廿五年前的五月三十一日,澳洲籍男子Gregory Charles Rivers(河國榮),身上帶住五千元港幣和單程機票,降落香港,他說:「我要來香港做歌星。」
旁人笑他傻,他卻一股鬥志。
廿五年過去,他賺的只有人人熟悉的中文名字,娶了個香港女人做老婆,家中十一個仔女(流浪狗),還有一張永久性居民身份證,但不是三粒星。
夢想一日未實現,他始終不甘心,孤注一擲自資出唱片,捧自己做歌星。
明知是賭博,即使只得一剎那光輝,他仍意志堅定,向大家重新介紹自己,「我是今年樂壇新人……河國榮。」

賭注
河國榮原本打算在五月三十一日,這個紀念日,推出他首張(可能是惟一一張)廣東碟《緣的根源》,碟名聽落有點老土,畢竟他是聽八十年代廣東歌而來。
事與願違,唱片要推遲至七、八月,「無辦法啦,三月錄音感冒咗三次錄唔到,等好番又要練番把聲先錄,上個禮拜仲染上B型感冒,唔知响邊度惹番嚟,發燒至一百零四度,差點死咁滯!」
八七年來到香港,是河國榮一生人最大的賭博,今年已四十七歲,他賭得更大,「依家邊有人會出唱片,有理性嘅人都唔會出,但我為咗自己嘅心願,一定要做,張碟我投資成六、七十萬,鬼佬出中文碟,邊有人買。」
全張碟他選唱張國榮、譚詠麟、陳百強和張學友的歌,一句講晒,即係「口水歌」,河國榮明白什麼是「口水歌」,近年他就憑唱口水歌,在內地登台賺錢,現在貼錢出碟,左手入右手出,即是打個和,但他想賺的只是一個歌手的身份。

緣分
三年前他開始籌備,別以為他會土炮製作,偏偏他的製作班底來頭不小,肯定勁過亞太區最受歡迎男歌手林峯。河國榮為了唱歌,曾到美國洛杉磯學藝,他的歌唱老師曾教過鄭欣宜,老師想幫他慳錢,叫他不要住酒店,安排他搬入朋友家中暫住,鬼佬同聲同氣,河國榮好快跟屋主成了朋友。「有日,大家去唐人街食中菜,坐低後店內的收銀員、侍應、廚師,個個輪流行過來望吓我哋,後來有位侍應過來問:你係唔係TVB個鬼佬演員。」大家才恍然大悟,笑他原來在香港咁紅。但其實同枱的屋主,才是美國音樂界紅人,更是美國熱播節目American Idol的音樂監製,「我老師同我講,你想搵人編曲可以搵佢,我仲話乜佢識編曲咩,當時我都唔知佢係邊個。」在美國他卻得心應手,「有次我在街上遇到一對放狗的夫婦,大家好傾得埋,後來做咗朋友,先知男的是做荷李活電影配樂。」

綺夢
在澳洲新南威爾斯大學讀醫科,來自香港的同學播放廣東歌卡式帶,令河國榮從此中毒,「我都唔記得當時聽到邊首歌,只知道旋律好好聽,初初學廣東話,只係想扮吓嘢,同班香港同學溝通到。」後來他參加學校歌唱比賽,唱阿倫的《愛的根源》得亞軍,不是唱哥哥的Monica嗎?「唱Monica我攞唔到獎,Leslie就攞到。」愛上廣東歌,甚至中毒太深,連上堂、食飯、沖涼、睡覺,滿腦子都是廣東歌,「就好似男仔嘅wet dream咁,日想夜想。」他竟然瘋狂到放棄學業,連醫生都唔做,隻身來香港尋夢。


八七年來到香港,寄住朋友廣播道家中,對方的父親當他是流浪漢,那時他終日流連街上,毫無方向,有日他行到紅磡,見到一個金字塔的建築物,好奇唔知係乜。看到有一班人在後門外吸煙,遠處有人叫住他:「河詠麟。」當時正是譚詠麟在紅館開演唱會。在澳洲時,張國榮、譚詠麟和梅艷芳先後在當地開演唱會,他自薦當他們司機,朋友幫他改中文名叫河國榮,遺憾沒有一張跟哥哥的合照,「阿倫的製作單位擦鞋,介紹我叫河詠麟。」好處是紅館重遇阿倫,免費睇足三十場演唱會,有晚阿倫叫他上台合唱《朋友》,「我開心到不得了,萬幾人唔識你,拍手掌俾你,後來林家棟同我講番,嗰晚佢在場。」那時做新人都無機會上紅館舞台,何況是一個無人識的鬼佬。

命運
以前鬼佬在香港好吃香,不過河國榮例外。來到香港第一份工教英文,幫同事頂堂,識咗個女學生做咗佢老婆。那時TVB已有個識廣東話的鬼佬關朝聰,因為有套劇要請多個,「我去見工,戲差到無人信,珍姐(曾勵珍)無奈都請咗我。」在無綫打了二十年工,崗位是綠葉,難聽啲叫二打六,不是演警司、神父,便是壞人,當打份工可以,但講理想,咪玩啦!四年前離開無綫,帶走的只有知名度,之後演過幾套舞台劇,去年同林夏薇合作《中國皇后號》,劇團的朋友叫他去casting,原來是電影《浮城》,製片更是昔日TVB同事。拍《浮城》見番郭富城,「佢好好當我是同等人,好念舊。」明顯有M字額的他,對住鏡梳頭有感而發地說:「如果我是郭富城就好。」河國榮朋友不多,圈中人就只有林家棟、歐陽震華和林保怡,一隻手數晒。

任性
中國人信命,半個香港人的河國榮同樣相信,「初初我來是想唱歌,而唔係做戲。」副業寫過電腦程式,幫教會做攝影師,做過周潤發的英文老師,學投資損過手,好彩有個慳家老婆,「太太真係唔話得,TVB收入唔高,但佢從來無叫我搵過份正職,一直都無反對我。」自知任性,當日父母放他遠走,多年來沒有好好照顧他們,責任落在兩位妹妹身上,父母無怨他,「有時自己都會諗,如果無來香港,我依家已經係一個專科醫生,揸住靚車,有兩個仔女,得閒返農場探父母。」世事難料,蔡楓華都可以鹹魚翻生開演唱會,年近半百的河國榮,也不妨一試。

今何在?
布偉傑 39歲來自美國的布偉傑,英文名Brian。95年首次到港教幼稚園英文,於99年再到香港從事IT工作。熱愛演出的他及後經朋友介紹當臨時演員,更辭退當時的高薪厚職專心拍劇,最為人所識就是06年演出的《同事三分親》中「韋一」。現時:近期有份拍《心戰》,又大減50磅肉,出書教人keep fit。


孫鏡鴻近70歲的賭王何鴻燊的外甥,六姑娘何婉文長子孫鏡鴻Diego,早年拍攝了電視劇《大俠霍元甲》、《千王之王重出江湖》及電影91的《賭俠2》,多數演繹領事、警長等角色。雖然很多人未必知他的名字,但外貌鬼鬼哋、光頭並挺起大肚腩的形象令人有很深印象。現時:身為賭王少有的窮親戚,近年少有拍劇,自六姑娘死後獨居干德道的蚊型單位,閒時為人占卜掙錢。


狄寶娜摩亞 81年港姐季軍狄寶娜摩亞Deborah為加拿大混血兒,當年得獎後加入TVB主持綜藝節目,包括《K-100》及《明珠轉播站》。亦演出過梁朝偉版《鹿鼎記》中的蘇菲亞公主,90年代移民加拿大。現時:於當地的新時代電視台主持節目,並兼任電台DJ。

野孩子
坐在村口士多跟河國榮做訪問,喝住港式奶茶,講講吓他又停下來跟街坊、村狗打招呼。視狗如命,最近他又收多個仔女,「動物是有性格,佢哋行為有轉變,我會感受到,佢哋唔係一隻隻,係一個個!」孩子任由通山走,老遠聽到爹哋的聲音,即撲過來向他「請安!」 ####


 


1986年譚詠麟在悉尼開演唱會,他有幸合唱一曲。


跟郭富城識於微時,十幾年後合作電影《浮城》。


就好似男仔嘅wet dream咁,日想夜想。


去年返澳洲探雙親。


十二歲那年,百厭跌斷腳,入醫院住了半個月。



arrow
arrow
    全站熱搜

    stacylife 發表在 痞客邦 留言(0) 人氣()