老公,唔使諗啦! BB就叫洪星,第時入行紅硬呀!(設計對白)
媽咪姐
洪天明為 BB徵名被玩
洪天明同周家蔚啱啱先宣布即將為人父母,但第一次做人老竇嘅天明,已經心急到喺微博公開請老友幫個 B改名。佢仲講明唔要啲乜嘢洪白藍、洪綠燈、洪七公呀等等。轉頭莊思敏已經火速回應,幫 BB改咗幾個名,其中有名牌洪雙囍,又有國寶洪貓,想有氣勢啲,仲可以叫洪峰。楊怡見咁熱鬧,忍唔住改埋一份,建議用單字,叫洪興,好「古惑仔」 feel喎。
周家蔚個肚愈來愈大,而洪天明諗 BB名就諗到頭大,其實老婆依家佗咗 4個月啫,天明唔使急。
媽咪姐聽講阿爺洪金寶都搵緊人幫個未出世嘅孫仔改名,因為現任阿嫲高麗虹唔多識中文,而正牌阿嫲(洪金寶前妻)又係韓國人,更加唔識幫個孫改中文名啦,咁都係由洪金寶傷腦筋啦。查實姓洪已經算係易改名啦!姓吳同姓老呀嗰啲,咪仲難改好名!只不過未來老竇洪天明太過緊張啫。
留言列表