簽林嘉華　繼續挖角王維基連開三劇唔驚冇牌 @ 娛樂八掛大放送★

簽林嘉華　繼續挖角王維基連開三劇唔驚冇牌

政府對免費電視台發牌一事一拖再拖，但王維基依然冇有怕，昨日高調跟林嘉華在尖沙嘴舉行簽約儀式，還透露今個月將開拍三部劇集，向旗下藝人派定心丸。嘉華亦識做冧老闆，笑言會將無綫排第二位，明剃無綫眼眉。

王維基積極招兵買馬，最近成功邀得已移民加拿大的林嘉華加盟。嘉華昨日在太太陪同下在尖沙嘴一間酒店出席簽約儀式，並獲王維基贈送一對筷子。嘉華笑說：「你放心，我會同你拍住搵食，我知你賣咗你親生仔（城市電訊）。」王維基一臉無奈說：「你唔好再講呢件事，再講又想流眼淚。」嘉華透露在加拿大收到王維基親自來電，傾足十小時，完全感受到他的誠意，嘉華說：「呢間公司唔會阻我發展，今日CTI，聽日可以去亞視。」王維基大方回應：「你幫無綫都得！」嘉華即賣口乖說：「我排無綫第二位。」

招攬訓練班學生
嘉華稱最欣賞王維基有膽量兼夠創意，問到酬勞是否倍增？他說：「商業秘密，我唔係嚟做義工。」他透露今次是簽部頭約。問可擔心被無綫列入黑名單？他說：「冇聽過，多一個電視台係雙贏局面，令無綫有衝擊去留住員工。」據悉王維基在下周將有大型的啟動儀式，他稱不擔心政府至今仍未發免費電視台牌照：「5月我哋會開拍三部劇，剛才話賣城電會流眼淚只係講吓，電訊業做咗廿年已冇乜挑戰性，反而電視行業多競爭多選擇，家開始招攬第二期訓練班學生。」

編審遭秋後算賬
王維基早前被本報影到與曾捲入唐英年感情缺失風波的唐唐前政務助理、現任香港總商會總裁袁莎妮撐枱腳，更送她上樓，至凌晨還未離去，王維基解釋：「係識咗好耐嘅朋友。」問到是否袁的身份特別，故刻意避談？他說：「唔關事，呢個世界唔係男就係女。其實唔止佢，同學都話好驚同我出街，總之清者自清。」王維基早前挖走無綫一班幕後工作人員，有份為無綫新劇《耀舞長安》做編審的劉彩雲，疑因過檔王維基而遭無綫秋後算賬。據悉《耀》劇原由她一人度橋及修改劇本，現竟在後期製作清單硬加一位只參與少部份集數的編劇湯建萍名字，令其他人看不過眼，在微博直斥：「不知道這決策是誰定出來，但這種剝削抽水、不懂尊重原作者的行為，實在令人齒冷！這跟強盜有何分別？」採訪﹕李珮洳　攝影﹕陳俊強

林嘉華（右）獲王維基送筷子，即賣口乖稱無綫只排第二位。