Fun App

玩轉韓星　 Oppa Gangnam Style

2012年10月17日 ~~ 第282期 Face

韓國大叔 PSY憑騎馬舞 hit爆全球，佢首《江南 style》喺 YouTube點擊率更突破 4億，認真巴閉！聽聞 11月佢仲會殺到嚟香港舉行嘅《 MAMA音樂頒獎禮》，親自現身表演跳馬舞！等唔切？唔緊要，有粉絲已經用 AR技術為大叔寫咗個跳舞 app，等你隨時可以帶佢出街陪你跳跳跳。而喺呢個大吹韓風嘅秋天，又點少得其他大熱 K-pop偶像嘅官方 app，等你玩轉偶像。

PSY大叔隨時跳馬舞

《江南 Style》大熱人人爭住扮， YouTube上面擺滿質素差勁老翻貨，好笑變嚇親。好在去到 smartphone，就有粉絲善用 AR技術，等玩家只要 print張圖出嚟，打開個 app，並將手機鏡頭對住張圖， PSY大叔同佢 MV拍檔盧弘哲就即時喺屏幕上跳騎馬舞，仲有埋歌聽，一開就爆笑。如果發揮創意，將幅圖放喺 barbie床上，大叔嘅跳舞背景更即時變成張姣騰騰嘅大床，勁過癮！

PSY Gangnam Style AR
Android Free

騎馬大叔召喚 step

喺 Play Store安裝 app時，記得順手 download埋，由 PSY親自設計嘅卡通圖。

Print張圖出嚟，將佢平放喺唔同背景上。

打開個 app，並用手機鏡頭對住張圖，就會見到 PSY喺畫面上大跳騎馬舞。值得一讚係個 app唔使水平影住幅圖先啟動到馬舞片段，令粉絲可以發揮創意，幫 PSY加入唔同背景。

騎呢玩法夠創意

江南 style未必一定要做男子漢，換個背景畀成堆熊圍住， PSY即時變到細細隻， cute死！

再試吓將幅卡通圖上下調轉，騎馬大叔仲會變成後排，啱啱畀高達一刀劈落嚟， oh no！

T-ara索女任你轉

上月嚟香港開完 show case嘅 T-ara，傳聞嚟緊 1月更會正式喺香港開 con，咁啱佢哋都出咗官方新 app。 8位成員各自將自己 360度全相擺上手機，畀 fans喺屏幕上將佢哋轉轉轉，轉嘅時候佢哋更會做出 cutie表情。另外，個 app又有埋製作 video，由佢哋介紹個 app點玩，冧到爆！唔知 download邊個成員個 app先？就揀最性感嘅孝敏（ Hyomin）啦，簡單一條短褲襯衫，已經夠吸引。

TARA Official[HYOMIN 3D]
Android Free

打開 app就見到孝敏坐定定對住你笑，用手指橫拉一下畫面，佢就跟住你轉。 Click左下角個打圈 icon，又可以叫孝敏自動轉，仲會做唔同表情，好可愛！

狂捽 2NE1

將會同 PSY一齊喺 11月頒獎禮嚟香港嘅，仲有同門女團 2NE1， 4位女孩子唔走一般女團嘅制服路線，另創潮流指標，仲同 Jeremy Scott超 friend！入場怕唔識佢哋嘅歌，不妨單撈呢個官方捽碟 app，一邊聽住歌一邊玩音樂 game，快入腦之餘，仲可以儲到佢哋嘅虛擬閃咭，你 like樸春定 Dara先？

雖然音樂 beats只係分 3條 line衝落畫面，不過成日出現「 Z」字形㩒法，有難度。

2NE1 SHAKE
iOS/Android Free

Android

iOS