專題 Log In

踢走老土　 Toyota CorollaSpec.& Nissan SunnySpec.

2013年02月20日 ~~ 第1100期交易通．搵車快線

曾幾何時各大日牌都有部千五房車仔做台柱，但今時今日有啲改咗名、有啲升級到千八，更甚有啲停止引入本港！仍緊守千五以下防線只有 Toyota Corolla同 Nissan Sunny。咁啱兩款車都有新款到港，但兩部車嘅目標客已經有啲唔同，唯一相似嘅係外表唔再好似以前咁老土，尤其 Corolla更加係日本本土頂級版，實力不容忽視，就搵嚟近 4代 Corolla車主齊齊品評！

Toyota Corolla Spec.
引擎： 1,497c.c.直四
馬力： 108ps/6,000rpm
扭力： 13.9kgm/4,800rpm
傳動： CVT無段變速自動
懸掛：前麥花臣支柱、後扭力桿
制動：前透氣碟、後鼓式
車身： 4,360× 1,695× 1,460mm
車價：$198,800（ Luxury）、$165,500（ Advantage）
查詢：皇冠汽車（ 2866 1020）

Nissan Sunny Spec.
引擎： 1,198c.c.直三
馬力： 79ps/6,000rpm
扭力： 10.8kgm/4,400rpm
傳動： CVT無段變速自動
懸掛：前麥花臣支柱、後扭力桿
制動：前透氣碟、後鼓式
車身： 4,425× 1,695× 1,495mm
車價：$169,800（ Luxury）、$159,800（ Standard）
查詢：合誠汽車（ 2262 1088）

Corolla（右）罕有地將車身縮短 180mm，比 Sunny更短小。

千五 c.c.引擎、四門三廂式日本小房車，係 8、 90年代香港汽車市場重要車種，當時歐洲揭背未紅、又未興小型 RV， SUV更未見影，香港人視日本小房車係一個小康家庭指標，總之住家男必然之選。但今日車種繁多，而且歐洲車同日本車車價拉近，令好多傳統日本小房車企唔住陣腳， Sunny都試過失蹤一段日子，只有 Corolla推出 47年冇間斷過！

車身縮短 180mm

對比兩款車尾燈 Corolla（左）毋疑係較平淡一啲。

一個車系可以推出 47年實在唔係易事， Corolla嚟到第 11代，終於冇再無止境咁將車身放大，破天荒將車長縮短 180mm，但由於軸距仍然維持喺 2,600mm，所以對車內空間冇影響。同場嘅 Sunny都有 4,425mm車長，雖然闊度都係 1,695mm，但望落比 Corolla大少少。車身細咗嘅 Corolla最觸動車迷神經一定係豪華版嘅直條金屬鬼面罩，令到外表耳目一新，雖然有部分舊 Corolla車主唔 like呢個設計，但筆者相信，日子有功望望吓會順眼啲，而且豪版要有番啲電鍍裝飾、 HID燈、 15吋合金軨襯番，先似豪華小房車嘛！除非好似 Sunny咁，預咗買家係實而不華嘅人，先可以冇 HID燈，又用軨蓋，慳盡去減車價。

Corolla會會長
Chester

「新款外表要少少時間去接受，不過最難得係代理今次引入日本本土版，質量理應更好，而且波箱改用 CVT，相信可以做出更好耗油表現。我個人覺得，如新款可以有埋天窗、加減波、皮座等設備，會更加吸引。」

外國 Corolla愈來愈型

香港新款 Corolla被人話個外表唔夠型，但其實能夠脫離老土行列已屬難得，當然如果你硬要同鬼佬地方嘅 Corolla比就梗係失色啦！好似早前喺美國底特律車展上嘅 Furia Corolla Concept就型爆全場，估計會係今年底登場美版 Corolla雛形。嫌 Furia Corolla Concept太科幻唔實在？已賣緊嘅澳洲版 Corolla你一定冇投訴。用揭背車外表之餘，仲要用跑車化車頭設計，仲有型過啲 Type R同 GTI。

Furia Corolla Concept就大有可能成為未來美版 Corolla。

澳洲揭背版 Corolla靚仔到好似 Prius V咁。

NZE141車主
Billy

新款外表真係好似國產車，普通版車頭比豪版靚，而呢一代設備唔算吸引，最靚都只係用 15吋合金軨，我呢代都用 16吋啦！不過以 Corolla多年來可靠耐用嘅質量，新款一定更好。

豪華冇皮氣

以前所有房車仔都充大頭鬼，明明係絲絨位就偏偏去包上仿皮、膠中控台又加仿桃木，今時今日再用呢個手法包裝就真係核突！好似 Corolla咁，豪華版冇真皮座椅、亦冇桃木飾板，取而代之係日本原廠高質絲絨座位，連首飾櫃上方都包上布料，視覺上或者唔夠真皮豪華，但乘坐質素同手感都一流，而且更啱年青車主口味。 Sunny方面就繼續慳家，中控台源自 March，膠感強烈，但 design就比 Corolla入時，淨係個冷氣系統外表就夠吸引啦！
此外， Corolla同 Sunny車廂空間接近， Sunny後座頭部空間會好少少，但 Corolla勝在有平地台，坐 3個人時就最有用，中間乘客冇投訴。不過，兩款車都冇天窗提供，相信係因為車頭預留凹痕有利減低風阻，所以加唔到天窗，令空間感打咗個折扣。

開門手抽有隱藏輕觸式開關門鎖掣（紅圈）。

門邊鏡終加入指揮燈，而且留意可睇到 A柱位下方有擾流設計。

軚盤附有音響控制按鈕。

新增智能車匙系統，唔再係高級車專利，全線 Toyota私家車都有嘞。

設備唔起眼

Corolla同 Sunny冇天窗又冇皮座，好多車迷已經「噓」一聲，又唔好咁灰住，其實兩款車嘅新設備比較低調啫！ Corolla首次有 8安全氣袋，冷氣加入高級車系先有嘅 nanoe納米離子淨化功能、又有智能車匙及按鈕啟動系統，歐洲車都未有咁高規格！而 Sunny就有智能車匙及按鈕啟動系統之外，引擎仲有停車自動熄匙系統，跟上環保大潮流！講到環保， Corolla同 Sunny都好慳油， Corolla可做到 19.9km/L，而 Sunny更勁， 22.6km/L！

車頂有兩條凹陷骨紋，相信有利減低風阻，但就唔可以加天窗。

NZE121車主
阿成

我部 121由新車揸到𠵱家成 12年完全冇大問題，最值得讚一定係耐用同保值啦，易手價仲幾好㗎！新車睇個樣就麻麻哋，車尾燈較細，豪版鬼面罩又唔靚，我冇乜意欲換車。

AE110車主
阿偉

我曾經有過 3部 110，換來換去都係佢嘅原因係慳油耐用，我部車 1L油可以行 15km！對新款改用 CVT波箱有一定期待，不過自從 110之後， 121同 141喺操控駕駛感上都係差啲，希望新款有改進。

Nissan Sunny
Sunny整個駕駛艙都充滿膠料，手感一般。

Toyota Corolla
Corolla中控台上嘅大面板機只係來港先裝嘅設備，可以不提，但首飾櫃包布料真係幾靚。

Corolla後座 3個座位都有獨立頭枕，而且有平地台，令乘坐性更出色。

高質絲絨座位一樣高級，耐用性可媲美真皮。

冷氣系統加納米離子淨化功能，同級中獨有。

前座間有手枕儲物櫃，如包上絲絨會更靚。

新波箱更好

上一代 Corolla可能係近年最少話題一代，全因歐洲對手部部強，入門 Golf已用到 7速 DSG波箱， Corolla仍用 4速款式，完全係落後於大市！有見及此，新一代用上 CVT無段變速波箱，雖然冇加減波系統，但表現已經有大躍進，耗油降低之餘，加速亦更順滑自然，或者有人會認為少咗傳統自動波 kick down加速感覺有欠勁度，但事實證明 Toyota旗下車款有 7成以上已用 CVT，已代表佢有過人之處。 Sunny都係用 CVT波箱，不過由於引擎馬力只有 79匹，比 Corolla少 29匹，所以加速力稍遜。

轉用 CVT波箱後，行車更順，耗油更見大大減低。

表板簡單明確，而且中置小屏幕顯示行車數據。

我覺得 AE100最耐用，而且零件同保養都好易搞。新款外表就一般嘞，我睇過內裏設備似乎都比唔上上代 141，好似返到 110年代咁！只係多咗安全氣袋，天窗都冇。

AE100車主
阿文

Corolla（右）引擎同 Sunny唔同級別，有 29匹距離，一起步就知分別。