麥兜同班春田花花幼稚園同學及舊校友，雖然個樣儍吓傻吓，但原來個個擁有天籟之聲，仲組埋合唱團，最後仲唱到去紅館，威到極。
卡通道
殺入紅館 麥兜唱好華仔
今個暑假動漫電影特別多，除荷里活同日本大製作動畫外，今年標榜香港製造的《麥兜．噹噹伴我心》亦單挑上陣。
今次講到麥兜所讀嘅春田花花幼稚園面臨倒閉，搞到麥兜要同班同學仔賣唱籌款，最後仲殺入紅館。故事唔只笑中有淚，戲中仲加插 20多首抵死惹笑嘅歌曲，唔似荷里活動畫咁大製作，又冇 3D特效，但勝在有香港情懷，香港人梗係要支持港貨啦！
《麥兜．噹噹伴我心》
上映日期： 8月 16日
由香港作家謝立文撰寫、麥家碧繪畫嘅《麥兜》系列電影，至今已有 11年歷史，最近一輯《麥兜．噹噹伴我心》將於 8月 16日暑假黃金檔期壓軸推出，唔只由細睇到大的觀眾要捧場，支持香港原創嘅港人，更加要買飛支持！
華仔超 chok
戲中華仔亦有出場，原來因為華仔欣賞麥兜同班同學嘅歌聲，於是搵佢哋做演唱會嘉賓。漫畫中嘅華仔同現實一樣超 chok。
麥太反對
春田花花幼稚園要面臨倒閉，麥兜同一班同學組成合唱團為幼稚園籌款，當麥太知道麥兜要拋個身出嚟賣唱，唔只反對，仲擔心到喊。
蠱惑經理人
因為合唱團愈唱愈紅，校長仲搵埋由鄭中基聲演嘅「膠牌經理人」大 M幫手接生意，可惜呢個大 M唔只吹水唔抹嘴，仲呃晒合唱團嘅錢，最後幼稚園都要執笠。
富二代玩謝
戲中富二代鱷魚貝貝搞生日會，亦請咗麥兜同班同學唱歌助興，其間麥兜急尿，貝貝仲老點佢搭車返屋企屙「殊殊」，麥兜俾佢玩謝。
賣唱撲水
上一集是在 3年前上畫的《麥兜响噹噹》，麥兜因讀書成績差又粗口，卒之被阿媽麥太帶佢上武當山受訓，希望佢有一番作為。
今集麥兜就返番嚟香港，話說佢所讀嘅春田花花幼稚園出現破產危機，舊校友全是小市民，無力籌款，校長惟有將心思花在唔使用錢嘅活動，就係唱歌上，仲組織兒童合唱團賺錢，之後麥兜同班同學雖然唱到名成利就，但因被號稱「膠牌經理人」嘅大 M騙財，最後幼稚園亦難逃倒閉厄運。
膠牌經理人
今集《麥兜．噹噹伴我心》保持一貫特色，於片中加插超過 20首搞笑又好聽嘅歌曲，當中更翻唱 70年代 hit爆港台嘅國語歌〈熱情的沙漠〉，配上一班古怪卡通人物嘅舞蹈，保證笑到碌地。最 surprise係戲中出現一個叫華仔嘅角色，雖一直冇開名指係劉德華，但個樣就一模一樣，而且仲好鬼 cute。
《麥兜．噹噹伴我心》，除咗原有吳君如及黃秋生繼續擔任麥太和校長外，今次仲搵埋喜劇王鄭中基聲演新角色「膠牌經理人」大 M一角。鄭中基話：「配音時，見到春田花花幼稚園嘅舊生都變到甩頭甩骨好好笑，又會淋紅油，追債等等，劇情係有啲荒謬，但社會上真係有呢啲事發生，我好有同感。」《麥兜》電影其實都有寫實一面。
繼續地道
《麥兜》電影系列，標榜港人原創，當中出現嘅場景都係唔少港人熟悉嘅地方，而且比較草根，好似天台、街市等，夠晒地道，係香港人先感受到呢份情懷。
天台到會
校長搞嘅籌款晚會，於天台請到會，一班舊生兼街坊一齊又飲又食，應勾起唔少人嘅回憶。
地道街市
連街市都唔放過，呢個街市賣魚阿嬸，聲大大又粗魯，反映出香港草根一面，其他荷里活動畫睇唔到㗎！
Cutie×麻甩
《麥兜》中嘅卡通人物，一向 sell可愛同趣致，但今次監製兼導演謝立文，將拉埋原作者麥家碧同出名畫風市井麻甩嘅香港著名漫畫家楊學德，嚟一次 crossover，今次卡通人物由趣怪嘅麥兜再夾雜班惡形惡相舊校友。咁重口味，真係最破格一次。
相中，前排卡通人物來自麥家碧手筆，個個可愛又得意。但由第 2排起，全部人物都係出自楊學德（小圖）手筆，全部造型搞鬼，形成強烈對比。
留言列表
{{ article.title }}
