一場漂流之旅,主角領略到人生意義,並重拾信仰。奧巴馬睇完小說,都去信作者 Yann Martel,大讚好睇。
艇上有一隻受傷嘅斑馬、鬣狗、猩猩同老虎。後來動物自相殘殺,只餘下 Pi同老虎,兩人更發展出一段人獸友誼。

來路貨

奇幻漂流 inevitable

2012年11月09日 ~~ 第902期 忽然1周

每次睇完一套戲,我都會問一句:想點呀?
盲目追捧明星?無謂嘅官能刺激?真係膚淺。好彩我哋有李安。
新作《少年 Pi的奇幻漂流》,改編自同名文學巨著,一人一虎經歷 227天魯賓遜漂流式生活,既有奧巴馬讚好嘅劇情,亦有占士金馬倫推薦嘅 3D效果,學 Chanel廣告嘅畢彼特話齋:絕對 inevitable(無可避免),一定要去睇。

《少年 Pi的奇幻漂流》 2001年以小說形式面世,一出,除贏得多個文學獎,更獲奧巴馬點名激讚。不過風光背後,其實唔少血淚史。
原來小說完成之後,作者 Yann Martel先後向 5間書商叩門都冇人吼。到成咗名,準備開拍電影時,導演又換嚟換去,由《鬼眼》 M. Night Shyamalan到《天使愛美麗》 Jean-Pierre Jeunet,個個唔係檔期唔啱,就中途有事走咗去。直至 2010年,電影公司終於搵咗李安。


李安自 2009年嘅《胡士托風波》之後,久未有作品。今次重回拿手好戲拍文藝片,仲要首次用 3D,新鮮感十足。據說有機會角逐奧斯卡㖭。


電影中嘅老虎唔係電腦特技,而係用上真老虎拍攝,效果更逼真。


飾演少年 Pi嘅新晉演員 Suraj Sharma,係李安由 3千名演員中揀選出嚟。 Suraj唔識游水亦從未見過大海,要喺水上演戲,真係搵命搏。

3D文藝


李安向來擅長拍文藝片,今次《少年 Pi的奇幻漂流》,應該手到拿來。特別之處,係配合埋 3D。嘩, 3D+李安,係唔係㗎?事實上, 3D之父占士金馬倫( James Cameron)早前接受訪問,除咗力讚 3D效果做得靚,仲話電影打破「 3D只限動作片」嘅常規,將新意帶入文藝片之中。
《少年 Pi的奇幻漂流》(美國、香港 11月 22日同步上映),係講印度少年一家原本經營動物園,後因政局動盪,舉家決定移民加拿大。點知坐船出海時遇上風暴,主角連同老虎、猩猩等動物被困喺救生艇上。
問題嚟嘞。冇水冇糧本身好難生存,家下仲要與虎同遊,人家唔食你落肚已經偷笑啦。不過主角好叻,喺 227日嘅漂流旅程,不但保住命仔、學識面對逆境,順手仲學埋人生意義。我知,劇情根本 mission impossible,所以人哋一開波已經講明係「奇幻」啦。如果現實有咁嘅事,依據高官慣例,一定推個老婆出去死先啦。


喺 227日嘅漂流生涯,主角徘徊死亡邊緣,但絕望之中竟見到奇蹟,令佢重新相信神嘅存在。


成場戲流流長,冇理由淨係一人一虎㗎嘛。電影中段會講佢女朋友,回顧主角喺印度時嘅生活之類之類。


電影以作者身份講出 Pi嘅故事。飾演作者,本來係前「蜘蛛俠」杜比麥奎爾,但李安嫌佢紅得滯,會搶去風頭,所以臨時換上二打六 Rafe Spall(左)。至於成年嘅 Pi則由印度著名演員 Irrfan Khan(右)飾演。

撰文:陳盛怡

arrow
arrow
    全站熱搜

    tvb4life 發表在 痞客邦 留言(0) 人氣()