曾揚言有好多億現金揸手的王維基，始終打動不了馬德鐘和阿佘，最後惟有一拍兩散。
馬德鐘、阿佘和廖碧兒都是「創藝」旗下藝人，王維基閂水喉後，馬、佘二人部署返無綫。相反曾為王維基拍過一套劇的廖碧兒，未獲無綫錄用。
娛聞樂
起王維基飛腳 馬德鐘 阿佘部署返無綫
決心搞好免費電視台，王維基早前不惜「賣仔」，出售一手創辦的「城市電訊」，套現 50億元，更大手筆將當中的 20億投放在免費電視台上。電視牌照縱然未攞到手，但王維基已不停開劇。
一向唔怕燒銀紙嘅王維基，上周突然向旗下的「創藝」開刀，炒掉包括簽有馬德鐘、佘詩曼、廖碧兒的劉傳弘（ William）、吳菁茹（ Tina）等三位高層。據知王維基希望馬德鐘和阿佘名正言順幫他拍劇，可惜傾唔掂數。加上王維基的免費電視牌照，一直只聞樓梯響，馬德鐘和阿佘等藝人為求自保，部署食回頭草重返無綫。
佘詩曼與經理人 Tina由無綫合作至今，關係非淺。早前阿佘離巢返大陸搵真銀， Tina亦跟到實。
甚有生意頭腦的王維基，一早吼中劉傳弘（ William）旗下的「創藝」夠疊馬，盡攬馬德鐘、佘詩曼等小生花旦，去年底便和 William合組經理人公司「紅星會館」，表面上叫 William簽其他藝人幫他拍劇，實則覬覦馬德鐘、阿佘等紅星，希望由「創藝」過檔「紅星會館」，收歸己用。
新劇製作超支
「紅星會館」成立後， William亦馬不停蹄做嘢，執行王維基的「銀彈政策」，不停招攬藝人。知情人士說：「王維基出手咁闊綽，加埋 William人面咁廣，好快就簽咗廿幾位藝員。呢批藝員全部係無綫老臣子，好似艾威、冼灝英等，可惜一線只有林文龍。」王維基最想 William搞掂一班可以孭飛的小生花旦，「 William講到牙血都出埋，有好多有叫座力嘅小生花旦都恨過檔嗰筆錢，但長遠嚟睇，佢哋覺得王維基唔夠無綫砌，所以仲係十五十六。」
唔想衰俾人睇，即使牌照未到手，電視大樓未落成，王維基如常揼錢開戲，希望以此顯示實力，說服馬德鐘、阿佘等一線藝人簽約過檔。知情人士說：「無綫資源完善啲，外景接廠景之下，一集劇一般兩日半起貨。但王維基冇廠做支援，惟有每集劇都拍街景，或者借場地，搞到要五日先拍得一集，製作費超支。」
馬德鐘和無綫重修舊好，他除了排期宣傳《飛虎》外，更特登由國內返港出席樂易玲生日會。
馬德鐘簽部頭
水倒咗收唔番，王維基於是先閂減啲水喉。那邊廂，「創藝」旗下馬德鐘和阿佘亦有感王維基開始慳荷包，決定坐言起行重新投靠無綫。馬德鐘連日來出盡力宣傳《飛虎》，終於贏得無綫對他的信任。據知雙方現已落實簽部頭約，準備年底拍《飛虎 2》。而一直唔肯做反骨女的阿佘，亦落實下月再拍無綫劇。無綫製作資源部總監樂易玲亦坦言攞人成功，「我哋同馬德鐘嘅合約處理中，我哋係考慮拍《飛虎 2》。」馬德鐘則透過經理人回覆說：「無綫同佢係有接觸過，我哋會考慮拍《飛虎 2》。」
既然冇人肯聽話，王維基惟有向「創藝」開刀， William亦辭退埋「紅星會館」主席一職。
突然大地震，一班當初被 William撬走過檔「紅星會館」的藝人坦言聽聞此事，艾威說：「知道有呢件事，不過唔會影響到我。我下月開始拍王維基嘅劇，一口氣會拍三部㖭！」記者亦有問過王維基，發言人鄭小姐否認縮皮，她說：「我哋係劇照拍，人照簽。」
向管理層開刀
王維基為了招兵買馬，與 William合組經理人公司「紅星會館」，不過雙方合作僅維持十個月。 William於上月 20日正式辭任董事一職。
王維基背後揸弗
「紅星會館」由一間叫「香港媒體製作有限公司」持有，王維基則是「香」公司董事。
新劇前瞻
未攞到牌照的王維基，半年內已開拍了五套劇，題材連音樂劇都有，比無綫大膽，但卡士唔算強。
台灣口味
《 FACE》圖片
頭炮搵了唐禹哲同詩雅 孭飛拍《還來得及再愛你》，劇情抄《吸血新世紀》，演員亦重台灣口味。
劇名古怪
《蘋果日報》圖片
由蘇永康和廖碧兒合作的音樂劇《童話戀曲 201314》，劇名唔三唔四，好難迎合師奶口味。
大膽搞鬼
《驚異世紀》分 8個單元組成，由林嘉華、梁小冰等人主演靈異題材，近年罕見。
劇種說教
《蘋果日報》圖片
全劇只有 15集的《第二人生》搵劉浩龍、趙學而做情侶，探討命運，寓意要活在當下，太說教。
最有睇頭
《蘋果日報》圖片
《警界線》由林嘉華和廖啟智孭飛，玩正邪難分的無間戲碼，暫時最有睇頭。
開台進程表：
宣布參戰
去年 8月，王維基宣布進軍免費電視大戰，滿腹大計。《蘋果日報》圖片
發動革命
王維基其後不停向幕前幕後 send短訊角。
動工造勢
年初王維基的電視大樓動工，順勢晒冷演員。《蘋果日報》圖片
留言列表
{{ article.title }}
