二百多呎的套房收藏了過百件籃球戰利品，足夠鋪滿他的六呎牀，而牀尾的大櫃都被他擺滿各式各樣收藏品，唔怪得佢要霸間大房啦！
星悅居 7歲便跟家人移民加拿大多倫多的高鈞賢（Matthew），住慣大屋望慣草地，閒時滑雪、打冰上曲棍球，外國生活零舍自由自在。 04年高鈞賢回歸香港做model，05年贏埋首屆香港先生，隨即簽約TVB，住屋都揀番將軍澳。「想住近公司，所以揀將軍澳，不過之前只係租屋。08年終於儲夠錢，呢間屋係我一手一腳揀番嚟。爹哋媽咪返香港都會住呢度，不過成日陪住我嘅都係Mon Mon（柴犬）同埋呢堆籃球獎牌！」目前高鈞賢擁有將軍澳君傲灣一高層800呎望海單位，雖然比多倫多的平房細得多，不過27歲已擁有自家物業，已經羨慕死唔少香港人啦！

 
27歲的高鈞賢最愛籃球，家中擺滿各式各樣的籃球獎牌、獎座，訪問後一星期他就發生打波斷腳筋的意外，聽說手術後仲要打石膏一個月，真係成也籃球，敗也籃球。

 

籃球塞滿房
步入高鈞賢的家，第一個感覺是清新開揚。全屋白雪雪，牆身及大部分傢俬都選用白色，加上露台開揚，陽光直接入屋，感覺舒服。經過他爸媽、家姐的房間後，最後就到高鈞賢的房間。由於他在家的時間最多，所以連廁所的套房也歸他擁有。房間二百多呎，整間房除了大牀和電視外， 還放滿有關籃球的物品。「我喺加拿大都有打籃球，返到香港冇得滑雪，冇Hockey（冰上曲棍球）就更加專注打籃球，所以除咗獎牌、獎盃之外，我去到邊都會買有關籃球嘅紀念品，特別會儲波衫。」

執屋靠媽咪
高鈞賢住在將軍澳區已有七年之久，「05年選完《香港先生》之後，我就租過將軍澳中心自己住，後來家姐都打算返香港，決定買屋一齊住。」08年他用375萬買入現時所住的將軍澳君傲灣一個八百多呎，三房兩廳單位，當年他是是但但用30萬裝修便算了。不過事隔五年，裝修依然新淨，都係多得高媽媽。「家姐之前同我住，所以佢會幫手執屋，但呢兩年佢結咗婚已經搬走咗。媽咪同爹哋依家香港、加拿大兩邊走，媽咪返親嚟都會幫我打掃。冇辦法，一個麻甩仔嘛，懶做家務。」父母不在港的日子，高鈞賢就與愛犬Mon Mon為伴。訪問當日，Mon Mon不時衝過來逗主人玩，看着他們將網球一拋一接，默契十足，他說：「呢間屋好彩都夠佢跑，不過我依家都睇緊另一層樓，大多少少可以俾Mon Mon走動多啲。」廿四孝主人只肯透露新樓在荃灣區，不過現居已升值約一倍，買多層當投資都係時候啦！ ####

 


光猛客廳一入屋見到呢個光猛大廳，感覺乾淨舒服。高鈞賢專登用上玻璃枱櫈和茶几，增加空間感。


變色水晶燈兩年前高媽媽特登花近四萬，在加拿大帶咗呢盞水晶燈返香港，高鈞賢仲好大細路咁話：「可以轉色㗎！」盞燈可以由白燈變成七彩顏色。


最佳神射手高鈞賢多年來贏過唔少獎盃，佢話最鍾意係呢兩個「最佳射手」盃。因為呢兩個盃，係代表佢喺嗰場賽事入面，入球分數最多，一啲都唔易㗎！


Lego玩具呢個Lego籃球系列模型，係高鈞賢喺美國帶返嚟，公仔可以帶波射籃，真係可以同朋友打番場籃球game㗎！


偶像簽名波身為籃球迷，點會唔鍾意Kobe Bryan（高比拜仁）！呢個籃球就有呢位神級球員嘅親筆簽名，所以高鈞賢平時打波唔捨得用偶像簽名波。


收藏車仔除咗籃球，高鈞賢都好鍾意車。呢堆車仔，有啲係自己買，有啲係fans送。佢話佢好鍾意警車、消防車、貨車之類嘅車仔，睇真啲又幾得意喎！


宅男咖啡高鈞賢有時幾自閉，可以全日留喺房唔出廳，所以佢連咖啡機都放喺房，方便隨時沖咖啡喎！沖完咪成房都咖啡味？


神級簽名波衫白色24號洛杉磯湖人隊波衫（左）上面有Kobe Bryan（高比拜仁）嘅簽名； 而藍色嘅俄克拉荷馬雷霆隊波衫（右）上面就有Kevin Durrant（杜蘭特）嘅簽名。兩位神級球員嘅簽名波衫，收好啲呀，俾賊佬打劫就弊啦！


露台嘆紅酒家有露台，高鈞賢閒時會開支紅酒，企喺露台摸住酒杯底望海。確係幾好feel。


與狗同居柴犬Mon Mon一出世就俾高鈞賢帶咗返屋企，依家已經五歲半，同主人感情好到不得了。高鈞賢話每次出trip，最掛住就係Mon Mon。咁講，翠翠會唔會嬲㗎？


遠望海景將軍澳嘅住宅愈起愈多，依家高鈞賢間屋嘅客廳同房都仲有海景望吓，但前面係地盤，過多幾年應該得番條罅囉！難怪佢密密睇樓想搬啦！


訪問期間，高鈞賢父母都返咗加拿大，記者發現有條爛布掛咗喺廚櫃外面，令原本整潔嘅廚房增添一份麻甩味。


家訪當日，高鈞賢為將所有籃球戰利品放上牀晒冷，竟將本來喺牀上嘅雜物全部推晒落Mon Mon個狗竇入面，委屈咗Mon Mon喎！


汪汪！我個狗竇呀！


港男屋平面圖

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄