Beauty Hunt
大開眼界 冼色麗
02年參加內地「明日之星」影視新星大賽入行的冼色麗，拍了幾年國內電視劇先來港發展，加入美亞娛樂後拍過《囡囡》、《 DIVA華麗之後》等港產片，開始被人認識。
去年入行第十個年頭，簽約英皇電影，冼色麗連拍《盲探》等 3套大片，同場孖住劉德華、鄭秀文、謝霆鋒、任達華等神級對手。有望蛇年彈出，冼色麗希望今年有機會返內地拍古裝劇，影視雙殺！
06年簽約美亞娛樂、去年加入英皇電影成為旗下藝人，冼色麗話大公司的確多好多機會。「我入 咗公司幾個月，已經拍 咗 3套電影，有杜琪峯部《盲探》、梁樂民（《寒戰》導演）套《風暴》，同埋郭子健 嘅《特種救援英雄》。雖然戲分唔多，但呢個規模 嘅製作令我大開眼界！我好記得拍《風暴》時，又飛車又爆破又槍戰，我企喺度睇到眼都唔眨，連錢嘉樂都話『你個 shot完 咗，可以坐埋一邊休息吓先喎！』因為我未拍過呢 啲場面，所以我好想睇吓究竟大製作係點！」
《特種救援英雄》由英皇及寰亞合資，集齊胡軍（右一）、任達華（右二）、謝霆鋒（左二）及余文樂（左一），卡士殺晒！冼色麗（紅圈）話喺片場有大把嘢學喎！
宅女唔恨紅
機會大增，但自稱係宅女，平時放假只會匿在家的冼色麗，原來唔恨紅，只要有戲拍已經心滿意足。
「我入呢行咁耐，如果我想借是非緋聞上位就一早做咗，冇諗過要變成 superstar，或者行出 嚟萬人景仰，多少少關注都會驚，所以我從來只係想演好 啲戲，今年目標係可以返內地拍電視劇！未 嚟香港拍戲前，我拍過幾套內地劇，見過佢哋做資料搜集好認真好仔細，同埋之前睇《步步驚心》，覺得內地 嘅古裝戲服好靚，所以呢排都不斷游說公司畀我拍。我唔介意戲分、唔介意錢，最緊要係可以同好演員合作，我希望好快搵到我 嘅代表作！」 
拍《 DIVA》有機會同杜汶澤（右）及容祖兒（左）合作，學唔少嘢啦！
Profile
冼色麗(Bonnie Sin)
年齡： 31
身高： 168cm
出生地：廣東肇慶
我最喜愛內地演員：劉燁 
採訪、撰文：湯勵貞
攝影：范仲良
化妝、髮型： Angela Shum
形象： Bryan@the Flaming
服裝： snidel, another
留言列表
{{ article.title }}
