FACEweekly
《黑紙》主腦 白痴的林日曦
《黑紙》，一張 A5白紙結構簡單到不能，原先一蚊張放在「 7仔」賣，及後免費任人拎，後生仔就係貪前面有星睇，後面密密麻麻的「黑句」則夠黑色幽默，「世上最黑的事，是白事」、「香港有很多心魔，像龍心、絕心……」讀完看似廢句卻滿藏時弊抨擊。
曾是 903DJ、填詞人，今天則是《黑紙》創辦人的林日曦（夥伴還有 903DJ阿 Bu及前 903DJ陳強），今天出散文集《白痴》、上星期書展則推出《黑紙百科》，繼續其「白痴」偉論，勢要以文字在這立立亂的社會找知音人！
拍廣告補貼
《黑紙》'10年面世，一個月一次一蚊張，先在油麻地 Kubrick發售，第一期封面搵阿嬌講自殺，題材超敏感，「有期搵吳彥祖，就係想佢由 mix角度睇中國人點歧視中國人。」睇過《黑紙》就知，明星講自己，但今年已轉了概念，找名人數自己缺點，「創作最怕就係連自己都睇到悶，而且香港人口味轉得太快。你看 iPhone app《 Draw Something》家吓都變 Draw Nothing冇人玩，所以可能聽日又轉概念。」前幾期更化身家駒講「憤怒」，「你敢說這是他的缺點？」黑色幽默是《黑紙》的信念，變的只有價錢，由初頭一蚊變成免費，最近又變番賣一蚊，「年初變免費，是想拉闊讀者群，反而有忠實讀者話搶唔到。」冇錢，又要型，點生存？「有壯陽廣告想落廣告，點畀佢落呀？」好在做吓廣告補貼一下，糖兄妹在戲院內叫人睇戲安靜的宣傳、小儀拎住支紫花油係咁唱都係黑紙作品，「以前在 903工作，吸收到好多廣告 mind set，佢哋每個位例如海報應唔應該用「 xxxx公司全力支持」都要度好耐先出，因為唔想得失其他客戶。」我強烈要求下期搵俞琤影。
位於灣仔的工作室，只有一張枱及梳化，工作空間多，方便找御用人像攝影師 Bobby Sham以 8× 10大片幅相機為星拍大頭照，「多數星都上來，只係試過一次搵城城，要去到遊艇拍攝。」圖為工作室貼滿過往推出過《黑紙》的走廊。 
訪問多個星，最喜歡哪期？「 3月推出全黑色封面冇大頭照、上面寫着黑暗二字，就係講我們的香港。」今期就講「洗腦」，講最近大熱的國民教育。
寧棄星都要談政治
曾為容祖兒寫〈連續劇〉、林欣彤寫〈上善若水〉， 6月尾更推出短篇散文《白痴》，書內大談現實生活，記得一句講得很好，「要知道幾百人在 facebook like你，但 dislike你講出真心話才是真正朋友。」林日曦就是那「 dislike」的人，「曾經邀請過某星上《黑紙》，經理人話唔准將兩個字撻在面上，我話情願唔做。」有堅持，結果一樣約到大星如郭富城，也情願放棄一期無星，都要講政治大事，「 6.4一期，我哋寫 64個事實，認真到係咁翻查歷史，自己學到史實時，下一代就算高呼平反六四，也有真正的理據。」問到《黑紙》來臨方向？林日曦最想居然係改版面！「未來的《黑紙》，文圖各佔一半，家吓冇人愛睇字，我在微博發字沒人理會，但將字發為圖就大把人轉發！」任你點改都好，最緊要勿改當初的黑色幽默信念！
6月尾個人短篇散文《白痴》，不足一個月就賣斷，要加印第二版；上星期書展與陳強及阿 Bu推出的《黑紙百科》，寫出 100個生活難題與解答，例如當親戚問你點解冇拍拖，書內就提供 10個回答如「其實我暗戀咗 auntie你好耐。」白癡同時考你夠唔夠膽用。$68各大書店有售 
留言列表
{{ article.title }}
