嚇破膽狂喊
成功被玩，導演即時安撫她。攬實女助手的 DaDa驚魂未定，不停向着導演說：「 Sorry sorry，真係好驚呀，唔好意思失禮晒。」
娛聞樂
扮鬼反被嚇 細膽 DaDa喊爆
𡃁模界阿姐 DaDa陳靜，日前孖住有「翻版朱茵」之稱的另一 𡃁模羅彩玲（ Vivian），為一個網站的哈囉喂特備節目《索女玩盡末日萬聖節》任靚鬼嘉賓，一心嚇吓班宅男。
點知當日衰鬼導演私下安排臨記扮鬼匿埋化妝間，熄燈突襲 DaDa。一早話怕鬼的 DaDa當場被嚇得花容失色， 𠵱嘩鬼叫合十祈禱，仲攬實助手喪喊。我見猶憐，有冇靚仔呵番呀？
Da Da俾鬼搞喊爆
由 𡃁模搖身一變成三千萬電影票房女星的 DaDa，憑着三級笑片《低俗喜劇》「爆炸糖」一角成功突圍，雖然拍戲資歷淺，但她卻入圍台灣金馬獎「最佳女配角」，為 𡃁模界爭光。
平日樣靚身材正的 DaDa就見得多，日前她卻反傳統，扮恐怖艷鬼為網站的哈囉喂特備節目任嘉賓。拍攝當日 DaDa準時早上十點便到葵涌的錄影廠化妝，其間她分別換了兩個爛頸兼七孔流血的喪屍 look，之後便埋位拍嚇鬼造型照。
化鬼樣
化妝期間， DaDa不時對化妝師說：「我真心覺得呢個妝好襯我，好鬼靚，仲愈睇愈性感㖭！」
紅遮鬼彈出
DaDa獨自在化妝間呆坐時，突然紙紮鬼在她身邊跳出來，嚇得 DaDa不斷尖叫，而紙紮鬼亦窮追着 DaDa，務求嚇死她為止。
逃出生天
慌張過度的 DaDa衝出化妝間門口，尖叫搵救兵。
祈禱求救
沒有宗教信仰的 DaDa，驚到連環做出祈禱動作，十分搞笑。
憑《低俗喜劇》升呢的 DaDa，角逐台灣金馬獎「最佳女配角」。她說：「到時預咗坐足成晚睇騷，不過有得行紅地氈已經好好啦！」
不過好戲在後頭，拍完硬照才到戲肉，導演預先安排兩名臨記嬸嬸在化妝間暗角匿埋，工作人員呃 DaDa獨自在化妝間等做訪問。
嗌救命祈禱
在房內呆等十分鐘的 DaDa，原本一直玩手中電話，此時第一名老臨嬸嬸攞住三支香衝入房在 DaDa身邊拜四角，並唸唸有詞：「衰仔，你哋玩夠未呀？」然後便走番出房。此時懵然不知的 DaDa仍未有反應。
老臨嬸嬸走後，繼續在化妝間呆坐的 DaDa望住四堵牆發呆，突然房內變得漆黑一片，裝扮猶如紙紮公仔的另一臨記在 DaDa身後彈出，並拿着紅色遮追着她狂嗌狂叫，嚇得 DaDa花容失色大叫救命，並急步衝出門口，做出祈禱動作，再攬實助手喊爆求救，喊到妝都溶晒，整蠱行動十分成功。
事後 DaDa飲了杯熱茶，才稍稍定過神接受訪問說：「真係冇諗過會玩得咁大，我一心諗住嚟嚇人，點知俾人嚇番，真係無話可說。依家諗番其實好多破綻，但嗰時嚟得太快，諗唔切。依家諗諗吓其實我經理人知唔知呢件事呢？我開始好懷疑……點解我成日俾人整蠱？下次一定要做整蠱人嗰個！」下次搵個壯男傍實，乜鬼都埋唔到你身啦！
爆出半桶金
DaDa憑三級片《低俗喜劇》的「爆炸糖」升呢，成為今屆台灣金馬獎「最佳女配角」唯一的提名香港代表。突然人氣急升，商場騷價由 3萬變 6萬，內衣騷價由 4萬變 8萬，一個 double，「爆炸糖」絕對鹹得有價值。
Peach John內衣騷（ 9月） 騷價$8萬
化妝品牌活動（ 9月） 騷價$6萬
德國啤酒節開幕活動（ 10月） 騷價$6萬
驚慄片（接洽中） 片酬$30萬
共$50萬
Vivian發老脾
DaDa嚇破膽，相反另一女角 Vivian，由於玩慣鬼屋，對突襲女鬼完全零反應，更大聲喝罵女鬼，比 DaDa大膽得多。
「朱茵」變殭屍
《蘋果日報》圖片
有「翻版朱茵」之稱的羅彩玲 Vivian，放下可愛面孔扮白面殭屍，望落真係幾恐怖。
照辦煮碗
導演將嚇 DaDa的伎倆放在 Vivian身上，可惜她完全唔驚。
喝罵女鬼
只得 17歲的 Vivian對於自己被玩，發老脾當眾鬧人：「咪玩啦！」便衝入洗手間。
留言列表
{{ article.title }}
