亞熱帶

美男成熟時　金汎

靚仔幾時都有着數，好似金汎雖然在不少韓劇都只是演出第二男主角，不過他就冧到 Angelababy同楊冪兩位女神暈晒大浪。楊冪更搵金汎拍自己監製同主演的微電影，擺明公器私用。近年金汎修身成功冇晒 baby fat，最近在《那年冬天風在吹》更升呢拍住宋慧喬同趙寅成，金汎這位 24歲美男終於踏入成熟期！

09年　下巴圓早前金汎在微電影《再見，首爾》為了做出好泡菜，不惜親自種菜。人同菜都要栽培，由下巴圓圓嘅小肥變肌男的金汎深明此道。 

出道 7年的金汎，由於多飾演乖弟弟一類角色，加上笑容可愛，所以有「微笑王子」稱號。金汎形象乖，不過他在讀書時代已經拍過六次拖，最短的一個月貨仔，最長亦只是維持年半。最威水的，是溝女之餘，金汎高中成績未嘗跌出全級第 8名。
入娛圈後金汎玩得好小心，和緋聞絕緣，不過早前他來港拍微電影《再見，首爾》已經一晚連去尖沙嘴同中環夜蒲，擺明心野。在《還想結婚的女子》有一段姊弟戀的金汎，向傳媒得戚地自爆冧女招：「同女主角嘅約會橋段，都係我教編劇。當然唔使成日搞咁多花臣，同情人聽音樂、拖手行街、去 spa已經好好。」
上得山多終遇虎。 08年，金汎同緋聞女友兼 Wonder Girls成員昭熙，於電影《喜歡火熱》有接吻鏡頭，曾令 WG的男歌迷呷醋，一班宅男嬲到集體炸爆金汎網誌，卒之搞到金汎要關閉網誌避鋒頭，瘀晒！

番茄雞胸瘦身

金汎溝女除了靠個樣，仲有一副好「波地」。為了搣走 baby fat，金汎餐餐食番茄、雞胸肉；後來拍《 Dream》做拳手要瘦身，金汎半年狂食香蕉、番薯、飲咖啡，卒之身高一米八的金汎，瘦到不足 150磅。不過由於短時間內暴瘦，令他患上中年人至有的「退化性膝關節炎」，認真慘情。
除了剛拍完在韓國及香港取景的微電影《再見，首爾》，連徐克套《狄仁傑之神都龍王》都有金汎份，加上無綫煲劇 1台都熱播《那年冬天風在吹》，金汎實行強攻大中華市場！

連冧女神金汎異性緣暢旺，拍《狄仁傑之神都龍王》時，已經同 Angelababy玩到熟晒；至於初次做監製的楊冪，就更加搵金汎做自己套微電影《微時代之戀》的男主角，金汎連冧兩位國產女神，犀利！ 


街頭𠱁女拍攝《聽見他的心跳》時，女主角韓智敏生日，金汎即場為她街頭慶生，盡顯冧女手段。

百變靚仔

外表乖仔的金汎，自韓版《流星花園》成名後，形象一直多變。花花公子、拳手、癡心男、騙子，金汎都做過，唯一相同是次次都咁白淨靚仔。

13年　暗交女二在《那年冬天風在吹》，金汎協助趙寅成欺騙尋親盲妹宋慧喬。有兩位阿哥阿姐宣傳，金汎曝光率大增，私下同「女二」鄭恩地亦好鬼親密，冧女有計。 


10年　冧爆 OL金汎在《還想結婚的女子》不小心踢爆女友有白髮，為了𠱁番「姊姊女友」，金汎自染白髮同女方睇齊，感動不少女 fans。

09年　谷肌猛男在《 Dream》中，金汎為了飾演拳手，實行地獄式減肥，一次過減走 25磅肥肉。 

09年　西門上位金汎在《流星花園》飾演韓版西門，憑着靚仔的花花公子形象，開始成為一線男星。 

08年　重返娛圈到澳洲留學一年後，金汎重投娛圈，在《喜歡火熱》同 Wonder Girls成員昭熙做情侶。女嘅冧，男嘅甜，話呢一 pair冇嘢，真係搵鬼信。

撰文：阮英維