客廳很細，只擠得下布梳化和組合櫃。但躺在梳化上的河國榮，依然自得其樂和狗玩錫錫。
星悅居
河國榮 老外狗竇
樓價屢創新高、大海充斥膠粒、教育強迫洗腦，香港人的痛苦指數是全球排名第三，絕對有根有據。 47歲的河國榮，大可返家鄉澳洲，追尋真正生活，但他偏向虎山行，選擇在港落地生根。他這面旗一插便插足 25年。
深知在港置業遙不可及，河國榮於是選擇租住西貢村屋，坐擁 180度無敵海景，比起石屎森林中的所謂的「維港美景」更具實感。他和不願上鏡，屬香港人的太太結婚 24年，已決定放棄生兒育女，但就養了十「個」狗，屋企名副其實是狗竇。
河國榮視愛犬為親生仔女，所以要用「個」字作量詞，要將寵物人性化。快樂向來在生活點滴上隨處可見，不是港人的河國榮在香港找到了。
客廳對面是河國榮的工作間，他攤開兩隻手便可同時彈電子琴和玩電腦，狹窄程度可想而知。
採訪當日，河國榮約了記者在村口等，不久他便拖着四「個」狗迎接記者。當時赤着雙腳的河，以純正的廣東話向記者解釋：「習慣咗！踩下石地、草地其實都好舒服。」河國榮的家比想像中隔涉，但再艱難的路都算值得，因為他的家除可環抱無敵海景，連空氣都甜啲！
與太太分牀瞓
河家的十「個」狗，並非恃可愛行兇的西施、芝娃娃，全部都是領養回來的大狗，部分更是七癆八傷，要花時間令牠們重新生活。十「個」狗雖然牛高馬大，但原來膽量細得驚人，河國榮說：「佢哋一到夜晚，自己會分配瞓覺位置。有啲瞓主人房，有啲瞓廳，有啲瞓花園平台。咪睇佢哋大大隻隻，居然怕行雷。前排打風，嗰晚撲晒入我間房，搞到我同太太要分開瞓。我瞓梳化、太太瞓房，分頭安撫佢哋。」
六百呎村屋，擠滿十「個」狗，難得全屋沒有絲毫狗味。不過仔細去看，發現屋企部分牆身剝落，略嫌殘舊。「好多業主都怕租客養狗，驚啲狗會搞到間屋烏煙瘴氣，所以唔肯租俾我。難得搵到呢個地方，我唔會再諗住搬，加上樓價咁貴，買唔到㗎喇！都住咗七年，舊係正常。」
河國榮珍藏不少黑膠唱片，放滿整個書櫃。「喺呢度曬住太陽聽歌，好舒服。」
廚房裝修是全屋最企理，河國榮說：「都係我老婆嘅功勞啫！」
為了捕捉狗狗最自然一刻，河國榮特登買了一個微型小相機，全日不停影。
河國榮原本養了十一「個」狗，不過其中一「個」早前患腸胃炎不治，於是他將亡狗骨灰放入這個袖珍骨灰盅內。
河國榮在廚房加了圍欄，禁止十「個」狗入內惡搞，而他手上的噴壺裝滿醋，用來嚇狗。記者發現廚房牆身十分殘舊，他說：「有人住嘅屋企係咁。」
綠色田園生活
河國榮鍾意赤着腳四圍走，尤其喜歡坐在平台欄杆上遠眺海景。
屋內破舊，但屋外卻是另一番景象。除了海景外，屋外更有一個二百呎大平台，延伸到一塊綠油油的大草地。河國榮閒時喜歡一邊和十「個」狗在草地上散步，一邊用鏟草機修葺草地，真正過着田園生活。「我喺澳洲農場長大，覺得呢種生活最舒服，依家我仲開始食齋，唔想食肉，覺得人類對啲動物實在太殘忍。」
河國榮選擇用「酸醋噴霧」來對付十「個」狗，「佢哋一爭嘢食，我就拎住支有醋嘅噴壺兇佢哋，佢哋即刻散開，真係幾有用。」 
河國榮的十「個」狗非常黐身，他走到草地剪草，有幾「個」狗亦跟住唔捨得走。
平台一邊放了兩大個盆栽，河國榮嘗試種番茄，他說：「仲未係時候收成。」
河國榮鍾情中國文化，他會用毛筆寫書法，而且字體十分標準，現時仍定期搵老師學藝。
留言列表
{{ article.title }}
