Mission is possible! Good job!(設計對白)之前劉華同朱麗倩每次公開露面,都有大班工作人員開路。今次仲勁!佢哋要做埋哨兵、步兵同通訊兵,呢份工唔易打㗎。
恭喜天王劉德華做咗一星期爸爸嘞!老婆朱麗倩就有初生「小龍女」一齊過今年嘅母親節,真係sweet到漏。

 
講開又講,呢個星期好多靚太朋友問媽咪姐,點解無一間傳媒影到「小龍女」嘅真身嘅?幾時可以見吓新手爹哋呀?係咯,其實媽咪姐都好想面對面祝福吓劉天王㗎!畢竟由「五虎」開始,大大話話睇咗佢廿幾年,好有感情㗎嘛。不過,劉華係一位蠱惑爹哋,媽咪姐發現佢喺老婆生女留院期間,派出至少三個大漢,不斷喺養和醫院4個出入口站崗巡邏,監視全日在醫院守候嘅數十位記者。三大漢不斷以電話互通消息,又交換位置,似十足一隊「護B特工隊」呀!最終,多間傳媒相繼放棄24小時制嘅採訪策略,剩低嘅記者人數不足夠全日守晒4個門口,幾個「特工」即時出招!佢哋先拍低記者同採訪車外貌,然後通知「劉老闆」嗱嗱臨抱B喺無傳媒留守嘅出口閃走返屋企,連日冇喺醫院出現過嘅劉華爸媽,終於可以抱孫。吓?你問咁辛苦避記者為乜?點解唔學天后陳慧琳生完就大大方方企喺醫院門口任影?你問媽咪姐,媽咪姐都唔知何年何月先問到劉華喎!算啦,天王自有諗法,我哋點都送上無限祝福。不過,劉家「小龍女」日後應該要跟爹哋媽咪練定「隱身術」,而唔係《玉女心經》囉! ####

 


50歲得女,確係緊張啲!


周一(14日),劉華終於喺自己嘅官網報喜,寫咗一段新手爹哋感受。佢話:「要把老大、丈夫、父親都當好,難甚!!」用咗兩個感歎號咁多呀!放鬆啲啦,劉天王。


就係呢位紅衫哥哥仔,不斷用手機拍下記者嘅一舉一動,方便「報料」,真係辛苦晒。


周二(15日),「小龍女」出世啱啱一星期,劉華爸爸同媽媽朝早七點幾去何文田嘅百樂門酒樓飲茶,繼續封口唔答問題,應該都係天王嘅旨意。又係嗰句,辛苦晒!

arrow
arrow
    全站熱搜

    stacylife 發表在 痞客邦 留言(0) 人氣()