Gaile Lai
黑白色珠片綴金鏈流蘇背心裙 $83,000
黑併金色蛇皮綴金鏈高踭鞋 $11,750
both Gucci
樂基兒“做model要妥協”
自嫁入黎門，樂基兒說話愈謹慎，老實講，我覺得佢連笑容都愈來愈收歛，人前人後瞻前顧後，更見生疏。
這一日，咱們甚麼都談，運動、飲食、旅行、畫畫，風花雪月講個夠本，黎家事，免問，罷了。
現階段，她把握機會享受人生，對於未來，既來之則安之；Well！It means女模事業已達殿堂級數，刻下，做運動、煲劇、遊埠、談夢想……
回顧青葱歲月，一笑置之，仲得閒醒兩句後輩，一字記之曰「忍」。
「做model就係要妥協，否則，盞局限自己，仲弊。」
見到Gaile滑溜膚色fit爆身形，就知名模一席，並非不勞而獲。
Profile
Gaile Lai
出生日期：1980年8月22日（獅子座）
出生地：澳門（父為中國人，母為越南人）
身高：5呎8吋
體重：110磅
三圍：33-24-34
語言：廣東話及英語
學歷：香港藝術學院藝術系學士
簡歷：1歲，移民美國三藩市。14歲，兼職模特兒，曾於紐約時裝周行騷。18歲，來港發展定居至今。08年，跟黎明在美國拉斯維加斯結婚。
主要作品：時裝騷（紐約）「Vivienne Tam」（07-08）；廣告「Neutrogena」（08-12）、「Folli Follie」（11-12）、「Tsubaki」（12）。
電影《I do戀性世代》（01）。
模特兒公司網頁：http://www.calcarries.com.hk
“香港多議論”
煮飯婆Gaile揚言乜都識煮，任何菜式，難佢唔到，甚至曾經考慮出食譜，計劃多多，一直只聞樓梯響，最近，有朋友搵佢合夥開餐廳，講到心郁郁，「我想喺美國開，唔會考慮香港。」何解？「身在香港，作為公眾人物，太多議論，呢種環境，開餐廳的話，大家對我啲食物好難有公正評價，唔fair！「依家諗緊朋友建議喺美國開餐廳，希望成事；「到時候，餐廳任何亞洲菜式都有，所有我鍾意嘅食物都會放入menu，氣氛唔會太formal，唔想客人食得拘束，放咗工，輕輕鬆鬆入去食餐飯，enjoy！「今次，純粹投資，做得成的話，我都唔會飛過去睇住，打算交俾妹妹打理，更加唔會做廚師，大把人煮嘢食叻過我啦！試菜就OK。「食物對我來講好重要，畫畫時，最開心就係叫到成枱食物，一邊聽歌食嘢，一邊畫畫；「不過，我已經3個月冇畫畫！「我喜歡拿身邊事物作題材，香港多霧，我最想畫霧，已經起咗個底色，一有時間就會完成埋佢。」
“生活想更relaxing”
刻下，生活優哉悠哉，拍吓廣告畫吓畫去吓旅行，賺錢買花戴！剛去完巴黎拍廣告，趁下個月赴京開工之前，先去滑雪，再跟美國家人去加勒比海度假，生活如此，好不寫意！「我都三十幾歲，生活想更relaxing，唔再接fashion show，唔使跑來跑去趕場咁辛苦，拍廣告再忙，返到屋企，跑步20分鐘，再做20分鐘拉筋運動，浸個浴，睇埋套電視劇《Once Upon a Time》，成個人好放鬆！「工作唔會再令我好大壓力；「相比之下，家人更重要。「細個時，跟家人長時間分開，呢兩年，生活有規律，時間manage得幾好，應該多抽時間陪佢哋，妹妹漸長，遲啲入咗college更加難見面。「兩年前，媽咪妹妹嚟香港探我，一齊去台灣玩，今次，再組團去旅行，由美國出發，傾過想去墨西哥、阿拉斯加，最後，決定坐郵輪去加勒比海。「去之前，我會先去玩snowboard，拍廣告學玩kick boxing，一星期打足五日，加埋做瑜伽，練到身體好firm好strong，趁季尾，玩多次，去完雪地再去曬太陽。」
“新人乜都要試”
4歲入行，轉眼間，做了18年模特兒，算老行尊了！回望過去，得的多，路行至此，懂得珍惜也是一種福份，Gaile寄語新一代model，好好把握機會，千祈唔好學盛女挑剔揀擇，害死自己。「15歲，第一次上台，乜都唔識，對鞋太大，唔知套衫點演繹，唔記得帶打底衫……呢啲都係學習過程。「依家，每次開工，我都帶備一個袋仔，裡面有兩件一黑一肉色打底衫、鞋墊、落妝油、一條毛巾以防出汗、一條scarf以防凍親、一啲snack，通常係曲奇，隨時補充糖份；「初入行，最好帶多本書、magazine或iPod之類，事關我哋呆等嘅時間居多，一定要自備娛樂。「咁多年，我見住每一季轉變，工作上，遇上自己鍾意嘅衫，梗係開心到癲，相反，唔係咁鍾意嘅都要妥協；「做model需要妥協。「尤其新人，應該乜都試，否則，成日得一個look會被限死，就算唔靚都要盡力演繹，俾客戶見到你夠professional。「依家回望，感覺好得意，其實，每一個工作都係幾好嘅回憶。」
後記
訪問中，同事帶埋BB跟偶像Gaile影合照，氣氛頓時凝住；我估到，當事人深怕雜誌心懷不軌，拿住小人球作古仔…… 訪問前，經理人早就通風報信，生仔免問、黎生免問，咱們自問循規蹈矩，何來歪念？多年來，甜笑是Gaile的招牌，現在笑顏依舊，只是，老遠站了一位目不轉睛時刻護主的男助手，試問，訪與被訪，又怎能放鬆呢？
Gucci 中環置地廣場G23-30號鋪 2524 4492 ####
Gaile Lai 綠併黑色綴金色刺繡tube dress $33,800 黑併金色高踭鞋 $7,100 both Gucci
Gaile Lai 黑 / 金 / 綠色幾何併布外套 $27,000 黑色雪紡恤衫 $11,200 黑色高腰西褲 $9,800 黑色綴金色老虎頭釦皮帶 $6,950 金色綴金鏈高踭鞋 $12,500 all Gucci
00年十二年，外貌幾乎沒變，防腐劑女神又一例證。《蘋果日報》圖片
11年陪老公出席「亞洲最傑出藝人獎」領獎，婚後罕有手拖手曝光。《蘋果日報》圖片
12年練瑜伽多年，身形fit爆，最近，加埋打kick boxing，日日出汗，連皮膚都好埋。《蘋果日報》圖片
Gaile Lai 黑色綴金色刺繡外套 $34,500 黑色綴金釦皮帶 $8,900 金色綴金鏈高踭鞋 $12,500 all Gucci 黑色綴閃石熱褲 stylist's own
Gaile Lai 黑色綴金色刺繡連身裙 $74,000 Gucci
stinglife 發表在 痞客邦 留言(0) 人氣()
留言列表
{{ article.title }}
