漫遊毒物

X-COM大戰外星人

2012年10月17日 ~~ 第282期 Face

彭導搞嘅《關公大戰外星人》修復極都未上畫,反而鬼仔最近 3D修復咗 1994年經典科幻 cult game《 X-COM》,已經有得玩!
近年歐美遊戲愈來愈悶,唔係第 3身射擊就係第 1身射擊,呢款以外星人襲地球做背景,以全個地球為戰場嘅回合制戰棋 game古老當時興,反而為早前嘅 E3遊戲展注入新意, 18年後又一條好漢,拎盡廿幾個獎項,有機會成為本月 game場黑馬!




廠商: Firaxis/2K games
類型:戰棋
人數: 1人
售價: XBox360$388、 PS3$428、 PC$328
PC版系統要求規格:
Windows 7或 Vista、 2GHz雙核 CPU、 2GB RAM、 20GB硬碟空間、 NVIDA GeForce 8600GT/ATI Radeon HD 2600TX或以上 

當佢機戰咁玩


新版《 X-COM》保留荷里活 B級科幻片懷舊味,好似睇緊添布頓《 Mars Attack》咁有味道。但佢嘅畫質絕對唔差,版圖變得 3D有深度,戰鬥時更會變成第 3身視點。咁究竟點玩?你當佢係外星人版《機械人大戰》,應該就好易理解。每 round開始前先喺「 MIB式」秘密基地練兵、組 team、買道具;完成後就去控制室揀版打,一直打到怪物死晒,攻略完成就返基地,又再分錢、升呢、出戰……


任何時間按 space掣(記者試玩 PC版),就進入第 3身射擊畫面,可以喺下方揀槍械、手榴彈等武器。亦可食道具回復體力。


睇網圖,後來可以用呢種飛行器,從高空轟炸班外星人,超期待!


地圖地形結構複雜,用家可尋找掩體物,狙擊手亦能佔據高地取得上風,同時仲有手榴彈等「地圖炮」,可以自己校角度發射,真係幾似《機戰》。


行動係回合制,我方 4至 6名士兵行完就到對方。初期人物一 round有 2格行動力,可以分配來用來移動、攻擊。留意彈藥有限,用光後冇法子攻擊。

終極外星神作


《 X-COM: UFO Defense》生於 DOS年代,當年戰棋 game仲未流行實時制, VGA級數粒粒畫面、回合制慢慢培育士兵,而唔係連線對打、鬥快搶資源。結果佢以良好嘅故事同操作性,得 IGN網畀 9.4近滿分評級,係鬼仔 game界推崇至今嘅神作!

新舊比較圖


當年設計反而幾有日系漫畫味, 𠵱家都幾重 FPS遊戲感。


1994年版


2012年版

可惜係其版權公司 MicroProse被孩之寶收購,多年來以同名義推出續集卻反應冷淡。當年負責《 X-COM》系列嘅原班人馬 Firaxis製作室,最終等到 2001年先拎番版權重製,而且冇盲從潮流改篇為成另一款 FPS( 2K另有一 team人搞緊),睇番 E3玩家反應,佢哋呢鋪賭贏咗!


1994年版


2012年版
戰鬥機設計原來都跟番以前舊版, fans一定好高興。

多種族大混戰


而喺你揀世界版圖嘅過程中,選唔同地區、國家,都會影響地球軍、外星軍勢力平衡,更要多加收集外星科技,搵科學家研究取為己用。記者暫時只玩到 2、 3版,睇 trailer,外星人有超能力,可以操縱地球士兵令我哋鬼打鬼。新版更可能唔只得一種外星種族,仲見到地球兵會跟某種大隻佬外星人組隊,夾擊「羅茲威爾」大眼外星人,有排玩!
其實近年唔少機迷都轉玩 facebook平台遊戲,就係貪佢唔係實時、唔使同人對戰趕時間,可以慢慢玩、慢慢執靚啲角色。自己都有玩 fb版兩隻《 The Sims》,所以玩起來好快就習慣。但如果你都係喜歡快上快落、超強官能刺激,《 X-COM》就未必咁啱你。




暫時未知究竟係地球人轉過來發明洗腦機操作外星兵,定係某個外星種族同地球人合作。究竟呢個組合除咗多人網戰外,可唔可以喺 1P時用呢?


個秘密基地都幾大,日後仲可以加房,比如外星人牢房、武器開發室等等。


士兵係重要資源,打《機戰》,萬能俠爆炸下一版可再出,《 X-COM》士兵只得幾格生命力,死後冇得復活,要賺錢買好裝備。

未夠 PSV咁 Cult
《地球防護軍 3 portable》


嫌《 X-COM》都係太荷里活大作,可以試呢款 PS Vita手機遊戲《地球防護軍 3 portable》。佢來自 PS2年代 3千日圓 cheap game系列 Simple 3000 series,卻因為騎騎呢呢嘅設計(外星人唔係蟻就似蜘蛛),仲有少少爛嘅畫風,出奇地有唔少捧場客,一直去到 XBox360共有 3集。而 PSV就係將 360版改良成 WiFi連線 4打嘅 FPS CO-OP遊戲,玩家可以扮兵仔、坐坦克,甚至駕駛日系怪獸片獨有嘅機械人出戰, cult過《關公大戰外星人》。$249/PS Vita/FPS/1至 4人




畫面都可說係幾爛吓,不過勝在兵種、武器、載具都好日系科技片 feel。佢仲強調唔使機駁機,上 WiFi連線都能夠搵 partners。

七星俠客串  YouTube膠片宣傳


為咗令件事更膠,廠方仲特別拍咗條超低預算 YouTube片宣傳。話說 70年代日本災難片想扮國際化,喜搵不知名外國人演出,仲要配番日文對白,呢位講日文嘅結成隊員正好就係搵個黑人演,你睇佢演技幾浮誇!





撰文、攝影:鍾世傑

arrow
arrow
    全站熱搜

    tvb4life 發表在 痞客邦 留言(0) 人氣()