我哋又返嚟啦!(設計對白)

探熱針

仙姐有命 雛鳳告別演 古稀梅雪詩:有人搵就做!

2013年03月07日 ~~ 第1200期 香港《壹周刊》

由任白嫡傳弟子龍劍笙(阿刨)及梅雪詩(阿嗲)組成的香港粵劇班霸雛鳳鳴,繼一一年舉行《龍情詩意半世紀》演出,紀念二人從藝五十周年,今年尾將捲土重來,由十二月中至明年農曆新年期間,重演另一任白戲寶《牡丹亭驚夢》。
兩個雛鳳台柱已年屆七十,在加拿大 hea慣的阿刨,不下無數次嫌辛苦唔想做,今次肯再踩台板,大有機會成為舞台告別作;至於自稱一生也愛演戲的阿嗲則大唱反調:「我好恨做,有人搵就做。」

一票難求


縱橫粵劇界五十年的雛鳳鳴劇團,○五年回歸重組演出三十二場《西樓錯夢》,貴飛每張八百元, fans要瞓街排隊撲飛,開售幾小時門票即賣清。到○六及一一年的大型演出,票價加到八百八十元,仍是一票難求,所有門票更破紀錄在一小時內售罄,結果加場再加場,二人各自穩袋過百萬酬勞。
戲迷餓戲兩年,阿嗲表示隨時 ready,長居加拿大的阿刨雖然 say no,但師父仙姐叫到,阿刨終於答允在今年尾,與阿嗲演出名劇《牡丹亭驚夢》。


龍、梅年尾回歸做名劇《牡丹亭驚夢》,當年阿刨被指學足師父任姐的鬼馬表情,極受戲迷歡迎,每做此劇必爆。


今年年初八,阿嗲與過千戲迷食開年飯,此活動已維持了幾十年。


蛇年大年初一,阿嗲公開家居照向戲迷拜年。

體力不支


「嗲姐同仙姐嗰邊已經開始度緊嘢,呢排分緊角色同 mark演員、音樂,仲有幕後工作人員嘅檔期。其實阿刨做完上幾次演出,覺得自己年紀大,體力頂唔順,尤其今次《牡丹亭驚夢》戲分比較偏重阿刨,佢就更加唔願做,最後係仙姐出馬先講掂佢,但聽講阿刨話到明無下次,真正收山。」一位雛鳳戲迷說。
即使拍檔肯出山,阿嗲接受電話訪問時繼續扮唔知。「係咩?我真係唔知,如果笙姐(阿刨)肯做梗係最好啦,我隨時都做得,我三月廿三(農曆天后誕)之後都冇嘢做,失業呀!」
師父仙姐有命,阿刨應召回港作最後演出,今次的撲飛潮,定比過去更激烈。


四四年出生的阿刨與同性好友 Emily(右)九十年代移民加拿大,從此退出舞台,○五年返港再做戲, Emily貼身照顧。


阿刨每次現身,墟冚過唔少偶像明星,老嫩 fans圍實她唔俾走。


仙姐在雛鳳訓練班時已十分痛錫阿刨,所以師父叫到,推唔甩。

復出有價


雛鳳鳴劇團 92年封咪後, 13年後復出合作《西樓錯夢》,並先後於 06年及 11年兩度添食,掀起票友撲飛熱潮,加埋現場推售的相集、 poster等紀念品,阿刨阿嗲賺到笑。




05年 雛鳳回歸,於文化中心重演十二場任白戲寶《西樓錯夢》,由於反應熱烈,隨即在演藝學院加開 20場,兩次演出,阿嗲阿刨各袋超過 150萬。 




06年 為紀念白雪仙與任劍輝的仙鳳鳴劇團成立五十周年,二人再度同台,於演藝及文化中心演出 32場名劇《帝女花》,門票開售前兩天,各售票處已經出現通宵排隊人龍,所有門票即日賣清。 




11年 雛鳳再於文化中心、演藝學院及沙田大會堂巡迴演出 20場粵劇折子戲《龍情詩意半世紀》,由於未賣先爆,於是宣布加開 5場,分別演出四部折子戲,包括《紅樓夢之幻覺離恨天》、《俏潘安之店遇》、《蝶影紅梨記之窺醉》、《再世紅梅記之折梅巧遇》。 

撰文、攝影:娛樂組

arrow
arrow
    全站熱搜

    tvb4life 發表在 痞客邦 留言(0) 人氣()