羅仲謙每逢在新居出入都會行較少人的L1後門，戴晒口罩怕被人發現。相反楊怡就比較大方，但都保持警覺性，不時四圍望。
捲入劉公子裸照風波的羅仲謙，要擔心「閃咭」流出，另一方面又被無綫「照肺」，唯恐影響事業，心情欠佳，開工時亦悶悶不樂。還好情場依然得意！三十三歲的楊怡，為了爭取同細自己五年的男友羅仲謙見多面，用六百一十七萬，買入將軍澳領峯一個千三呎單位做愛巢。本刊發現羅仲謙經常鬼祟戴住口罩，自出自入楊怡香閨，原來，二人已經秘密同居半年。
阿媽讓路
去年七月，羅仲謙同楊怡因為合作《On Call 36小時》撻着，二人火速發展，羅仲謙為了楊怡飛甩其他女友，收起花弗性格，修心養性做專一男友，而楊怡亦似着了魔般，對大波謙死心塌地。在無綫捱了十年，已躍升到一線花旦位置的楊怡，搵錢自然比剛上位的羅仲謙多。去年十一月，楊怡以六百一十七萬購入將軍澳領峯千三呎單位入伙，見男友遠住大埔村屋，每日山長水遠返將軍澳電視城開工，加上二人不停有劇開，見面時間買少見少，為方便拍拖，楊怡於是提議男友搬到新屋一齊住，今年初，正式過同居生活。據知，楊怡初買屋時曾打算與媽咪一齊住，但楊母為了方便她與男友過二人世界，決定繼續與大女楊娜同住將軍澳中心舊居。
出入小心
日前，要下午二時返到電視城為劇集《巴不得媽媽》開工的羅仲謙，提早半個鐘便出門，戴住口罩遮冚面的他，從楊怡所住的第六座左翼L1樓層後門離開，臨行出大廈前，他小心翼翼周圍望，查察有否可疑人物在附近，十分警覺。之後，他花了近十分鐘，行到附近的爛地停車場攞車返電視城開工。為免戀情太高調引起公司不滿，楊怡、羅仲謙盡量避開一齊出入，就算二人出街都前後腳，免得惹起鄰居留意。為方便出入，羅仲謙甚至持有屋苑住戶證，即使早前楊怡離港大半個月，他都繼續在單位內居住，當正自己屋企一樣。同居初期，羅仲謙與楊怡同樣把坐駕泊在屋苑停車場內，後因楊怡新居位置曝光，加上羅仲謙因為劉公子裸照風波而成為新聞人物，不斷受傳媒盯住，為免再有負面新聞被公司詐型，他才將自己的車改停在附近停車場，寧願行十分鐘兼日曬雨淋去攞車。
外母政策
拍拖接近一年，二人關係越來越親密，楊怡亦早已帶過羅仲謙返屋企讓阿媽過目，據知楊母對他印象相當不錯，而羅仲謙亦十分醒目，識得行外母政策。「有時阿怡（楊怡）要開工唔得閒，謙仔會主動去車伯母，連阿怡家姐楊娜，謙仔都好照顧，所以伯母覺得呢個後生仔會孝順老人家，同埋對阿怡認真，所以都好贊成佢哋一齊。」楊怡身邊人說。
心曠神怡？
楊怡用六百一十七萬買入的日出康城領峯高層單位，建築面積千三呎，屬於四房連雜物房大單位，外望翠綠大草原，表面睇落好似李嘉誠所講「心曠神怡」，但其實所對住的大草原是垃圾堆填區，間唔中就會發出陣陣臭氣。
知都唔認
擘大眼講大話係大部分藝人通病，尤其講到感情事，就算住埋一齊，仍死口唔認拍拖。
官恩娜、吳卓羲
05年，官恩娜、吳卓羲到菲律賓為《酒店風雲》拍外景，被踢爆在酒店房短聚，有指Ella為箍實吳卓羲，主動送上門，要求搬入男友清水灣半島寓所，之後又被拍得收工後拎住一大袋衫，上吳卓羲跑車返家。
陳豪、陳茵
圈中「筍盤」陳豪去年搭上陳茵媺，起初一直唔肯承認，直至九月，被拍得在深井碧堤半島單位內，陳茵媺拎住維他命丸餵陳豪的同居關係，二人才大方公開戀情。
林欣彤、羅孝勇
參加《超級巨聲2》撻着的林欣彤與羅孝勇，為免影響剛起步的事業，死口唔認拍拖，發展一年，林欣彤已秘密搬到男友位於何文田山一號寓所，更被拍得自由在男方屋企出入，跟保安員打招呼，非常熟絡。 ####
有愛情滋潤的楊怡心情靚爆，見到有記者探班即主動揮手say hi。
○九年，楊怡被發現與黎諾懿去睇樓，但最後羅仲謙成為新屋男主人。
留言列表
{{ article.title }}
