眼前的聖羅蘭，卸下老佛爺Karl Lagerfeld盔甲，略施脂粉，衣着簡樸，既沒有老佛爺的氣焰，亦不見龍婆的陰沉，說話聲線柔弱，溫婉有禮，復見一個七十七歲的老婆婆應有的慈祥。她笑着說：「依家啲朋友唔叫我羅蘭姐咯，去老人院做義工，啲老友記都叫我『聖羅蘭』。」

訪問期間，羅蘭滔滔不絕，由十六歲講到七十七歲。溫故演藝歷史，她眉飛色舞，一時瞪對大眼，扮昔日電影裏的惡妻；一時又用舞女口脗說：「衰鬼！咁耐唔嚟搵人，好衰o架！」轉頭又扮道友「追龍」吸毒，之後《神鵰俠侶》裘千尺上身，發出淒厲笑聲「鳴……哈哈哈哈……。」差在未放暗器「吐棗核」。

至今仍是獨身的她，信奉天主心靈富足，又有教友相伴，從不覺孤單。但當提及亡母，她卻頓時紅了眼，拿紙巾之際，淚水已禁不住如泉水般湧出，聲線顫抖說：「我仲好掛住媽媽，但願天國再見。」

傷心過後，她又迅速回復心情，喜孜孜地拿起刀叉切骷髏骨頭擺甫拍照。

兩個地點，三套服裝、四輯照片，她四十五分鐘內搞掂，動作快且乾脆利落。以「聖羅蘭」之名，這位七旬婆婆一樣可以好smart。

第三年為海洋公園拍哈囉喂宣傳片的羅蘭，老佛爺style的「聖羅蘭」造型，大受歡迎。

與（左起）盛智文、陳慧琳、黃偉文（右一）、謝霆鋒（右二）一同出席哈囉喂活動，「聖羅蘭」企正中間地位超然。

老佛爺Style

相約三點訪問，羅蘭準時到達，一個人孭住一大袋自己從衣櫃挑選出來的衣服，摸着扶手拾級而上，甫見記者即交帶地說：「今日六點要睇醫生，五點半要走，我哋影相先？定做訪問先？我聽你哋話，帶咗三套衫嚟，仲有飾物，你哋睇吓鍾意影邊套？」

這陣子，羅蘭走在街上，大人細路都叫她「聖羅蘭」，未到萬聖節，已人氣高企。黑西裝、黑手套、黑超，一身老佛爺Karl Lagerfeld造型，擺埋chok爆甫士，下個月踏入七十八歲的她，散發一股懾人魅力。

「啲衫全部度身訂做，拍攝時髮型化妝搞咗好耐，攝影師畀咗好多老佛爺資料我睇，造型跟到足，全身包到實。我鍾意呢個形象。之前都冇諗過效果咁好，好多人在網上話，一定要睇埋last一下，我大叫：『聖羅蘭』。我出席活動時仲入去鬼屋玩，唓，一啲都唔驚，我仲『嘩！』一聲，嚇番佢哋添呀！依家啲朋友唔叫我羅蘭姐咯，去老人院做義工，啲老友記都叫我『聖羅蘭』。」

二十多歲的羅蘭追求者眾，可惜她脾氣大、醋意濃、疑心重，將大好姻緣統統斷送。

羅蘭當年經常與林鳳合作，她坦言在其身上亦學了不少演戲的方法。

演盡壞女人

羅蘭入行六十多年，十六歲便開始在水銀燈下生活，往事回首，她仍然思路清，更如錄音機般自動播帶，細說從前。

「十六歲剛剛放低書包，但年紀太細搵唔到嘢做，幾個同學約埋去睇人拍戲，劇務話唔夠人，叫我哋幾個企埋去睇人賣武，嗰次係第一次做臨記。

「第二次，片場欠個妹仔角色，劇務見我紮住孖辮，造型好啱，叫我頂硬上，我喺大廳經過，老爺同我講，去叫小姐出來，我只係應一聲『哦』，就搞掂！那次有十蚊酬勞。返到屋企我唔敢出聲，點知幾日之後，劇務嚟屋企搵我連戲，阿媽知道後好激動：『邊個畀你去拍戲，唔准出門口。』個劇務猛求我阿媽，最終說服她畀我去拍埋場連戲。之後為咗減輕屋企負擔，阿媽亦同意畀我拍戲，頭半年佢都跟埋去片場睇實。」

在電影《假妻》中，飾演惡妻的羅蘭，完全演繹出其霸道、潑辣的一面。「阿媽睇完問我使唔使做得咁過火？」

羅蘭在電視劇《神鵰俠侶》飾演爛面老太婆裘千尺，樣子核突又恐怖。

羅蘭原名盧燕英，入行後改藝名羅蘭，「那時的紅星，如謝賢、朱江、林鳳、南紅，名字全是兩個字。導演話有個做戲好叻嘅前輩都叫羅蘭，妳有佢一半就不得了。」六、七十年代她拍了不少粵語片，但演的角色全不討好，不是奸表妹、就是舞女、情婦、惡妻、白粉婆，到八十年代拍的電視劇，不少角色仍離不開潑婦和造型醜陋的大魔頭。

「嗰時冇訓練班，冇堂上，要學嘢就要留喺片場睇人哋點做，同埋留意生活所有事情，高級地方要去，低下層的地方都要去。當年有部戲要同林鳳做飛女，我就晚晚去夜總會學跳舞，cha cha、tango、rumba，逐樣學。有部戲同謝賢合作的要做舞女，我就叫朋友帶我去東方舞廳，睇吓啲舞女衣着同言行舉止，揸煙手勢，佢哋真係會講：『衰鬼！咁耐唔嚟搵人，好衰o架！』。另一部戲要做白粉婆同脫衣舞孃，我又搵個沙展去九龍城寨，睇人跳脫衣舞、吸鴉片、食白粉，啲人食完白粉舂吓舂吓，真係見過，你就知點演。」

做奸角呢？羅蘭發出兩聲奸笑，說：「做奸角就要自己諗，仲要睇導演想你點演，有啲想你要去盡啲，有啲又唔想你咁過火，大家要配合。」

羅蘭當年常常穿上泳衣以及性感睡衣演出，她說：「以前啲泳衣件件都係平腳，依家嗰啲個叉高到嚇死人。」

感情交白卷

工作上，羅蘭遇強愈強，只是感情路上，她跌跌碰碰仍未找到可倚靠的肩膊，她頓了一頓，然後歎氣說：「後生時，拍過十幾次拖，但全部冇下文。嗰陣時拍戲時間日夜顛倒，有男仔打電話嚟搵我，早就未起身，晚就未返到，人哋搵咗幾次，以為你擺明星架子，但其實我真係拍天光，朝早先瞓，瞓到中午又要返廠開工。」

羅蘭自稱當年擇偶條件不高，「唔係要有錢仔、又唔使好靚仔，但個個都算幾好樣。大家由約會開始，通常睇戲、食飯，想跳舞就去夜總會。」

每段感情皆無疾而終，她承認自己的三大缺點嚇走唔少男人。她豎起手指說：「一，脾氣大。二，醋味濃。三，疑心重。有時夜晚拍戲未埋位，就打電話去男朋友屋企，點知十一點幾，佢阿媽話佢仲未返，我聽到立即火起，第二日佢解釋話同朋友去飲嘢，我又唔信。有次買咗飛睇戲，我發晒脾氣話唔睇，叫佢撕爛張飛。唉，我有時都同自己講：『你唔係楊貴妃呀！』掉轉我係嗰個男仔都走啦！

羅蘭甚少與父母合照，舊照中，這張四、五歲時與父親的合照算是滄海遺珠，她說：「我好細個爸爸就離世，佢教我做人唔可以貪心，我一世記住。」

「同埋喺片場，成日聽到啲男人講，尋晚喺舞廳，條女點正，嘩！原來男人咁得人驚，漸漸起咗一種恐懼心態。拍拍吓拖我又會諗，你都就嚟唔要我，好，咁我唔要你先，所以拍咗咁多次拖都係冇結果。」

雖然羅蘭至今仍是未嫁之身，但她卻從不後悔，「我只係覺得係緣份囉，有時見到有啲朋友結咗婚又離婚，我心諗好彩我冇結婚。我咁嘅脾氣，如果我結咗婚一定好快離婚。因為當年我的性格好倔，唔會去原諒人、體諒人。直至信咗教之後，先開始轉變。」

哭訴母女情

羅蘭沒有結婚，成就了更多時間讓她照顧年邁的母親，直至九四年母親與世長辭。談及亡母，原本暢所欲言的她，聲音忽然變得沙啞，眼紅紅的說：「好掛住阿媽……」羅蘭正想攞紙巾，淚水已像決堤般湧出，她邊哭邊說：「我哋相處咗幾十年，經歷過打仗，早前我去坐郵輪，有朝坐在甲板度諗，抗戰時期，生活好艱難，唔係阿媽搵啲米返嚟養我，我當時可能餓死咗。」

孝順的羅蘭在母親年邁時常常唸經求聖母，保佑母親長壽。「她真的活到九十八歲先走，感謝聖母。但媽媽在世時，我唔識得帶佢坐郵輪，又唔識得去梵蒂岡朝聖。」她最遺憾未能帶母親去一趟北京，「阿媽一直想去頤和園和紫禁城，但當年大陸又未開放，當時我又唔鍾意大陸，所以冇去到。」

提及九四年離世的母親，羅蘭淚水如泉湧，「我哋經歷好多嘢，佢走咗十幾年，仲好掛住佢。」

抹掉淚痕，羅蘭續說：「我到依家都當她存在，當阿媽在屋企o架！我期待將來我走的時候，神畀我到天國，見番我阿媽。」

羅蘭雖然七年前已退休，但工作仍是接踵而來，現在她閒時會做義工，生活規律又有意義。「我一路都有拍戲，身體方面我keep住做body check，樣樣都OK，係有膽固醇，依家每日要食一粒藥。我仲有食維他命A、B和C及鈣片等。早上一定會飲兩杯水，之後食麥皮做早餐。依家耳仔和腳開始有啲問題，會多啲行路，每日都會行20分鐘，由太子道屋企行到旺角中心。」

問羅蘭怕唔怕老，她說：「每個人都會老，生老病死，人生必經，有咩好怕呢！最好出街唔使我化妝，不過依家唔得喇，因為出街好多人見到我會問，『羅蘭姐影張相得唔得呀？』我當然話得得得，你話唔化妝點得呀！」

訪問尾段，我們一起走到星光大道，捉緊日落景色取景拍照，羅蘭埋位，一分鐘擺出十數甫士，看着夕陽西沉，她說：「人哋話『夕陽無限好，只是近黃昏。』但我覺得是：『得見夕陽無限好，何須惆悵近黃昏。』，可以見到咁靚嘅夕陽，好應該感恩。」