Fun App

iPhone特技 app　即日開戰

2013年02月20日 ~~ 第300期 Face

雖然新年流流要好意頭，但賀歲片中《虎膽龍威：擇日開戰》輕鬆 KO所有笑片對手，足見觀眾都係鍾意睇打打殺殺嘅動作特效片多啲。既然咁喜歡，不如自己都拍埋一份啦！放心，唔使好似荷里活咁用天價成本加超級器材，只需一部 iPhone，再下載個 app就搞掂，㩒幾個掣就拍到屬於你嘅槍戰片。

炸到冇影
Exploder Cam　 Free

睇《 Die Hard》，最興奮梗係啲炸到九彩嘅場面， iPhone用呢個 Exploder Cam app就可以自己拍到。原理其實係先拍一段有主體嘅片，然後再拍只有背景嘅片，個 app就識得駁埋一齊，中間再加勁嘈嘅爆炸聲同火花特效，睇落就好似成個主體炸到散晒消失咗咁，用嚟拍人，仲有啲似《 3D肉蒲團》雷凱欣自爆嘅經典場面添，幾過癮㗎！

有我咁激喎！設計對白

個 app選項唔多，只需跟指示拍完有被炸主角嘅片（例如公仔），再拎走公仔拍多段齋背景片就得，兩段片都唔限時，但每條完成片段只會有一次爆炸 effect。

拍完第一段片拎走公仔後，畫面仍然留住半透明殘像畀你對位，右下角條 bar仲可以調校殘像深淺度。若想睇落夠連貫自然，最好揀淨色背景，咁就冇咁易移位穿崩，或者擺定定 iPhone拍。

完成片段

如唔想拍真人自爆咁衰，最方便都係搵個 figure嚟炸，由本來企定定到爆炸出現火花，畫面之後就得番空背景。

Exploder Cam

*Exploder Cam本來已打入 App Store「娛樂」分類排行榜，但上周五截稿日卻突然暫時下架，原因未明。有興趣下載嚟玩嘅朋友，請留意官網公布重新上架日期。
官網： http://explodercam.com

主觀喪射
FPS Movie FX　 Free

Exploder Cam最大不足係冇武器入過鏡，個人就自爆，想見埋武器就要用呢個槍 app。事關佢拍片後畫面會好似 FPS game咁，喺主觀鏡頭凸支槍出嚟，不停向主角喪射，無論扮同主角對戰，或者從後追住嚟射都咁似，係爭在主角冇得加中槍爆血 effect。

個 app冇得 import片，一定要用佢拍完先加到開槍 effect（最少 10秒），好彩拍完後有得微調成組 effect出現時間，可以約略夾番演員扮中槍嘅反應。

完成片段
免費版有 3種槍揀，喺右邊狂射完，會 reload再喺中間射，每吓都有晒音效。

FPS Movie FX

下載網址：

槍火爆血
Gun Movie FX　$15

若然你連道具槍都有埋，咁就可以用呢個 Gun Movie FX app去加上開槍火花同中槍濺血嘅特效。佢最正係每發槍同每吓爆血特效都係手動加上，保證同演員反應夾到應一應，而且$15版已有 12種槍火圖案、槍聲同血漬，之後仲有得另購（每款$8）， effect夠多。

火花同血漬可以 multi-touch校大細同角度（黃框），再對準槍口。篤右邊個「+」掣就會喺嗰格畫面加一吓 effect，然後掃底部條 timeline，即能跳到其他畫面，再加另一發。

完成片段
可以 import影片，先拍攝演員自己做開槍後座力同中槍慘叫反應，跟住開 app做後期加特效，效果最似。

Gun Movie FX

下載網址：