「女」字跟隻「馬」，完全冇花假。眠乾睡濕湊大你，勞心勞力為屋企，久唔久任你發脾氣，甘心情願為奴為婢。
尤其係荷里活媽媽，既要湊仔女又要兼顧事業，四圍飛之餘更要面對傳媒。
難得幾位星級媽媽，完全達標超額完成。所以話，好媽媽唔易做。
星期日母親節，大家記緊識做！

桂莉芙白德露　多棲媽媽
影后桂莉芙白德露（Gwyneth Paltrow）近年專心湊仔，即使拍戲，都係客串性質為主。上年嘅《世紀戰疫》如是、現正上映嘅《復仇者聯盟》如是。
桂莉芙解釋，做得媽媽，預咗留喺屋企湊仔。以佢日程為例，朝早7點鐘起身，送完仔女返學，即返家處理網站業務，同時籌備出食譜。忙完一大輪，夜晚又要煮飯等老公。好在，影后自己都樂在其中。就早前，桂莉芙一人帶住兩個仔女去公園玩。仔女就爽呀，一人一個滑板車係咁go go go。難為39歲桂莉芙喺後頭喪跑跟到足，中途仲慘到落雨淋濕身。「女」字配隻「馬」，真係唔簡單。

娜奧美屈絲　幸福媽媽
澳洲女星娜奧美屈絲（Naomi Watts），早年飾演King Kong女而聲名大噪。自2007年後，娜奧美已先後跟演員男友Liev Schreiber誕下兩子，佢更明言， 如果可以確保下一胎係女，佢唔介意再生喎。
其實仔同女又有乜所謂，孝順就得啦。周日（6日），娜奧美帶細仔Samuel到公園玩，雖然公園玩意多多，但Samuel冇唔記得媽媽，臨玩前仲啜一啖先， 母子鬼咁情深。愛有時都要表現出嚟㗎，唔好怕醜，大家不妨大啖大啖錫吓媽媽啦。

荷爾芭莉　單親媽媽
黑人影后荷爾芭莉（Halle Berry）早年跟model仔未婚生女，兩人之後分手，撫養權到今時今日仍未解決。你知啦，單親家庭對細路仔影響好大， 好在新歡一直沿途支持。原來荷爾2010年拍《怒海狂鯊》（香港現正上映）時，撻着對手奧利華馬天尼斯（Olivier Martinez）。兩人閒時拍拖，必定帶埋囡囡去玩，關係猶如一家人。今年1月，兩人仲訂埋婚。睇嚟荷爾就快可以搣甩「單親媽媽」呢個名號。

珊迪娜布洛　新手媽媽
珊迪娜布洛（Sandra Bullock）都算傳奇。2010年3月憑《守護有心人》封奧斯卡影后， 點知老公被爆連環偷食，兩個月後宣布離婚。當時娜姐已經入紙申請收養BB，家吓離婚，即係要獨自撫養啦。就今年4月尾，珊迪娜獨自一人帶歲半囝囝Louis行街，雖然只係做咗一年媽媽多啲， 但手勢有板有眼，抱B拎埋水壺都仲得，表現勝過好多老手媽媽。 ####


帶仔女去玩
桂莉芙跟Coldplay主音Chris Martin育有一子一女。當日桂莉芙趁空餘時間盡好媽媽責任， 陪仔女踩滑板車到公園玩。


追到索晒氣
本來跟仔女一齊走嘅桂莉芙， 漸漸被拋離。桂莉芙為睇實仔女，追到索氣兼面容扭曲。


淋到成頭濕
行行吓，突然落起毛毛雨。桂莉芙戴上褸帽，冒雨緊跟仔女身後。


娜奧美跟男友Liev Schreiber育有兩子。夫婦相當恩愛，經常湊囝囝周圍玩，不過撞着男友拍戲唔得閒，娜奧美以一湊二，毫無難度。


2005年， 荷爾跟model男友Gabriel Aubrey拍拖。3年後誕一女Nahla，可惜2010年分手。兩人為爭撫養權，互揭瘡疤，至今仍糾纏不休。


首次成為媽媽嘅珊迪娜育兒有一手，姑勿論拖或者抱都揮灑自如，養子Louis真係有福。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄