自備蘋果
小特搜 媽咪姐今期「小特搜」嘅目標人物,就係笑騎騎放毒蛇、寸人唔使本嘅森美。做慣電視主持嘅佢,最近幫無綫拍新劇《法網狙擊》。平時無厘認真,估唔到今次佢竟然扮重案組督察。見佢拖住個大喼喺電視城四圍行,媽咪姐諗住入面放咗好多重要文件啦。點知打開喼,竟然全部係零食,唔知仲以為佢屋企開士多。森美好鬼馬咁話:「哎吔!拍TVB劇隨時廿個鐘嘛,唔帶定啲乾糧提吓神,容乜易累低!」又真嘅,TVB拍劇唔係人人頂得順,森美唔帶定嘢食,餓親肚仔點算。

 
成晚食零食冇乜益,好彩森美都自備蘋果中和一下甜膩。「呢兩個我自己俾錢買!不過聽日有拜神,到時我會拎一大袋!」咁都得! 森美每日入廠,就拖住個比hand carry size大少少嘅喼開工,「將所有嘢塞晒入去, 唔使執, 一拖就行得,方便嘛!我係咪好似空中少爺呢?」

麻甩佬零食
口口聲聲話為咗上鏡靚啲而要減肥嘅森美,收埋成喼零食。但外表咁潮嘅佢,啲零食竟然係花生、米通,好麻甩佬feel啫!「好麻甩咩?理得佢, 好食就得。你估淨係我食咩?仲有成班手足一齊分享。」


森美呢頭狂啃零食,嗰頭就有樽胃藥跟身,以防萬一。「做藝人成日食嘢唔定時, 有胃藥傍身可以頂住一陣。」

陳敏之薄荷糖除口氣
相比森美呢個零食精, 陳敏之就規模小得多。敏之孭一個黑色小袋就可以開工,但尚算五臟俱全,有齊劇本、電話、銀包及化妝品等等,最特別就係一塊A4 size嘅大鏡。「雖然粉盒都有鏡,但係塊大鏡用嚟照埋後尾枕,好方便㗎!」


女仔始終都鍾意零食,敏之個袋亦隨時袋住幾筒薄荷糖。「薄荷糖同香口膠呢啲係必備,哈哈!費事對手嫌棄有口氣啦!」 ####

 



arrow
arrow
    全站熱搜

    stacylife 發表在 痞客邦 留言(0) 人氣()