今年42歲的李姿霆(Karen)09年被爆搭上港男黃長發搞忘年戀後,包養Karen多年的「鞋王」鄧劍群, 當時除借助傳媒數臭Karen外,09年更入稟高等法院,追討之前送贈對方的四個物業。案件上周終於開審,聲稱「啲錢一世使唔晒」的鞋王,為總值三千多萬的物業,與Karen在法庭互揭陰私。據知一直啃唔落「Karen勾佬」呢啖氣的鞋王,有考慮過爭奪與Karen所生、今年八歲大女兒的撫養權。人冇錢冇,得番一粒女可以寄託的Karen只好強撐:「點都要攬住個女。」

 

庭上句句金
鞋王和Karen上周一(16日)起一連五日,為證明自己擁有四項物業業權,不惜在庭上大爆醜聞。首三日由鞋王作供,最後兩日才由Karen反擊。案情比電視劇更有張力。由於金句太多,不能盡錄。


16/4 Karen代表律師質問鞋王02年有否俾兩萬元Karen,鞋王說:「兩萬元對我嚟講好簡單!」 17/4 鞋王自稱女人緣甚佳,他說:「我有錢,咪黐埋嚟囉,我又唔係太醜樣。」 18/4 鞋王堅稱Karen生女時自己冇送樓俾佢,「點解生咗女要俾物業佢,唔成理由去慶祝。」


19/4 Karen指鞋王身家成疑,她說:「李嘉誠劉鑾雄就真係好rich!」 20/4 Karen解釋自己並非貪錢,「唔係因為有錢同佢一齊,我以前啲男朋友都有錢。」 20/4 Karen在庭外堅稱單身生活冇得頂,她說:「要做盛女,呢期最hit!」

追討的四項物業
西貢匡湖居一期獨立屋市值2,200萬大角嘴港灣豪庭一座單位市值400萬紅磡半島豪庭二座單位市值500萬尖沙嘴卓能中心商業單位市值200萬


上周,金鐘高等法院格外熱鬧,鞋王和三奶Karen為證明自己擁有四項物業的業權,將法庭變成舌戰場。記者連日來在庭內聽審,鞋王和Karen面對對方律師的質問面無懼色,連珠炮發講出有利自己的證供,擺明有備而來。

每月六萬養女
爭樓只是前奏,無論鞋王最後能否重奪業權,他已部署進一步狙擊行動,擬與Karen爭奪女兒的撫養權。「雖然Karen同黃長發事件已經過咗四年,但鄧生(鞋王)條刺始終喺度。佢覺得Karen依家冇咗靠山,個女由自己照顧會有較優質嘅生活。」知情人士透露。鞋王02年與Karen相戀,最初向Karen提供3萬元的生活費,到後期加至逾5萬元。09年與鞋王分手後,她只可以靠老本過活。據知8歲大的Valarie現時就讀沙田某國際學校小學部,每月學費萬萬聲,連埋書簿費和其他雜費開支,Karen每月要花六萬元養女。而且她現時和女兒所住的匡湖居正面臨被鞋王沒收,兩母女分分鐘連屋都冇得住。縱然危機密布,Karen由始至終並未考慮向鞋王屈服,她說:「我好後悔跟咗鄧先生(鞋王),佢根本就係一個衰人。」她表示女兒懂事生性,曾多次為她和鞋王的紛爭祈禱,以另一方式分憂。因此她堅持到底,希望將女兒養育成人。「個女對我好緊要,我點都要攬住佢。佢呢兩年冇見過個女。嗰單官司(物業權)仲有三星期先判,我依家都唔知講乜,唔識應付你哋(指記者)喇!」

謝偉俊律師:年紀細會判俾媽咪
謝偉俊律師指法官會根據「最有利於子女」這個最大原則來決定撫養權歸父母哪一方,他說:「咁一定係以小朋友最大利益行先啦!通常小朋友年紀細多數會判俾媽咪,但如果證明個女判俾爸爸會好啲,就會判俾阿爸㗎!」而鞋王追討Karen他之前所贈的四個物業一案,謝偉俊就說:「雖然係已經送咗出去,又寫咗對方個名,都未必一定冇得打(指官司)。有好多有錢人因為種種原因,將名下股票同物業寫俾個女人, 只係俾佢代為持有或者做信託人。如果有呢類文件當然好,冇嘅話就睇雙方可以拎得出乜嘢證據,令個官去相信你。」鞋王在庭上作供時表示這四個物業並非送俾Karen的禮物,謝說:「如果有充分證據,口頭協議都未必冇效!」

向正室賠罪
02年任職保險經紀的Karen,因工作邂逅鞋王,二人相識十天後便火速搭上。Karen稱一早已知鞋王有正室,不過當時她剛與同居四年的男友分手,芳心寂寞,所以她甘願做二奶接受包養。「佢由第一日開始就呃我。我唔鍾意人呃我,醜唔緊要,老唔緊要,最憎人呃我。」原來鞋王認識Karen之前,已經收埋二奶劉貝茜,「我冇諗過自己做人阿三,我對唔住鄧太(鞋王髮妻朱錦韶),我分咗佢老公。」Karen突然得悉自己是三奶後,便毅然與鞋王分手,「我同鄧生分手後打過電話俾鄧太,我同佢講:『以前真係好對唔住你,要分你老公』,鄧太係一個好好嘅女人。」鞋王為證明Karen一早已知有二奶存在,他不惜自爆02年娶新抱擺酒時,就邀請過二奶三奶同場出席,他說:「個仔結婚擺150圍,要湊夠人,乜嘢人都請。」他更強調現階段只想盡快忘掉他和Karen的舊情。記者就Karen的指控連日來不斷致電鞋王,周二(24日)晚上,他終於接聽,面對記者提問,笑笑口說:「佢(Karen)鍾意點講就點講啦!我唔會評論喇!我淨係想快啲搞掂單官司啫!」

做張耀榮親家
鞋王在庭上作供時,表示02年9月,曾同時邀請二奶劉貝茜和三奶Karen出席兒子婚宴。原來當時正是鞋王次子鄧偉業和張耀榮女兒張麗芳結婚,當日大婆朱錦韶亦有到場。

鞋王派錢

「錢一世使唔晒」的鞋王,上周三(18日)離開法院後,在記者面前自掏腰包捐出二千蚊買慈善獎券,相當「有心」。

大婆有實力
現年69歲的鞋王,暴富前已和朱錦韶結婚,朱協助丈夫在東莞設鞋廠及加工廠(下圖),03年沙士期間研製毋須綁帶及無鞋扣的鞋送贈醫護人員。兩夫婦06年齊獲頒「世界傑出華人獎」。二人婚後育有三子,次子鄧偉業02年與「演唱會之父」張耀榮女兒拉埋天窗。

冇後悔愛長發
Karen今時今日面臨訴訟,搞到如斯田地,始作俑者當然是06年港男冠軍黃長發。黃長發09年教Karen法文教到上牀,當日Karen雖背負「紅杏出牆」之名,但無懼輿論壓力,十指緊扣開記招宣布戀情。這段不被看好的忘年戀,最終只維持半年貨仔,當時她更向本刊哭訴人財兩失。事隔多年,身經百戰的Karen到這刻仍堅稱對黃長發沒有絲毫怨恨,她說:「我冇後悔愛上黃長發,即使之後我哋感情變咗質而分手,愛就係愛。」

長發漠不關心
事實上Karen只是執迷不悟,皆因黃長發經已將感情投射到另一個女人身上。早前本刊就拍得黃長發與一名金髮嫩模在中環拖手遊街。去年初黃長發創立了Synergy model公司,自己做老闆之餘更做埋經理人。大約一年前他便戀上旗下一位愛沙尼亞裔嫩模Pilleriin Vihtre,為催谷自己女友的工作量,曾一度令其他model不滿。據知黃長發現時收入穩定,每月支取四萬元月薪,與當年跟Karen拍拖時,揸靚車飲醇酒的奢華生活,始終仍有一段距離。周一(23日),記者聯絡過黃長發,他對所有關於舊愛Karen的事情,表現漠不關心:「我唔知呢件事(鞋王與Karen的官司),亦冇乜睇法。(你冇睇報紙咩?)我真係冇睇過,我都唔睇中文嘅,我都冇興趣。」隨即匆匆收線。

自食其力
26歲的黃長發09年和Karen拍拖時靚車任揸,曾揸二百萬的Alfa跑車和Karen搵食。冇咗Karen放水,黃長發如今出入搭地鐵,以一萬元月租土瓜灣翔龍灣。

櫃員機攬啜
黃長發到櫃員機撳錢,等錢期間,已急不及待和女友錫錫,非常猴擒。

風騷遊街
雖然舊愛Karen惹上官非,但黃長發一於懶理,早前本刊便拍得他拖實愛沙尼亞裔的女友,在中環風騷逛街。

平胸嫩模
這名新女Pilleriin今年22歲,是黃長發model公司旗下model。身高五呎八吋的她,主力為國際時裝雜誌影硬照。記者從model公司官方網頁中發現Pilleriin不少三點式照片,上圍32吋的她身形不算豐滿,更略嫌瘦得滯。

藝人有話兒
鞋王與Karen在法庭互片,鬧得滿城風雨,吸引了不少市民上庭旁廳。誰勝誰負,法官自有判斷,不過不少藝人亦坦言有八卦此事,有話要講。

白韻琹:攞得就攞
曾經擔任電台節目主時,負責解決婚姻問題的白韻琹說:「我奉勸所有女人,做得人哋二奶、三奶嘅,梗係親生仔不如近身錢啦!有得擸時盡量擸,攞得幾多就得幾多,個男人唔會同你做人世。 所以啲物業同錢,最好攞咗返嚟即刻轉入基金,咁到個男人反悔時佢都攞唔番。 不過如果日後佢想倒貼啲男人,亦可以索性搵個靚仔又後生嘅,玩到厭咪踢開佢囉。男人可以咁,點解女人唔可以呀?」

薛家燕:送咗咪算
曾經歷過婚姻失敗,要獨力湊大三個仔女的薛家燕說:「咁佢哋(指鞋王和Karen)一齊,都有過一段快樂嘅日子吖!如果唔快樂,當時就唔會將咁多層樓俾對方啦,咁不如大方到底囉,即使夫妻離婚都要有贍養費啦。不如咁算囉,唔送都送咗啦。佢(鞋王)而家送咗出手嘅又要追番,可能都係為出一口氣啫!愛嘅反面係恨,無謂囉,大家好嚟好去咪算啦!」 ####


行事一直低調的鞋王,上周出庭時表現充滿自信,離開法庭時更主動上前接受記者訪問,非常合作。


8歲女兒Valarie 鞋王和Karen所生的女兒Valarie,今年已經8歲。Karen 09年和黃長發拍拖時亦試過帶埋個女一齊飲茶。《壹週刊》圖片


Karen與黃長發分手後,將全副精神放在女兒身上。她早前曾被拍得單拖到玩具反斗城掃貨,一手拎起數件玩具。《蘋果日報》圖片


《壹週刊》圖片


《蘋果日報》圖片


《蘋果日報》圖片



arrow
arrow
    全站熱搜

    stacylife 發表在 痞客邦 留言(0) 人氣()