新車激試

獸性暴發 Lotus Exige S

2013年02月20日 ~~ 第1100期 交易通.搵車快線

喺呢個馬力泛濫年代,普通一部 7人 MPV都可以有 280匹馬力嘅時候,對比之下全新 Lotus Exige S「只有」 350匹馬力,好似冇乜料到,但要知 Exige S車重只有 1,176kg,比一部 Golf更輕,其加速力可媲美 supercar,而且更重要係 Exige S忠於 Lotus原始本色,只得 6速棍波、電子輔助駕駛系統少之又少,考駕駛者技術,更考耐力,原始味唔係玩開 GT-R嘅公子哥兒頂得住。


3.5公升 V6 supercharged引擎用喺 Exige S上有強勁性能表現。

眾所周知 Lotus係原始駕駛機器代名詞,最普通入門一部 Elise都可以揸到你汗流浹背,原因唔單只係極其簡單原始嘅駕駛感,冇過濾嘅速度感先最嚇人! Exige S係目前最大馬力嘅 Lotus, 0-100km/h只需 4秒,快到你驚! 

拉利式車身


第一眼睇到 Exige S,會被佢個全新外表嚇倒,因為據廠方說明,中央鋁合金車架同上代一樣,但前、後懸掛上嘅副車架係全新設計,令軸距足足增加咗 70mm,車身闊度增加 75mm,而車長更長咗 255mm,主要係拉長咗引擎艙以容納新引擎,整體車身比舊款大成個碼。 Exige S外表都係全新 design,設計團隊來自前法拉利,所以車頭及車尾擾流設計有濃厚「拉利味」,尤其試車用上鮮紅色,相信試車當日喺東區走廊呃到唔少人!




車長達 4,084mm,增長全在於車尾引擎艙位置。

馬力同級對手唔多


其實 Exige S根本冇同級對手,因為冇一款車可以咁輕又咁大馬力,如果以 350匹馬力計算,勉強都有 Audi TT RS、 BMW Z4 35is係同級,但因為車重、形象有別,所以速度同價錢都有幾大分別。

罕有可選手波  Audi TT RS




TT RS擁有 340匹馬力,同 Exige S接近,不過由於車重達到 1,450kg,所以 4.6秒先完成 0-100km/h。不過 TT RS貴為最頂級 TT,可以畀客選擇要 7速自動或 6速手動,手波版相信駕駛樂趣更強。車價:$827,000 

電動硬頂樂趣  BMW Z4 35is




Exige S冇得開篷,就算日後出個 Roadster型號,都只係好似 Elise咁用手動軟篷。 BMW Z4 35is用電動硬頂,一部車有兩個玩法,不過 Z4 35is車重達 1,600kg,就算有 340匹馬力, 0-100km/h都要 4.8秒,慢咗少少,但車價$722,000就得。 

原始就是美


由於中央車架部分同上代一樣,所以車廂大致布局同上代相似,你都唔好指望有個細 mon喺中控台可以睇吓,如根據車廠意向,最好就係音響、冷氣、電窗都冇,𠵱家 Exige S有整晒,其實已作出好大程度妥協。值得一提係一對座椅雖然依舊冇得調校背部角度,但用料、配色一絕!有實際賽車功用之餘,不失高級感覺。


外表完全冇任何修飾嘅 3幅式軚盤,其實已有上好握持感。


座位簡單而有豐富承托力,接近賽車用款式。

Lotus Exige S Spec.


從高角度就可以睇到車尾部分用上全新設計。

引擎: 3,456c.c. V6 Supercharged
馬力: 350ps/7,000rpm
扭力: 40.8kgm/4,500rpm
傳動: 6前速手波
懸掛:前、後雙搖臂
制動:前、後鑽孔透氣碟
車身: 4,084× 1,802× 1,129( mm)
車重: 1,176kg
車價:$1,152,000
查詢: Richburg Lotus( 2877 0810) 

駕駛大考驗


從來揸 Exige就好似對駕駛技術一個考驗咁,軚盤 100%傳來路面訊息,而且只有手波,所有嘢都好似零過濾咁直接傳到,其實幾花精神去處理,而 Exige S更加上達 350匹馬力引擎,大馬力令駕駛更具挑戰性。將駕駛模式調至 Race,油門反應即時去到最敏感、排氣聲亦變得更大,意味引擎進入全作戰狀態,當極力子鬆開一剎、狠狠地深踩油門,車身會毫不猶豫向前彈出,感覺猛烈過好多 supercar,雖然廠方公布 0-100km/h時間係 4秒,但感覺上快好多。其實 Exige S帶嚟嘅已經唔係一般跑車駕駛感,已接近賽車級數,當然係好玩又刺激到極,只要你仍有鬥心、決心去玩賽車, Exige S係市場上唯一選擇。


行車模式扭掣設於軚盤右方,扭到格仔旗 Race模式有最強效果。


6速手波係唯一選擇,有人會見到都怕,但對高手嚟講,係快樂泉源。

撰文:袁國基
攝影:黃家活

arrow
arrow
    全站熱搜

    tvb4life 發表在 痞客邦 留言(0) 人氣()