插圖: Wendy

揞名爆

上房見真章 「唱得好」俾女寸樣衰

2012年07月13日 ~~ 第885期 忽然1周

老老實實,娛樂圈啲男星鍾意趁北上登台,順便夜遊,可以話係呢行公開嘅秘密!
最近呢,媽咪姐又聽到單有關北上嘅「笑料」,忍唔住要同大家分享吓。話說有次「唱得好」又上大陸登台,亦照舊有一班好兄弟,好似拍開劇嘅「矮仔」同唱開歌嘅「瘦柴」齊齊北上撐佢。

嘩!有成班 friend陪住,「唱得好」非常 happy,仲帶咗幾副眼鏡去換,襯吓啲登台衫。完騷之後,噢!當然係進行萬眾期待嘅「課外活動」啦。開支酒,叫幾個「歡樂小姐」嚟傾吓偈先!飲到咁上下,又係時候稍移玉步上房,繼續談心,呢晚主人家「唱得好」就梗係率先揀咗個靚女啦。
點知一入到房,「唱得好」只係除低副眼鏡,大家都未有乜嘢「互動」,阿靚女已經嗌咗出嚟,「嘩!乜你隻眼原來咁細,咁醜樣㗎!」原本心情大好,諗住醉臥溫柔鄉嘅「唱得好」,冷不防俾人兜口兜面咁寸,塊面谷到紅晒,但又怕如果臨急臨忙換女,呢位口沒遮攔嘅北方佳麗會搞大件事,所以快快完事就嬲爆走人。之不過,佢呢件事自此就成為呢個夜場嘅「笑料」,仲傳番去班兄弟度,俾人唱到依家呢!

arrow
arrow
    全站熱搜

    tvb4life 發表在 痞客邦 留言(0) 人氣()