面對面
心病還須… 王菀之
台灣歌壇有句說法，說王菀之的聲音「被天使吻過」；香港傳媒亦有種說法，說王菀之人如其歌來自火星、有點低 B。 33歲人，聲線依舊可愛，理解能力依舊「獨到」，這一天，我總算見識到。
《老表，你好嘢！》大熱，我說，這其實是電視劇應該有的水準，跑出是因為該台製作慣性水準之下。王菀之聽了接口說：「多謝呀！」咁都要多謝？再聽同事解說一次，王菀之才恍然大悟：「哎吔，我淨係聽到水準兩個字咋！」
因為電視劇大熱，王菀之成為狗仔隊追蹤對象，上期登上本刊封面，與西裝友飯敍被寫成「叫春」，她自我安慰：「叫春，好似叫新春咁，新年流流，聽落又幾好意頭。」
出道八年默默耕耘，上月憑〈留白〉捧走「勁歌金曲金獎」，傳媒說她拍劇換獎、網友群插未聽過首歌，她也說：「我諗嘢就似小朋友，做咗啲嘢有人讚有獎攞，梗係開心啦！負面同複雜嘅嘢，我唔係唔知佢存在，幾複雜都好，我哋都可以選擇用一個簡單同正面嘅心態去睇。」
不管外面的聲音有多難聽，總有辦法氹自己開心，你可以說她低 B，我倒覺得這體現的是智慧和豁達，對自己這一套處事方法，王菀之還有一種解釋：「我有先天性心臟病，太激動太傷心時，會心跳加速唞唔到氣，與其哽住哽住，不如問吓自己，仲要哽幾耐呢？不如放過自己啦！」
因為心臟負荷不如人，所以選擇豁達一點做人，這是我第一次聽到天下還有這種解救心病的心藥。
有獎好過冇
2004年從溫哥華回流香港正式在樂壇出道，王菀之專心一致唱作八年，去年抵不過王祖藍四個月疲勞轟炸邀請，終於答應出演電視劇《老表，你好嘢！》。上週三（ 30日），劇集來到感情線高潮位，自稱電視門外漢的王菀之卻帶來了最精采的情傷演出，為收視高企的《老表》再創佳績。 2013年的第一個月，可以算是王菀之的事業高峰，電視劇是全城熱話、歌曲〈留白〉獲得「金曲金獎」、傳聞緋聞亦因此被熱炒，人氣一時無兩。
被外界揣測拍劇換獎，王菀之話實情係誠意打動：「王祖藍好似追我嘅男仔一樣，求咗我 4個月！」
憑常石磊作曲、林夕作詞的〈留白〉奪「金曲金獎」，台上容祖兒、 Twins齊齊 O嘴：「我覺得好嘅嘢，外面人任何反應，都唔會影響我。」
凡人都怕惹事，最好多一事不如少一事，我問王菀之：「唱作功力一早被肯定，畀個咁大個獎你咪盞惹是非，係唔係先？」王菀之接口：「唔係先……」聲線可愛，卻很固執：「有獎梗係好過冇獎啦！我諗嘅嘢再簡單啲，啲人服唔服、有幾多揣測，我都當佢係周邊嘅嘢，好似一個小朋友一樣，做咗啲嘢出嚟，有人頒個獎畀我讚我做得好，當然開心啦！呢個台嘅獎項係點產生，我覺得大家有大家睇法，但係我嘅角度，人哋咁大間電視台，咁多歌手咁少獎，點篤都好，篤畀我喎！好似公司嘅年終員工獎之嘛，人哋都係想畀呢個員工一啲鼓勵啫！」
撈過界拍電視，王菀之說既沒想過能換到獎、更沒想到帶來心理和生理煎熬如此之多：「未拍嘅時候，明知自己一路都好怕鏡頭，唔知自己慣唔慣電視城文化，演戲經驗又唔足夠，仲有，係唔係應該專注做番自己歌手工作呢？係對未知數嘅擔心同恐懼。拍落，三日三夜冇得瞓，攰到唔想換衫唔願補妝，你哋唔覺，但係我睇到，自己前後瘦咗 8磅，同一場戲，唔同時間跳拍，我睇到自己前一下仲好肥，鏡頭一轉已經瘦晒……攞獎呢件事，令我開心，但又唔係大家睇到咁重。我份人好自我，我覺得好嘅嘢，例如〈留白〉呢首歌，我攞得出嚟，就唔介意人哋到底係唔係鍾意，反而係人人讚好嗰場戲，明知自己可以做好啲，全靠剪輯彌補到缺失，人睇唔出啫，我自己知吖嘛……我鍾意反思，係想堅持自己真係覺得好嘅嘢。負面同複雜嘅嘢，我唔係唔知佢存在，呢個世界幾複雜都好，我哋都可以選擇用一個簡單同正面嘅心態去睇。」
好人遇好事
「未知」可以帶來恐懼，有時候也能創造驚喜。王菀之說，過去一年，她第一次放下唱作人執着，唱別人作的歌，結果拿了「金曲金獎」；豁出去接電視劇，結果好評如潮，甚至再度唱紅了她十三年前的作品〈我真的受傷了〉：「 Wow！時間過得好快，好多嘢預計唔到，當年，我估唔到呢首歌由張學友揀咗嚟唱，十三年後，我估唔到因為一套電視劇，再次 hit番。」大家亦估唔到，王菀之這個陰聲細氣愛音樂的小姑娘，當年為甚麼會選擇去溫哥華讀經濟學；而王爸爸和王媽媽亦估唔到，乖巧的小女兒竟然逃課缺席不能畢業：「我亂揀㗎！我鍾意阿哥，想黐住阿哥，阿哥喺加拿大做生意，我先至會揀經濟學嚟讀，諗住可以同阿哥一齊咋。結果，咪 find out自己真係唔係讀經濟嘅料囉。讀大學時，我亦係揀返啲自己鍾意嘅堂，一係就去咗夾 band，喺學校出邊學打鼓、學音樂、學跳舞。阿爸阿媽全部唔知……我信主，因為呢件事，我覺得上帝都係睇住我嘅，兜咁大個圈，畀我知道我都係最鍾意音樂。」
王菀之父親都是業餘唱將，視女兒為驕傲， 11年紅館個唱，父母在後台為女兒打氣。《壹週刊》圖片
上月被拍到與西裝友飯敍被指叫春：「佢係隊 band嘅朋友，我哋會打麻雀、打邊爐，但唔會一齊囉。」
00年開始做作曲人，作品有薛凱琪〈小黑與我〉及鄭秀文〈愛上你的床〉，不過最出名，還是寫給學友的〈我真的受傷了〉。《壹週刊》圖片
2000年，王菀之回港做暑期工時認識音樂人伍仲衡，開始唱 demo、做作曲人， 2004年，在張學友的演唱會上合唱〈我真的受傷了〉翌年正式出道，王菀之說，從幕後走到幕前至今八年，還是覺得樂壇裏好人好事比陰謀是非要多：「呢八年，我比較着眼於我得到嘅嘢，多過失去嘅嘢。失去最多都係時間，少咗陪爹哋媽咪，咪 block咗啲期停咗工作陪吓佢哋囉；遇着俾人恰，我會諗人哋未必係專登，就算專登，我反應遲鈍又唔多覺嘅；至於啲負面新聞、刻薄字眼，第一眼見到真係會哽住哽住……哽住哽住，不如笑看人生啦，我工作多、課外活動又多，平時作曲填詞忙新碟，喺屋企陪爹哋媽咪唱吓歌伴吓奏，仲要上堂學整麵包學畫畫，有時間仲要攞嚟旅行添……一個充實啲、時間寶貴啲，就自然唔會畀自己喺呢啲無謂嘢度『戟』住。」
傷心鰻魚飯
王菀之一出世就有心臟病，真有其事，所以，不僅自己，連王爸爸、王媽媽亦會笑看人生配合女兒，平時總怕女兒情緒過於激動。不過防不勝防，一年前懷疑男友變心，還是傷心到心跳加速、呼吸極促：「父母唔知㗎，我亦都盡量唔畀佢哋知，慘啦，做完呢個訪問，佢哋都係會知……」早前王菀之在微博上載鰻魚飯一碗，就是為了悼念這段舊情：「呢餐鰻魚飯喺日本食，食嘅時候我喊緊，因為我預見我哋嘅分手，知道大家未必有下一餐……點解預見分手？女人第六感就係咁，好難解釋，我預見分手，亦都察覺到佢有第二個。嗰餐鰻魚飯食得好傷感，但係亦都好浪漫……做創作嘅人就係咁，所有痛苦都可以係浪漫嘅，就算係分咗手，有時我都會特登叫一客鰻魚飯，為咗再體現一次嗰種心痛。」
張敬軒、西裝友、大隻佬、唱片監製以及 MV導演，王菀之說，娛樂新聞裏的所有緋聞男友冇個真：「其實我都好想有個穩定嘅戀情，公告天下，到時出街拍拖就可以光明正大，係怕無耐又分手，明明已經好傷，仲要諗點同記者交代之嘛……每次分手，我都鍾意去做啲平時唔敢做嘅嘢嚟挑戰自己。上次分手，我就揀咗去要由香格里拉（雲南）再坐十六個鐘頭車嘅稻城亞丁。愈係 google都搵唔到資料、愈係心臟有病可能負荷唔到，我愈係要去。結果，企喺呢個傳說中嘅世外桃源，做到本來以為做唔到嘅嘢，睇到呢個世界咁大，又冇乜嘢咁值得傷心，反而開始期待，下一次，唔知神安排一個咩人畀我呢？」
分手傳近一年，再在微博分享傷心鰻魚飯：「傷心得嚟亦浪漫，有時我鍾意回味傷心。」
矜持盛女
與前男友分手後遠走稻城亞丁探險：「失意後我會特登搵啲嘢挑戰自己，企高啲、睇遠啲，就唔覺得咁傷。」
被寫成 33歲叫春盛女，王菀之說，其實已經過了叫春的階段：「啱啱分手時最寂寞，最怕一個人，有人追，會一時衝動：試吓都好、去到邊，都周圍睇吓有冇人適合。有一次坐長途機，坐隔籬嗰個都幾好，外形唔錯、條件幾好，十幾個鐘仲幾好傾添……本來覺得得㗎，直到落機時，前邊有人唔小心撞到佢，突然間變臉，目露凶光……即刻跌到負一億分！男人黑心最唔要得，好彩，我仲有啲矜持，淨係攞咗佢 contact，冇畀自己嘅（電話）佢！」
好彩，叫春時還有矜持，與飛機男又沒有下一步。王菀之，是值得有一個更好的。 
撰文：朱小博
攝影：范仲良
形象： Bryan@the Flaming
服裝： Vivienne Westwood
化妝： Milk Yuen
髮型： Kate Shek@Hair Culture
場地提供：如心艾朗酒店
留言列表
{{ article.title }}
