媽咪姐
蘇基！ So Good！
蘇基 Go！蘇基 go go go！
古佬話：「我從來唔奢求富泰嘅生活。話你聽，我今日用緊嘅 GALAXY電話，係第一部咁貴又自己用錢買嘅電話，以前我啲電話全部係啲親戚因為要換新電話，而送俾我用嘅舊機。我唔介意㗎！仲覺得好幸福，成日可以換電話，哈哈哈！」正能量爆燈，難怪佢可以做出蘇基嗰種有情有義，令萬千網民 like爆啦！
周二（ 25日）下晝五點，當日已經做咗 3檔訪問嘅蘇基，就帶媽咪姐殺入將軍澳厚德街市，測試吓自己嘅人氣。嘩！唔去猶自可，一入到去，媽咪姐隻腳爭啲俾班師奶們踩跛。班賣菜靚姐爭住大叫：「蘇基，買我呢檔啦！」個個搶住叫佢合照，真 crazy！兩三下手勢，蘇基就買齊鹹魚、粟米、紅蘿蔔同唐生菜。「平時我係煮飯公，如果我要開工，老婆同個女就上外母屋企食。」嘩，呢啲男人 so good啦！
逼爆厚德街市
蘇基係觀塘街市常客，呢日轉場現身厚德街市，仍然得到師奶們厚愛，爭住為佢舉機：「蘇基，企定俾我影張靚仔相。」暖在心頭。
6蚊斤唐生菜，媽咪姐 𥄫到菜販靚姐偷偷塞多一小棵送蘇基，一邊豎起手指公讚佢做得好之餘，仲話撐硬佢攞獎，好有人情味。
買完餸，學生妹見到蘇基哥哥就尖叫，仲忍唔住跑過嚟同蘇基哥哥影相。
夜晚八點九，古佬做埋第 4檔訪問，趕返歸見吓老婆同乖女，綁番條巾，即刻變番個型佬。
大變身，原來為揸綿羊仔，佢臨走前千叮萬囑媽咪姐：「記得拍片呀，我真係好型㗎！」收到啦。
古佬一放假就陪老婆（左起）、 14歲有腎病嘅乖女 Tammi及親友兒子周圍去。慳家嘅佢，只去過 3次旅行，「 90年演藝畢業去咗一次英國， 02年又去咗美國探親，前年聖誕一家三口去泰國。」但古佬卻年年俾錢請老婆、阿女同外母返美國探親，佢嘅幸福係睇住屋企人開心。
《國產凌凌漆》呢場公安戲，經典！古佬雖然只得一 part，但卻做到星爺要求，唔簡單。
蘇基呢個 camp camp角色係古佬入行 22年最大突破，「無憾㗎喇！但話唔想攞獎就呃你，不過真係有先算啦！可能連提名都無。」
留言列表
{{ article.title }}
