狂食螺絲林峯一到場，兩人連對白也懶得對，即急步埋位，其間林峯因食螺絲更要NG八次，導演先收貨。

貴為TVB親生仔的林峯，一向深得樂小姐愛錫，開工唔止有優待，更攞正牌可以遲到早走，要同劇演員呆等，就連監製、導演亦冇佢符。過去有傳歐陽震華和楊怡與他合作拍劇時，因頂唔順林公子經常遲到失場，而向樂小姐投訴，可惜收斂了一排的林峯，近日拍攝新劇《雷霆掃毒》時又故態復萌。上月初，本刊更直擊他遲到逾一小時，連累一向準時的三哥苗僑偉呆等片場。對於林峯經常遲到，三哥皺眉說：「佢嘅嘢你唔好問我，費事講多錯多！」

 
家中有個富爸爸的林峯，亦是TVB股東利孝和夫人世姪，尊貴身份自然高人一等。入行十四年的他，曾多次因遲到而辣㷫對手。無論拍劇、攞獎，抑或出席活動搵真銀，林公子貫徹始終要「壓軸」登場。不過有高層撐腰，個個敢怒不敢言。

去春茗冧廠
林公子的例遲習慣，近日更變本加厲。據知二月尾他拍攝《雷霆掃毒》其中一場青馬大橋群戲時，因之前出席英皇春茗玩到唔肯走而失場，連累一眾工作人員食足成晚西北風。據當晚在場的工作人員透露：「少爺仔（林峯）最初同我哋講只係去英皇嗰邊打個招呼就返嚟拍劇，咁我哋七點已經喺條橋set晒機等佢。點知等到十點都唔見人，打俾佢就話要等埋鄭嘉穎到先走得，最後索性唔聽電話，搞到冧廠拍唔到囉。嗰晚三哥嬲到震，依家佢兩個都冇咩偈傾㗎啦。」


二月尾，林峯應承《雷》劇組現身英皇春茗後交人，不過當晚鄭嘉穎強勢加盟英皇，林峯即改變主意，磨足整晚唔肯走，搞到劇組食足成晚西北風。

遲大到斷正
上月初，林峯與三哥在電視城拍攝一場醫院戲。本刊所見，據當日通告顯示二人需於三點半化妝，四點半埋位。早已化好妝的三哥準時到達現場，但直到五點半，依然未見林峯蹤影。眾人在等候林峯現身期間，谷住肚氣的三哥，坐在摺櫈上不停唉聲嘆氣。一時見他悶悶不樂把玩手機、一時又除低鞋唞氣兼煲煙打發時間。

NG八次
直至五時四十分，記者才見林峯施施然到現場。 穿上戲服的他，到場未有向眾人致歉，反而走到金剛面前打牙骹，久候多時的三哥亦急急埋位。兩人連劇本都冇對，簡單一場推輪椅戲，原本只有三、四句對白，卻因林峯食螺絲要NG 8次導演才收貨。「其實嗰日原本要拍三場日頭戲，不過少爺仔六點先見人，所以最後拍得兩場，剩低嗰場要搵日再補。」對於林峯經常遲到、失場影響拍攝氣氛，三哥聞言對記者冷笑一聲說：「哈哈，係咩！（嗰日拍醫院戲佢遲大到。）哈哈……係呀。（佢係咪試過去春茗搞到冧廠？） 唔記得啦，呢排落雨個個都病，係咪咁所以冧廠呀！」當記者再追問他有否不滿對方經常遲到時，三哥皺眉說：「佢嘅嘢唔好問我啦，我唔講啦，費事講多錯多！」林峯有大大個免死金牌在手，難怪連輩份咁高的三哥都買佢怕！周三（2日）記者致電《雷》監製林志華， 他表示：「我咁耐以嚟未收過report林峯遲到。（我哋喺上個月9號見到佢遲一個鐘喎！）或者我同導演了解吓先再覆你。」

拍檔齊中招
林峯遲到實屬慣性，過去有不少曾跟他合作過的演員忍唔住出聲，可惜全部亦徒勞無功。 ####

 


坐住呆等準時的三哥知道林峯起碼遲一個鐘，最初連戲服都唔換，着住自己衫閒坐一邊。


吹水扯煙林峯等極未出現，三哥無所事事，跟助手吹水煲煙打發時間。


除鞋唞氣呆等一小時，有工作人員大叫林峯就到，三哥才慢慢把鞋穿好，準備埋位。


眼神零交流其餘拍攝時間，三哥和林峯都冇交流。每當林峯行近，三哥更會閉目養神，實行冇眼睇。


4月9日的通告中，顯示林峯及三哥要下午3點半返到電視城化妝，4點半要到場地現身，不過林峯當日卻遲足個多小時才施施然出現。


費事講多錯多！（真實對白）上周二（24日），記者問三哥有關林峯遲到一事，他欲言又止，表示不想講多錯多。


歐陽震華、楊怡分別跟林峯合作拍《不速之約》及《談情說案》的Bobby及楊怡，因峯少獲寬免不用接深夜及清晨的通告，仍然日日玩遲到。有傳Bobby曾向樂易玲投訴，可惜無功而回。


陳豪與林峯合作《溏心風暴》時，陳豪曾領教過林峯壞習慣。向來慎言的陳豪，亦忍唔住向記者爆林峯經常遲到。


李司棋、夏雨李司棋和夏雨曾公開指斥林峯拍攝《家好月圓》時開工例牌遲到，到場又顧住打機，不過大個金牌護身的林峯未當一回事。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄