足球員出身的鄭啟基、朱偉霖、黃展鴻（左一至三）、張耀聰及黃俊傑（右一至二），睇中室內足球場市場，希望證明踢波都可以踢出「錢途」。拍攝當日，他們在場內玩兒時遊戲「大懲罰」，將足球踢向鄭的屁股。

壹盤生意

工廈變「綠茵場」　踢出「錢途」

2013年02月28日 ~~ 第1199期香港《壹周刊》

有「牛下女神」之稱的單車女將李慧詩被傳媒捧上天，但香港職業運動員中，能捱「出頭」的只是少數，不少更要為退役後的生活而苦尋出路。曾是香港青年軍的退役足球員朱偉霖（阿霖）、黃俊傑（阿虎）、張耀聰（阿聰）等，夥拍現役流浪足球員黃展鴻（大眼仔），投資過百萬在觀塘工業大廈開設 Master5競技場，打造室內五人足球場，希望將踢波經驗化為一盤生意。開張個多月，散客、公司客陸續上門，雀躍之際卻收到地政署信件，指其違反該大廈的土地用途。真正的考驗才剛開始，要在石屎森林中踢出新天地，先要跨越眼前的重重障礙。

上週五晚上七時，佔地逾一萬呎、提供兩個室內足球場的 Master5競技場好不熱鬧。每個場都有十數名剛收工的男士在追逐較勁，其中一隊是碧堤半島屋苑足球隊，隊員 Daniel指﹕「成個深井都冇足球場，雖然觀塘唔算近，但每人夾一百蚊就有個私隱度高又有冷氣嘅地方俾我哋踢波，唔使踢石地場，又唔使同街外人踢！」晚上六時後，場地每小時收費六百八十元，但在場的上班族都不嫌貴，有波友直言：「十幾個人夾兩個鐘，每人最多百幾蚊，食餐飯都唔止啦。」故幾乎一到收工時間，場地都爆滿。另一個場的衞訊電訊，租了兩小時供員工踢波，負責人 Jackie說：「打算每個月都租兩至三次場，租足一年，俾員工放工輕鬆吓！」

Master5競技場位於觀塘鴻圖道的工廈區內，距離港鐵站約十分鐘步程。大廈（圖左）上月全面翻新，但仍屬工業用途。

老闆之一的阿霖講到退役後任健身教練的經歷時，一度感觸落淚，指慶幸兩度遇到貴人，才有機會做老闆。

晴天霹靂隨時要走

上週五晚上，衞訊電訊租用足球場搞員工活動。負責人指員工分布香港各區， Master5位置方便，吸引他們來試場。

開張僅一個月，客人反應熱烈，一眾老闆理應開香檳慶祝，但全職在場內「打骰」的阿霖，卻經常眉頭深鎖。細問下，才知公司最近收到地政署信件，大廈屬工業用途，用來做室內足球場已違反土地用途，勸諭他們在三月十九日前將場地還原為工業用途。一眾老闆異口同聲指﹕「真係無心違規，一定會配合地政署，我哋只係想提供一個地方俾大家踢波､推廣足球。」過百萬投資隨時「泡湯」，但他們只能將信件轉交業主，等待回覆，徬徨時更反問記者：「有冇方法幫到我哋？」
足球員出身，沒什麼創業經驗的老闆們，從沒料到做生意要留意的魔鬼細節。阿霖憶起創業的辛酸，不禁流下男兒淚道：「今次搞呢盤生意係最後搏一鋪，老婆其實唔支持，叫我打份工就算，但好彩有前老闆同我隊波『天旭』嘅班主幫助，我先可以同班兄弟搞個場出嚟。」他們曾向地政署查詢，該署表示須由業主向署方申請改變場地用途，阿霖表示﹕「大廈剛翻新，希望業主補辦手續後，可以繼續留低。」不過，他們所簽訂的租約上，曾提及在單位內辦出租足球場生意，租客自行承擔一切風險。一旦業主「卸責」， Master5沒有任何保障。

室內場需求大

公司前路未明，但阿霖等人深信室內五人足球場有市場。 Master5是香港第二個室內足球場，提供兩個合乎國際室內五人足球比賽標準的場地，阿霖指﹕「草地係內地訂製嘅仿真草，無真草咁跣，又唔會踢到成腳都係泥。」香港現時有四十多個真草場地，及逾二十個人造或仿真草足球場，但週末､日或平日晚上等熱門時間都被租用作足球聯賽和球隊訓練之用，一般市民想爭場踢波十分困難。
不少上班族貪室內場有中央冷氣，一年四季都可踢波，更不用擔心天氣。由於場地四周設有圍板，沒有界外球，節奏較一般十一人的比賽快。不過，樓底只有十呎高，壓迫感較大。老闆之一、現為流浪隊長的大眼仔解釋﹕「室內足球主要係踢地波，高度唔係咁重要。」老闆們坦言，要找一萬呎兼少柱位的工廈單位甚難，「荃灣､火炭､香港仔都搵勻，搵咗三個月先租到呢度。租金成十萬，但包冷氣費，大廈又剛翻新，慳咗裝修，觀塘交通亦方便。」阿霖說。

健身室吸客

競爭對手､同樣位於觀塘工廈內的 iSoccer，只提供室內足球場， Master5為增加賣點，加設健身室及拳擊班用的設備。「踢波嘅人鍾意健身，呢度可以鍛鍊到唔同部位嘅肌肉，有助提升踢波技巧。」阿霖曾在 California任職健身教練，現亦為客人提供健身教練指導，一對一收費約四百元一堂。買下二十多堂健身指導班的客人 Jimmy指﹕「阿霖教嘅健身會加入有足球元素嘅帶氧運動訓練，對踢波嘅人嚟講好有用。」若無需指導，客人只須額外支付四十元，就可使用健身室三小時。
另外，對手場內只有男更衣室， Master5加設女更衣室，阿霖表示﹕「我哋之後會搞瑜伽班，希望吸引到附近返工嘅 OL喺午餐或者返工前嚟上堂。仲同女子足球隊傾緊上嚟練波，有多啲女士嚟踢吓波就更好啦！」
公司另有兩個收入來源，其中最易賺是賣飲品。由於場內水機只提供免費熱水，幾乎所有客人都會買冷凍的水或飲品。公司直接向太古入貨降低成本，收入佔了近一成生意額。另外就是在場地牆壁上賣廣告，現在有間同區的火鍋店簽了約，一年收費六千元。

現時除南華會外，其他甲組球會都沒有專屬健身室。住在西貢、現役流浪的三位外籍球員閒時會到競技場健身。

場內售賣冷凍支裝水（$6）及可樂（$8）等飲品，雖較便利店貴，仍甚受歡迎。

日場成考驗

夜晚不愁生意，但場地在平日早上及下午時分，甚少有客租場踢波。公司每月單是租金已要十萬元，按每小時平均收費約五百元計算，每日每個場最少要租出四個鐘，收支才能平衡。現晚上大部分時間已經爆滿，公司仍要倒蝕二萬，因此要賺錢，就要開拓日場生意。據觀察，甚少客人使用健身室，只有少數人於中午時分來健身。「我以前有啲客鍾意返工前去做 gym，呢度附近多寫字樓，希望可以開拓呢個時段嘅客。」阿霖道。
十個老闆中，只有阿霖全職「睇場」，其他人就放工後輪流來幫手，更會在客人「唔夠腳」時落場踢波。「有甲組球員陪踢波，都算賣點呀。」阿霖笑說，老闆們都熱愛足球，但現在僅大眼仔仍為職業足球員，阿霖語帶無奈道﹕「我十七歲就全職踢流浪，廿五歲退役去做健身教練。當時球壇市況好差，每個月得七千至八千蚊人工。」為幫補生計，阿霖以前練波前後都會去送貨。「差唔多退役嘅時候就考定好多健身牌，裝備好自己，嗰時做咗 California半年就有萬幾蚊收入，已經覺得好好喇！」○八年，他首次創業，與幾名足球好友合資於尖沙咀開設食肆「喜點心」，最後蝕廿多萬離場，所以這次再創業，可謂「盡地一煲」。阿霖一邊抹淚一邊激動道﹕「老婆反對我再創業，我同佢講好，想試埋呢次，有前老闆同班主咁支持我，我真係好感恩。」

三十三歲的黃展鴻為現役甲組球會流浪的隊長，曾於○九年代表香港參加東亞運動會贏得足球金牌，有時會落場幫客人「湊夠腳」，切磋球技。

為避免客人穿著真草專用釘靴，令仿草地皮損耗，鋪內提供波鞋予客人租用，每次收費十元。