約兄弟打波
本周二（ 7月 31日）下午，鄭嘉穎相約好友黃智賢到樂富運動場打網球。兩個男人邊行邊傾，鄭嘉穎講到唔停口兼皺晒眉，應該好多 嘢要同兄弟呻喎！
滾熱辣
樂易玲下禁慾令 鄭嘉穎：我會小心啲
近日，無綫三大小生黃宗澤、吳卓羲及林峯先後錯嗒內地女星，水洗都唔清，成為色慾花心男，形象大插水。
早於兩年前，視帝鄭嘉穎亦曾與國產名模徐靖雯（ Jenny）傳出緋聞，當時他為保星途急急與對方斬纜。最近，三小生連環出事，無綫樂易玲即急謀對策。為防鄭嘉穎中伏，近日她向鄭下禁令，提醒他與內地女星交往時，要打醒十二分精神。其實自徐靖雯後，鄭嘉穎亦早已封盤，寄情工作，難怪他可以理直氣壯向本刊記者說：「我會小心啲，不過都冇女埋我身！」
愛情冇着落唔緊要，近年搵錢至上的鄭嘉穎，原來有意進軍幕後，在內地自組製作公司。
42歲的他，終明白溫柔鄉不及近身錢的道理。
早年，鄭嘉穎緋聞多籮籮。最為人津津樂道的是兩年前搭上國產名模徐靖雯，兩人被指在西貢寓所禁室培慾達 72小時。但戀情見光即死，鄭嘉穎更明言兩人只可以做「朋友」，三個月戀情就咁玩完，他的人氣亦跌至谷底。直至去年，他憑《怒火街頭》封視帝洗頹風，加上有套《步步驚心》為他打入內地市場，身價急升到廿萬人仔一集。事業有轉機，鄭嘉穎落力建立乖仔形象，謝絕異性埋身。
打波發洩
樂小姐下禁慾令，鄭嘉穎選擇打波發洩精力。不過佢全程都在繃緊狀態，似是有壓力未解決喎！
打完波返紅磡海韻軒寓所換過衫，腳踏人字拖的鄭嘉穎乘的士去灣仔會合一名男子，兩人上了一幢工業大廈。又係約男人，真係色戒喎！
眼見無 綫小生逐個中招，樂易玲唔想愛將鄭嘉穎出事，提醒佢小心女人。鄭嘉穎當然言聽計從，唔敢亂 嚟啦！《蘋果日報》圖片
早前鄭嘉穎同內地肉彈女星穎兒傳出緋聞，當時鄭極力否認，更自稱與對方只有數面之緣。
落令禁女色
鄭嘉穎近年緋聞多多，與佘詩曼的多年情難分難離，兩人曾以情侶檔接騷，今年年初更傳復合。
近日，黃宗澤、吳卓羲及林峯食錯內地女星搞到一身蟻，高層樂易玲已相當頭痕。除忙於為三小生解畫，亦提醒「往績」如電話簿厚的鄭嘉穎要小心女色。知情者透露：「無綫小生買少見少，三個當家小生接連玩女玩出禍。樂小姐都好驚再有小生出事，影響公司聲譽。佢向來最錫鄭嘉穎，知道佢同內地妹拍過拖，呢排又頻頻北上拍劇，都好擔心佢成為內地女星下個目標。所以早幾日特登 call佢出嚟傾偈，問清楚佢有冇影過慾照，同埋露骨 sms，起碼有起事上嚟，都可以諗定點拆。樂小姐亦有提醒佢小心有內地女星借故埋身，要好好保護自己。就算要揀圈內人拍拖，都搵番香港同級數嘅，起碼大家都唔會放風俾傳媒爆大鑊。」
其實自去年鹹魚翻生後，鄭嘉穎明顯收斂了。其間，他曾與劉心悠及內地女星穎兒傳緋聞，但都是無米粥。鄭嘉穎棄女色，決定建立事業王國，近日更食住個勢，自組工作室，實行肥水不流別人田。
一條龍接戲
去年，他在內地身價三級跳，片酬由原本 8萬一集，急跳升至 20萬一集，水漲船高，令他萌生自組工作室念頭。
據內地製作公司員工表示：「近年內地劇市場不斷擴張，開製作公司唔憂冇生意做㗎。通常啲老闆批一嚿錢俾製作公司，再由佢哋收劇本同揀蟀（藝人）。有啲製作公司有埋團隊拍攝，所有成本可以控制得到。所以唔少藝人都自己開埋工作室，唔俾製作公司抽佣，好似黃曉明同吳奇隆都有自己工作室，投資電視劇同電影。」
據悉鄭嘉穎眼見好友吳奇隆搞工作室有聲有色，亦心思思想開埋一份。有知情者透露：「舊年嘉穎同奇隆拍《步步驚心》 friend咗，奇隆成日講佢盤生意經，嘉穎咪心動囉！聽講最近嘉穎仲搵朋友幫佢搭路識啲編劇同製作人，已經收咗一批劇本啦！」
本周一（ 30日），本刊問到鄭嘉穎開工作室一事，他亦大方話：「係呀，希望明年初開到工作室。（會喺內地邊度開？）未諗呀，其實依家開始收緊啲劇本，有 project落實先去搵地方都未遲呀！我都未諗定會揼幾多錢投資。（幫工作室改咗名未？）有咩好提議？或者老土啲用番自己個名鄭嘉穎工作室囉。（會唔會益自己友搵佢地拍劇？）等有劇本開先算啦！遇到好劇本咪自己拍，唔啱嗰啲咪分俾人囉！哈哈！講笑啫！」對於樂易玲下禁慾令，鄭嘉穎卻顯得避忌說：「冇印象佢有講過，不過我都會小心啲㗎啦，其實依家都冇女埋我身！」
禁室培慾斷正
2010年，鄭嘉穎帶國內名模徐靖雯返回西貢南圍寓所過夜，兩人禁室培慾 72小時。事後鄭嘉穎死口唔認拍拖，只承認對方是朋友。
《壹週刊》圖片
《壹週刊》圖片
國模轉嗒周子揚
鄭嘉穎唔認頭，徐靖雯即轉嗒香港富二代歌手周子揚。早前周子揚公開自爆將會做割包皮手術而「響朵」，更高調承認徐靖雯女友身份。上周四（ 7月 26日），本刊發現兩人手拖手去旺角嘆日本菜。
7月 30日堅稱寡佬
周一晚，鄭嘉穎出席《怒火 2》飯局時表示會小心私生活，仲拍心口話冇女人埋身。其實佢 嘅溝女往績絕對唔弱，呢 啲係咪叫五十步笑百步呢？
飯局後，鄭嘉穎黐曹永廉車返回自己紅磡寓所，之後一直沒有外出，實行修心養性，幾聽樂小姐話喎。
食女不離三兄弟
黃宗澤偷食大乳牛柳岩
形象花弗的黃宗澤，早年曾傳他呃女兼使女人錢，直至八年前與胡杏兒拍《野蠻奶奶》撻 着後，修心養性做乖乖男友。可惜好色本性難移，近日有傳他偷食湖南乳牛柳岩，胡更公開怒斬八年情。黃宗澤辛苦經營的形象隨時一鋪清袋。
柳岩
林峯 暗啅網女劉羽琦
林峯未有汲取與潘霜霜慾照拖垮人氣的教訓，仍四出獵女。與黃百鳴力捧的 18歲新人吳千語傳緋聞期間，卻遭踢爆原來在同一時間暗啅內地網絡女神劉羽琦。林峯更力邀對方夜訪林家，劉羽琦獲悉林峯有新歡後，以短訊回覆傳媒說：「花心男，受不了。當初他對我很好，讓我覺得他是個可以相信的好男人，但其後蠻多人勸我說他是花心的，一直挺傷心。」
劉羽琦
吳卓羲遭張馨予唾棄
吳卓羲被踢爆同富家女×小姐大玩 phone sex，隨即遭 36F國產乳神女友張馨予公開狠飛。張仲話會剷走「愛的紋身」令自己浴火重生。衰氣纏身的吳卓羲，近日更被過氣女友官恩娜踩多腳，在微博留言力數他。三兄弟中死得最徹底。
張馨予
《怒火 2》必睇位
無綫用《怒火街頭 2》打奧運，首集於本周一（ 30日）播出時，平均收視有 30點，反應不俗，足證無綫的策略成功。本刊率先爆下周 6至 10集必睇位，幾乎場場都有肉睇。
鄭嘉穎剝衫遊街（第 6集）
去年，鄭嘉穎在《怒火街頭》首集中露股罅，引起全城熱話。在續集中，他繼續賣肉益街坊。第 6集中，劇情講到他與胡杏兒在家中大吵，半裸只穿孖煙囪的他，更慘被女方趕落樓，之後俾警察「盤」。
苟芸慧墮樓（第 8集）
林秀怡全裸（第 9集）
首輯有陳敏之全裸，續集亦有新人林秀怡玩全裸。劇中她飾演被毒犯利用運毒的孕婦，為逃避毒犯追捕，全裸由屋內爬出街。拍攝當晚，她僅以牛皮膠黐上半身及着上肉色打底褲扮全裸，相當大膽。
留言列表
{{ article.title }}
