谷祖琳早產誕小龍女


谷祖琳早前大住肚同老公逛街，估唔到咁快小龍女出咗世喇！資料圖片

恭喜恭喜！恭喜34歲嘅谷祖琳榮升媽咪，馮仁昭收到風佢喺上星期四（19日）生咗個女，母女平安，仲啱啱喺噚日出埋院。原本小谷嘅預產期係8月，突然喺7月就生咗，都算係早產。


茜利妹喺 facebook整咗張 B相，一度令人誤以為係小谷個 B女。

茜利妹製造誤會

小谷好友 DJ茜利妹噚日喺 facebook上載咗張 BB相，一度令人以為就係小谷個女，引起一陣哄動，後來馮仁昭打電話問小谷姑媽、著名電影製作人谷薇麗，佢話嗰個唔係小谷個女，但證實小谷喺上星期生咗：「小谷母女平安，其他嘢就留番佢自己講啦。」
小谷前年同拍拖一年嘅大學同學劉穎恆（ Andrew）結婚，原本諗住二人世界玩多陣，點知冇幾耐就大肚，話咁快小龍女出埋世，老公家族做高級消費品生意，小谷自己嘅甜品店做得又唔錯，家有埋個女，佢嘅少奶奶生活可謂圓滿到極，小谷之前仲話過好期待生多個。話時話，噚日黃昏時掛八號波，小谷母女冇驚冇險出咗院，一家人真係幾好福氣。

arrow
arrow
    全站熱搜

    tvb4life 發表在 痞客邦 留言(0) 人氣()

    E-mail轉寄