維他奶創辦人之一陳南昌的孫女陳妙蘭(Christina),開餅店Christina's Creation做cup cake及3D蛋糕做到出晒名,原來她對傳統的賀年美食亦甚有研究。
「以前每逢農曆新年,媽咪都會親自做賀年糕點,而我就必定會跟佢一齊做,所以我好細個就識做蘿蔔糕、年糕、角仔及芋蝦。現在我每年都會親自做五、六十底蘿蔔糕和年糕送畀親朋好友。」
Christina家住紅山半島四千呎獨立屋,每逢過節,都會由內而外粉飾一番。屋內除了美食香氣四溢,Christina自家製作的黏土精品,也為其安樂窩增添喜氣,真正家肥屋潤!
搶購賀年花
甫踏進Christina位於紅山半島面積約四千多呎的獨立屋,大廳並沒有太多的賀年布置,只擺放了幾盆賀年花,她笑說:「農曆新年同聖誕節好唔同,我好少大肆布置,每年都係到花墟,購買合時的賀年花便算,好似桃花、水仙、桔、蘭花、銀柳等,就是我每年必選。今年我仲首次購買叫『五代同堂』的小盆栽,因為我覺得佢的形態好可愛,個名又有意頭。」
除了賀年花,Christina的家亦有不少可愛的小擺設,就像擺放於飯廳飾物櫃上,可愛的公仔擺設和小型餅店模型。「呢隻公仔我儲咗十幾年,每當有新款推出,我都必定購買,依家我諗我的收藏多過佢間舖。
「至於呢兩個小型餅店模型,係我花了起碼半年時間,親手逐粒逐粒做的。而模型的麵包,則是我用黏土造完後,再放入焗爐焙乾而成。做呢啲macaron(馬卡龍),更加搞到我眼都花,一粒一粒搓好後,再要塗上白膠像扮忌廉,係咪好似呢?」
擺放於餐枱上猶如鮮花一樣的黏土花,以及用來擺放餐巾的陶瓷器皿,亦是她親手製造的傑作。
留言列表