五一勞動節當日,余文樂駕着去年以340萬買入的林寶堅尼,接載一位女友人到中環shopping,事後記者問他女友人身份,他稱是朋友的太太。

被指爛片王的余文樂,早前憑《春嬌與志明》翻生,片酬由180萬加到200萬。《春嬌》效應,余文樂上半年已連續接拍《車手》、《情謎》及《醉後一夜》三齣電影,穩袋6百萬,加埋套40集的大陸劇《玲瓏局》,千萬冇走雞。
豬籠入水的余文樂,趁住五一勞動節,先睇價值8百萬元的灣仔單位及名錶,再到好友沈嘉偉潮服店揀衫,風騷到暈。

 
余文樂除了打籃球同玩靚車,嗜好唔算多,加上好友沈嘉偉旗下服裝店贊助,年中慳埋唔少。隨住年紀漸長,三十歲的余文樂近年開始買樓保值。他先後在2010年購入錦繡花園一間獨立屋及司徒拔道肇輝台嘉苑一個單位,兩個單位市值估計約2,650萬左右,帳面賺4百多萬,算得上生財有道。

研究萬豪閣
食髓知味,加上錢途無限,余文樂自然想買多幾個筍盤投資。趁近日不用拍戲,余文樂相約好友逛街。5月1日下午二時許,余文樂把價值340萬元的林寶堅尼泊在灣仔星街路邊,然後會合一名女性友人。
兩人路經地產公司時,余文樂即停下來在地產舖門外格價。他對一個價值780萬的灣仔萬豪閣568呎連平台單位甚有興趣,不停向居住在附近的友人詢問意見,似乎有意買入。之後兩人就到附近會合沈嘉偉弟弟沈健偉及另一名友人。
原來余文樂和沈健偉相約到中環睇錶,一行四人到了中環文華酒店附近的名錶店閒逛。其間,余文樂攞住本愛彼錶的目錄翻來覆去,試戴過幾隻,更對其中一隻皮帶款愛不釋手,又不停問在旁沈健偉意見。不過心大心細的他,最終都是空手而回。

「示範」揀衫
睇錶睇了半小時,余文樂和沈健偉齊齊走到沈嘉偉旗下的潮服店HOODS打躉。余文樂對店內潮服興趣不大,反而同相熟店員吹水吹得好開心。離去時他發現記者,即識做替老友宣傳,「示範」在店裏慢慢揀衫,更揀足廿分鐘才離開,認真交足戲。臨行時,記者問他有冇買錶,他笑笑口話:「冇買呀!(見你喺星街睇樓盤喎,想買樓?)唔係,睇吓啫!」問到有女陪睇樓,佢反應頗大:「朋友嘅太太嚟,咪誤會呀!」雖然口口聲聲話睇吓,但余文樂密友透露,他近日銳意入巿︰「阿樂呢幾年搵到錢,加上老友沈嘉偉教佢投資,佢密密部署買『磚頭』。佢睇好樓市,仲話就算梁振英上台個市都企硬,呢排都睇緊市區樓,諗住買來收租。」

身家近三千萬
余文樂05年賣入元朗翠逸雅園一間獨立屋,並於2010年以845萬元放出,賺200萬元。食過翻尋味的他,套現後同年再以620萬元買入錦繡花園一間獨立屋,以及豪擲1千6百萬元買入司徒拔道肇輝台嘉苑一個單位,兩個單位現已升值近4百萬。為了黐住好友沈嘉偉,余文樂平日租住舊山頂道曉峰閣,擁有多架跑車,去年更一擲340萬元購買林寶堅尼代步,換言之余文樂三千萬身家冇走雞。合共:2,990萬元 ####

 


《春嬌與志明》令阿樂搣甩票房毒藥臭名,片酬加到二百萬。


余文樂的新戲《車手》,由杜琪峯監製,演員有黃秋生及大S(徐熙媛),將安排在6月檔期上映。


睇灣仔樓盤
余文樂除咗密密賺,投資亦有道。已揸兩層樓喺手嘅佢,打算再買樓投資,對灣仔其中一單位甚感興趣。


余文樂在首間錶舖睇愛彼錶時,佢對一隻價值廿萬的皮帶款靚錶睇到唔捨得放手。


情迷愛彼錶
之後他們轉場去另一間錶舖睇錶,阿樂亦係情有獨鍾愛彼錶,不過呢次係睇鋼帶錶。


余文樂在老友沈嘉偉的潮服店HOODS發現記者,即落力替好友宣傳,在店內慢慢揀衫俾記者影相。


記者問阿樂係咪想買樓同買錶,他笑笑口說:「冇呀!睇吓啫!」


肇輝台嘉苑市值1,900萬


340萬元買林寶堅尼


錦繡花園市值750萬

arrow
arrow
    全站熱搜

    stacylife 發表在 痞客邦 留言(0) 人氣()