探熱針
夏尉喻 換畫 巨胸 Barbie甩花心男 唱片闊少速上場
巨胸 Barbie夏尉喻上月被拍到跟六呎靚仔 Jerry夜蒲蘭桂坊後，男友即被起底是溝女王，戀情見光死， Barbie雖為花心男喊到暈倒入院，但事隔一個月，又再有闊少上釣，新歡是被指貌似王力宏的環星娛樂唱片太子爺張子丰。
為討好 Barbie，張子丰不單晨早陪食早餐，又安排司機接送開工；男友全方位照顧， Barbie亦以低胸 pink look吸實新歡，冧爆！
做阿四送返工
在電影《喜愛夜蒲 3》以 35D巨胸拋離其他女角的 Barbie，早前出席香檳活動被追問花心男友 Jerry的風流賬時，竟激動到暈低，要急召救護車送入院。據了解，自從戀情曝光， Jerry即以「唔想俾人再影相，怕影響工作」做藉口，跟 Barbie提出分手。
不過， Barbie只是傷心了一個月，便有新歡登場。日前，本刊發現環星娛樂的太子爺張子丰，晨早十點出現在 Barbie寓所外，過不久，便見左手拉喼，右手攞住大袋準備出發去開工的 Barbie落樓，張子丰即撲上前做阿四，之後過馬路去 Starbucks食早餐，兩人毫不避忌揀了門口當眼位坐低，邊食邊講近一粒鐘，食完早餐，男友體貼地送 Barbie上保母車，到中環髮型屋整頭開工。
二人在西環張子丰老豆開的日本餐廳井川食晏，更揀了角落位，擺明唔想被人騷擾。 
食完日本菜，張子丰揸車到數碼港，跟 Barbie睇戲。 
臨入場，兩個人先到小食部買爆谷，張子丰全程笑晒， Barbie則邊行邊食。
拍拖食飯睇戲
第二日， Barbie不用開工，二人又約見面。下午兩點幾，全身粉紅 look低胸背心襯毛毛外套的 Barbie，跟住張子丰到西環男友老豆投資的日本餐廳開餐，見 Barbie喜歡食海膽，張子丰叫完一板再一板，又親自動手，將海膽用紫菜包住給女友享用， Barbie唔好意思叫男友自己食，二人你推我讓，大耍花槍，一餐飯食足兩個鐘。
返港兩年，張子丰雖然唔熟路，但為過二人世界，寧願唔用司機自己揸車，飯後二人再到數碼港睇戲，臨入場，剛食完日本菜的 Barbie又叫男友買大杯裝爆谷，勁擦得。
Barbie要開工，張子丰朝早先在門口等她，然後幫手拉喼到 Starbucks食早餐。 
在 Starbucks買完早餐，張子丰左望右望，搵定位跟 Barbie撐枱腳。 
一粒鐘後，張子丰安排公司車送 Barbie去開工。
太子做 PA
個多月前， Barbie被拍到繑實 Jerry在蘭桂坊夜蒲，不過見光後，二人即告分手。《蘋果日報》圖片 
貴為太子爺，但 Barbie的新歡張子丰甘願由低做起，在王晶的電影公司當 PA。在電影《黑色喜劇》同阿 Bob合作。
同呂珊有關係
力追 Barbie的 26歲環星娛樂唱片太子爺張子丰，其父張國林同樣跟圈中女藝人扯上關係。有指他五年前離婚後跟呂珊一起，呂珊因此以半個老闆娘身份成為「環星」台柱。
在加拿大修讀電影的張子丰，回港後不靠父蔭，選擇由低做起，在電影公司做 PA，及父親公司旗下歌手尹光、 Angela、 Kelly Jackie的 MV，全由他一手包辦。
留言列表
{{ article.title }}
