面對面
冇人想影寫真影一世 陳靜
「爆炸糖」是 DaDa在新戲《低俗喜劇》裏的角色名稱。
「爆炸糖」也是 DaDa角色在戲中享負盛名的絕技關鍵。
話說「爆炸糖」是個三級女星，喜歡向導演監製提供特殊性服務換取演出機會，而她出口服務前，先啪一袋爆炸糖，含在口中增添快感。可惜的是，出盡口技用埋道具，被服侍過的電影監製杜汶澤還是記不起她，於是 DaDa在電影裏有一句對白：「你唔只識得我，你仲食過我添！」這就是 DaDa。
兩年前以 E神之名拍寫真躋身 𡃁模行列，兩年以來拍過三部電影套套性感，兩年後出了本錯字連篇的散文集……她說過要出名沒甚麼快得過行性感，她認得的字也不多，她被導演監製選角時總逃不過打出心口的艷星角色，不過 23歲才出道兩年、就買了第二層樓的 DaDa說：「冇嘢蠢得過陪瞓換角色，要陪不如陪有錢佬瞓換錢好過……不過我自己搵到錢又唔受得氣咋嘛……冇人想影寫真影一世！」
電影始終只是電影，呢包爆炸糖，其實一啲都唔容易食！
出口術
出了兩年個人寫真， DaDa今年美其名脫離 𡃁模行列做才女，雖然本散文集相多過字又錯字連篇，相比起那班除褲小便甚至被趕出書展的後輩還是低處未見低，依然有相當大的空間取笑人。一見着 DaDa，我第一句先讚她在娛樂新聞台接受訪問時潤 Phoebe潤得好：「送書畀佢？唔好啦，我諗佢屋企已經堆咗好多書，費事增加佢負擔啦！」 DaDa反問：「哈哈！乜你見到呀？其實我想講好耐啦，但係又唔敢對住報紙記者講，費事回應來回應去沒完沒了……」笑容有點自豪，有點狡猾，更多的是幸災樂禍：「老老實實，當初我拍寫真入行，冇目標冇夢想，根本冇諗過自己底線喺邊。冇人想影寫真影一世，我承認我都同佢哋一樣，書讀得唔多，知道喺呢行出名冇嘢快得過行性感，係當寫真係踏腳石。我冇資格話拍寫真唔啱，但係我有應承過屋企人三點不露、唔可以教壞細路，好好彩，今年冇我份，搞到書展污煙瘴氣，將性感當成 cheap，搞到下流，就真係唔應該入書展囉！」
至於榮升錯字才女， DaDa亦阿 Q精神得很：「我哋唔係大公司，又預咗本書一定唔慌好賣，我真係唔想經理人蝕太多先會慳番啲錢唔請人校對……我冇話自己係才女，亦都承認本書字唔多真係好 hea，下次我咪有經驗知道有啲錢唔慳得，校對要請專人囉……不過我白羊座，好樂觀好衝動，開唔開心都好好善忘，經理人安慰我，我反而安慰番佢轉頭：『可能咁樣反而多咗人買書搵錯字，幫助銷量呢？』。」
踏腳石
拿 33E巨乳和寫真集做入行踏腳石，綜觀兩年以來的娛圈成績， DaDa算是成功了。不過主演的《潮性辦公室》、《喜愛夜蒲》和最新的《低俗喜劇》，每個角色都是心口穿窿、作風 open、道德底線低開，好人好姐會甘心自己在監製導演和觀眾眼裏永遠波大冇腦嗎？
「並唔係個個女仔都想做公主、想做純品女主角，最起碼我唔想，因為我知我唔係。我拍過三套戲，三套戲嘅角色都相似，我真心覺得唔介意……你問我想唔想拍一套唔使靠性感嘅角色，我可以答你，我真係好想好想好想，但係再想都冇用，我都未夠料……既然係咁，我唔應該有咩要求，有彭浩翔同杜汶澤嘅名，我真係唔覺得犧牲咗啲乜。有朝一日我梗係想扭轉自己喺所有導演監製眼中嘅形象，但係需要時間。胸，我唔會封，第時去到咩位，我亦都唔會抹殺我嘅過去，唔會後悔。」
衝動派的 DaDa說話做事比思想快，實情亦有做完了才後悔的事：「舊年接拍《喜愛夜蒲》，同王宗堯有場好激嘅床戲。接嗰陣時我真係冇乜點考慮，王宗堯係我前男友，我相信佢、佢亦都好識得保護我，最緊要係我諗住同佢拍總好過同第二個拍，起碼拍拖嗰陣乜都睇晒……到套戲出街，我先嚟後悔，問自己到底做咗啲乜，驚個個睇完男仔叫好、女仔憎。事實都係，唔係個個鍾意我、唔係個個尊重我，連喺屋企樓下，都有人大大聲話：『嗰個咪 DaDa……』我唔怪佢，每個人思想唔同經歷唔同，一般見識咩……呢行啲錢真係辛苦錢，又係嗰句，我係白羊座，好識得氹自己開心，每行都會有辛苦、每個工作都會唔開心㗎啦，睇你自己點諗啫，同一件事，你將佢諗開心啲就開心㗎啦！」
《低俗喜劇》一開鏡第一場戲就是拍含糖車震， DaDa話拍到喊：「冇唔舒服，係我記對白記得唔好壓力大 啫。」
第三年衝擊書展， DaDa搵埋《低俗》導演彭浩翔撐場宣傳新書，可惜為慳錢自己校對，搞到錯字百出。
去年的《喜愛夜蒲》床戲大膽， DaDa說因為對手是前男友王宗堯：「以前一齊時乜都睇過晒啦，點都好過同第二個拍。」
去年初以 350萬購入荔枝角泓景臺低層單位，目前單位升值一百萬， DaDa今年再入市，打算做包租婆。
連續兩年推出個人寫真，曾經以寫真做入行踏腳石的 DaDa說：「冇人想影寫真影一世，導演都未必想搵被寫真 𡃁模框框框住嘅女仔做戲。」《忽然 1周》圖片
陪瞓班
衫已剝、氣已受，值得安慰嘅係，錢，亦已經落袋。出道兩年多的 DaDa，前年入市第一次做業主，剛剛再睇中新樓樓花，打算做埋包租婆。 DaDa說自己喜歡錢，但是為錢賣自己， No Way！
「用身體去換取角色同機會，問心，我真係覺得好蠢。其實你瞓咗，人哋都未必畀個角色你㗎啦！你估呢行真係一物換一物咩？就算真係畀個角色你，拍完亦都唔係一定紅。冇演技冇內在，拍完咪又係嘥 gas……講真，你係都要陪瞓嘅，不如搵個有錢佬嚟陪仲好啦，得番嚟嘅嘢仲多、價值仲高。畀我話，真係陪瞓，都應該係為咗錢，唔係為個角色。不過講係咁講啫，我自己又唔會咁做囉，因為我係嗰啲好驚蝕底嘅人，登台俾人摸，都真係一巴打埋去；俾有錢佬包，搵個富二代男友？我又唔鍾意受氣喎。富二代追求，我都試過。佢好細心，雖然送嘅唔係啲咩貴嘢，每日都有啲小禮物，病嗰日會有人送湯嚟畀我飲……但係 sorry，我好大女人，要嘅唔係呢啲，所以拒絕咗佢。我唔係含金鎖匙出世，我做咁多嘢，無非係想自己第時生活好啲。重點係，既然自己搵到錢，我使乜要受你氣呢？」
除了王宗堯外， 23歲的 DaDa說自己感情經驗相當豐富：「我 hurt過人亦都俾人 hurt過， 𠵱家我覺得都係自己同錢最可靠。」
真心話
17歲開始做 model， 08年 DaDa與陳柏宇合拍飲品廣告搶鏡成功，並以百果園 E神之名正式入行。
我有點擔心，一般做事拼搏頭腦清醒知慳識儉的女孩子戀愛起來會變弱智，總是一不小心遇人不淑人財兩失， DaDa叫我少擔心：「我戀愛經驗好豐富，絕對唔會呃自己、委屈自己多一秒，一見有咩唔對路，第一時間走人。因為我愛男人，但係更愛我自己，呢個世界，我最愛就係自己！」
心嗰句， DaDa不算漂亮、別字很多、除了身材、才華欠奉，但是她明買明賣、簡單誠實，我鍾意囉！
穿內衣出道、穿內衣出騷，連拍戲都要做心口穿窿三級女星， DaDa的事業線甚至被製成「事業扇」（小圖）宣傳新戲：「想唔想唔賣性感拍套戲？真係好想好想好想。」
撰文：朱小博
攝影：范仲良
化妝、髮型： Kaytefung@yahoo.com.hk
形象： Bryan@the Flaming
服裝提供： pull-in
留言列表
{{ article.title }}
