青春有價　孫耀威



面對面

青春有價　孫耀威


我和攝影師都是七十後，都記得中學年代孫耀威在中港台校園裏刮起的旋風何其威猛；都記得十多歲的時候，有多着迷〈愛的故事上、下集〉。
一眨眼，二十年過去，當中學雞都變成麻甩和師奶， 39歲的孫耀威憑甚麼還跟二十年前出道時 19歲一個模樣？
孫耀威說自己不愛保養不懂護膚，常常用廁紙狠狠落妝被化妝師罵，駐顏的方法他雖然沒甚麼心得，但是可以肯定的是，為甚麼自己不至於未老先衰：「十年前，我選擇喺電視圈最紅嘅時候返香港出廣東碟。
係㗎，如果我拍到 o依家，賺人仔分分鐘已經賺咗幾層樓，不過一定變咗麻甩佬，心態同樣都老過實際年齡囉！」
有錢搵時不賺盡、有人氣時不撈盡，孫耀威說自己就是喜歡跟經理人和唱片公司唱反調，死守住不斷萎縮的廣東歌市場不放手，輸掉幾層樓，但是賺回來 19歲的那團火。
誰說青春沒有價？孫耀威說有。

沒有錢還有夢




下個月十日，孫耀威的全新廣東大碟《 A Second Thought》即將出版。一說起新碟，孫耀威興奮得不得了：「新碟我自己寫咗十首詞、九首歌，又係自己監製……呢隻碟未出我心已經打好未來五至七年嘅計劃，我想做一個全國巡迴嘅舞台劇、諗咗下一隻國語碟有咩概念、亦都有個故事度緊，想自編自導拍一套戲……」
新碟有一首歌叫〈谷底〉，孫耀威說出碟做廣東歌是賠本生意，這些年少不免要多接騷、拍劇維持收入支持做碟理想，不過當年搵得最多在內地拍劇的日子正是自己的谷底：「 o依家我可以有好多諗頭，計劃到三五七年之後，搵得唔多，但係我快樂。以前呢套劇未拍完，經理人已經幫我接咗下一套劇，劇接劇，我根本冇得計劃、唔可以計劃。我個腦淨係得劇本，我自己唔識邊個係孫耀威，女朋友一年有十一個半月見唔到我，一樣唔知邊個係孫耀威，對佢嚟講，我好似麥兜一樣，係個唔存在嘅卡通人物咋嘛！當時我拍劇唔開心、又發現圈外女友有第三者，我對人生絕望到，係覺得全世界講嘢都好似亂槍掃射、好似個個攞緊把刀割緊我嘅喉嚨一樣，嗰種孤獨無助，真係好痛、好 hurt，瞓喺度望住個天花板，淨係好想個天花板可以冧落嚟壓死我……就係一念之差，我話畀自己聽，係痛喎，但咪就係痛咋嘛，有咩大不了啫？唔使死㗎！我經歷過高低潮，我諗未來都仲有高潮同低潮等待我，我準備好啦，幾衰幾難過都會過，唔使死喎！」 

一百米與一百萬


孫耀威中學會考是 5A1C的沙田官立中學狀元，大學是中大電腦系高材生， 19歲參加歌唱比賽唱國語歌從台灣紅到返香港，起步雖快，過程卻一直不按章法。唱片大賣時，他想去美國讀書，搞到得罪前經理人；冇得唱歌被迫去內地拍劇，憑《懷玉公主》紅透中港，他又黐起條根回港出碟；唱片公司叫他賣斯文靚仔，他新碟偏偏自把自為唱舞曲又玩搖滾：「我成日都話演藝圈唔可以用經濟學嘅算式去計算，我都讀過經濟學，數學仲攞 A添。呢行邊有得計，係講 feel！嗰一刻 feel like就去做，千祈唔好俾團火熄。我唔係反叛，唔係一定要同經理人同唱片公司對着幹，我係想做到想做嘅嘢啫。小學時代，我係田徑高手，但永遠喺學校跑得最快，一出去比賽就怯場，一起步跌，咪就係同劉翔一樣囉。我成日問自己，孫耀威，你到底幾時跑得完呢一百米，我係要自己一定要跑完呢一百米……前排我上網發現，原來呢二十年，我嘅飛行里數已經累積咗一百萬哩。你話，如果我當年唔係迫自己跑完嗰一百米，又點會知自己可以跑得更長更遠呢？」
最紅的時候，一張碟閒閒哋賣十萬張，一集電視劇起碼收十萬人仔，孫耀威也說不快樂：「我試過最癲，係晨早沖完涼坐喺度睇汽車雜誌，揭到架一百萬嘅車，嗰朝就落車行買架一百萬嘅車畀自己。嗰陣時年少得志搵錢易，有一百萬就使一百萬，覺得咁唔開心咁辛苦點解唔可以獎勵自己？ o依家，架保母車由司機揸，用咗五年都冇換過，靚車同以前一樣咁鍾意，不過個人已經夠快樂，仲使乜一定擁有佢？」


92年出道時，風頭直迫小旋風林志穎，兩派歌迷勢不兩立：「我 哋其實好 friend，當年車都買埋同一款。」


2000年被台灣唱片公司雪藏不能出碟，孫耀威與台星鄭家榆合拍了劇集《懷玉公主》，紅遍中港台。


09年鼻生瘤聲帶出血，孫耀威要暫別樂壇中西合璧治療：「我做唔到普通人，唔知冇得唱歌可以做乜。」


新碟下月 10日推出：「名為《 A Second Thought》，係話 2012年多 咗一秒，希望每個人都諗多一秒、諗多一次。」

和陳美詩遊巴士河


39歲的孫耀威像個大細路，說起車像個小孩一樣雀躍：「我見到靚車嘅衝動，絕對比見到身材火辣美女嘅衝動高；我屋企床頭永遠有幾本汽車雜誌，幾唔開心都好，揭幾版就瞓得着，不過鍾意唔使一定擁有嘅。對我嚟講，有一億身家，可以買三百萬嘅跑車。得一千萬身家，買架三十萬車好啦。我仲未成家立室，第時可能生十胎呢？我仲要留番啲錢畀我嗰十胎讀國際學校㗎！」
與無綫藝員陳美詩拍拖兩年多，孫耀威雖說還沒有「 feel like」去結婚生仔，但卻不諱言，陳美詩是他近年來最肯瞓身去愛的一任女朋友：「我諗嘢快講嘢又快，助手都跟唔到我，但係 Macy跟到，佢係一個好聰明嘅女仔；我做咗二十年藝人，已經唔識做普通人，但係同 Macy一齊好得意，佢係同行，我早出晚歸、個個星期都要飛、拍戲有吻戲，圈內嘅嘢，佢一概明白唔使解釋，但係同時佢又畀到我圈外感覺，令我有機會做普通人。上個星期咋嘛，我陪佢去遊巴士河，由屯門搭到出中環。原來坐喺巴士上層嘅風景，係我呢世喺保母車都睇唔到㗎！」


10年與陳美詩情侶關係曝光，去年女友沖繩拍攝旅遊節目遇上車禍，回港後由孫耀威陪同到醫院檢查。


08年拍攝無 綫劇集《 Click入黃金屋》與楊秀惠撻着，孫耀威說分手後沒有再聯絡。

世事有絕對




甚麼時候結婚，孫耀威說等有朝一日肯定不會離婚時才會結。
我說世事冇絕對，誰結婚能保證不離婚？孫耀威說他可以。
「結婚就好似一段生命嘅開始，離婚等於死亡。冇嘢係解決唔到、非死不可。我見到身邊好多人話解決唔到、唔愛，好似湯丸皮一樣，兩個人一齊，因為誤解、說話同糾紛，包到一層一層，包到個湯丸中間係豆沙餡定屎都唔知。其實我哋逐層逐層拆開，終歸會搵到包喺最中間嘅夾心，搵到你最鍾意嗰個人，記起當初你點解咁愛佢！」
一番話有道理，但是未免把人性和感情看得太過簡單和純粹。 39歲的孫耀威，有時候心境真的像 19歲。
arrow
arrow
    全站熱搜

    tvb4life 發表在 痞客邦 留言(0) 人氣()

    E-mail轉寄