咗力！」到最終都被辣着：「唔鍾意睇，咪睇第二個囉！」

阿姐做《荃》以來，不停受四方八面的批評。上周六，阿姐得悉節目添食，而她被蒙在鼓裏後，即唔耐煩話：「去問監製啦！」