Gibson和爸爸張克成因透過打理蛇店而互相了解，重修以往疏離關係。現爸爸很放手讓兒子打理這間 50年的蛇王業老字號。

青雲路

蛇王第三代　為老店貫注活力

2013年02月20日 ~~ 第1100期交易通．搵車快線

為迎蛇年，想找一些與蛇相關的題目，一問之下，很多蛇王已年屆 5、 60歲，記者心想蛇王屬式微行業，不會有年輕人入行，但偏偏位於深水埗的蛇王業第 3代 Gibson願意接棒，「老豆成日話呢行賺唔到大錢，我偏唔信，我哋 3姊弟都係靠間蛇鋪養大，仲去到加拿大讀書，冇理由冇得做。」
今年 32歲的 Gibson，前年全職去蛇店幫手，第一個目標就是扭轉爸爸及一般人只在冬天食蛇的觀念，結果靠團購，成功將夏天生意額增長 100%；他又炒晒全店老員工，重新請過一批新人，為老店貫注活力，現已做出成績，連阿爸阿媽都讚叻仔！

前年暑假開始，團購網有蛇王業的蛇羮賣，$29一碗還多送一碗龜湯，差不多是正價的一半，十分超值，當時連記者也買了一張於 12月光顧，去到位於深水埗的蛇王業，全店擠滿了人，水洩不通。「嗰次係第一次同團購公司合作，賣出 7千張 coupon。」
有 50年歷史的蛇王業，是全港第一間參與團購賣蛇羮的店鋪，這是第 3代 Gibson及其弟的主意，「團購對阿爸嚟講太新，當時佢有反對，但阿媽都好支持，我覺得一試又無妨。」
但 Gibson表示第一次團購是失敗之作，「第一次冇經驗，暑假做團購，換購期喺 9月至 12月，冬天係旺季，冇諗過啲客集中喺 11、 12月過嚟，原本每日生產約 7百碗，被迫要整到 1千 3百幾碗，冇足夠時間去煮個湯底，令質量下降，熟客一食就食出；團購客又投訴等位太耐，我當時有同啲客嘈，𠵱家諗番都覺得自己年少無知，唔應該得失客人，太過衝動啦。」
為了分流團購客， Gibson想到用閣樓招待團購客，而地鋪可做回正常生意。「做團購的確起到宣傳效用，因為我哋係第一間做團購嘅蛇店，報紙都有報道，班團購客係好好嘅臨記，搞到間鋪堆滿人好熱鬧，好多人都有羊群心態，見到裏面咁多人，都會八卦甚至入嚟幫襯，多咗 3成非團購客。」

搞團購
因推出團購令店鋪無論冬夏季都生意滔滔。

開 facebook
為了令老字號加添活力，吸引年輕客人，所以 Gibson為蛇王業開了 facebook專頁，凡有團購及新優惠即 post上網。

八達通付款
年輕人愛用八達通，為迎合他們，店內特別安裝了八達通付款機。

蛇羮每碗$33(細)
夏天團購時賣$29，還送一碗價值$22龜苓湯。

行家跟風同搞團購

最初同行都好抗拒用團購來搶爛市，但蛇王業因此人氣急升，上年開始已有 3、 4間蛇店紛紛加入團購行列。反應好，上年 5月開始， Gibson再搞團購，直至暑假每月搞一次，每次約賣出 2千張 coupon，全都是夏天換購。結果在淡季連帶正價客每日都賣出 3百碗，比以往多了一倍，達冬天生意額的一半。「媽媽見反應咁好，好開心！亦扭轉咗行內既有觀念，夏天等運到，只靠冬天積穀防飢。」
經團購宣傳另一好處是吸納到一群年輕人幫襯，年輕客人上升了 3成， Gibson還趁機幫蛇店開設 facebook專頁，有團購及新優惠便即時發放。「揀有經驗嘅團購網合作好重要，因為佢哋識得做客戶服務、物流、處理投訴或退款等，到𠵱家老豆都詐我型話我好用呢間團購公司，抽兩成幾佣，好貴冇肉食，但佢唔明，人哋有經驗，又多 member，合作好流暢，好彩老豆都好放手畀我發揮。」

船塢工作獲益良多

眼前 Gibson很生性，但兩年前卻完完全全是第二個人，他用典型的 80後來形容自己。「我 9歲開始喺加拿大讀書， 06年讀完飛機工程文憑返香港，其實我都唔知自己想點，過住慢板生活，追趕唔到香港急促步伐，先後做過汽車 marketing、 sales、車房、飛機維修員，冇份工做多過半年，冇工開就出鋪頭幫手攝時間，當係避風塘，阿爸阿媽又唔會畀壓力我。」
直至對上一份工， Gibson在船塢工作，個人開始成熟起來。「嗰份工我算做管理層，負責安排同事去修理船身，不過初頭 3個月我都好細路仔，仲怪阿頭一到我過試用期，就畀晒啲工作我做，後來做咗大半年我先了解到，原來阿頭都好多嘢做，只不過佢見我 pick up得到，所以放手畀我，我怪錯咗佢。」
這份工做了 2年，學習到怎樣管理一個部門， 10年他便回家幫爸爸手。「雖然爸爸話間鋪只係賺到兩餐，但我唔忍心佢咁辛苦，亦覺得間鋪有得發展，於是回家接棒，兩父子拍住上。」

怒炒全店散慢員工

新官上任三把火， Gibson怒炒了全部老員工，爸爸雖覺得他太不近人情，但不想他事事有掣肘，只從旁提意見，放手任他碰釘。「班伙記年紀都老，做嘢散慢，成日聽到老豆呻，我惟有做醜人，出手炒晒佢哋，結果一夜間冇晒樓面，後尾先知大鑊，最後要用高市價 2、 3成人工請番啲四十幾歲仲衝得嘅人幫手，好彩嗰陣係冬天，搵得番啲支出。」
慢慢知道，員工太年輕，不甘留於蛇店工作， Gibson惟有主攻中年店員，「佢哋特點係好肯做，但到夏天淡季客人少了，佢哋少嘢做好唔自在，會有辭職念頭，好在夏天做埋團購，保持到生意，先留到班員工。」

蛇腩飯$80起
為拓展生意，他們也提供飯，例如糯米飯、紅燒山瑞配白飯、生扣蛇腩配白飯等價錢$20至$123。

川貝果皮燉蛤蚧$120
冬天好受歡迎，有助紓緩氣喘及支氣管炎。

父子同心搞好蛇店

由於 Gibson自小在加拿大長大，爸爸則留在香港拼搏，父子關係疏離，直至這兩年回蛇店全職幫手，溝通多了，又了解爸爸賺每分毫都得來不易，關係密切很多。「我哋成日都有意見出入，好似老豆咩都覺得唔 work，又鍾意潑冷水。其實我知爸爸有好多好構思，但之前只得佢一個，所以放棄居多，好似佢好想好似阿爺嗰代搞蛇宴，我成全佢，執好閣樓，請埋師傅嚟煮，結果差唔多日日 full booking，我知佢好開心好滿足，心願達成。」
兩父子總不會在對方面前互相稱讚，但私下又會對記者講對方好說話， Gibson感激爸爸，亦了解兒時錯怪爸爸成日工作不陪家人。爸爸私下對記者說：「 Gibson之前喺船塢做管理層，學到唔少嘢，咪放手畀間蛇店佢搞，畀佢試多啲，我都老，自己一個點搞，難得佢有衝勁。」
現時蛇王業旺季即使有團購，每日營業額最少有$25,000，比之前多了 2成，淡季最少增長了 5成；錢是其次，最重要是蛇店令兩父子聯繫起來， Gibson期望將來可把蛇店企業化，發展工場，甚至作特許經營，將蛇王業品牌發揚光大。

客人張小姐
我之前經團購食過，覺得好好味又足料，所以冬天都走返嚟食。

第一次推出團購時，客人集中在 11、 12月來換購，令鋪頭太迫人， Gibson失了預算，所以他決定用閣樓來招呼團購客分流客人。上年年尾 Gibson更在閣樓搞蛇宴，每圍 3千元，接到不少公司客。

點入行？

32歲的 Gibson跟爸爸學勻劏蛇、煮蛇羮，但他在鑽研怎樣可保持湯底質素，因為他最終想發展成中央工場。

因從東南亞入口的冰鮮蛇成本愈來愈平，香港蛇店需人手劏蛇或捉蛇的需求大減，屬息微行業，所以都不用有師傅專門劏蛇。 Gibson說劏蛇師傅多是世襲，「阿爸個年代， 2、 30年前好興即食蛇膽，阿爸嗰陣試過同余仁生合作，去藥店即劏蛇膽供貨，阿爸都係跟阿爺學，我就跟阿爸學，𠵱家都冇乜後生仔入行，但我想扭轉呢個傳統行業，將蛇羮年青化！」如果想入行，都會由樓面做起，人工約$8,000起，其間邊做邊學，約做滿 4、 5年有機會成為師傅級，到時人工約有$12,000起。

後記： 80後識劏蛇嗎？

新聞成日見到某地方出現蛇，某某蛇王被邀到場捉蛇， Gibson爸爸也是捉蛇常客，雖然 Gibson未負起捉蛇任務，但劏蛇、煮蛇羮，他樣樣識做。「其實𠵱家唔似 20幾年前要自己劏蛇去煮，好多都係入口東南亞嘅冰鮮蛇，香港人工貴，不過間中都有人會嚟鋪頭買活蛇返屋企煮，我都可以幫手劏，不過可免則免，我唔想親手殺生。」其實 80後並不是懶散的代名詞，只要有目標和發揮機會，萬事可成。